評論員的自我修養

近日有人係未睇過電影作品下發表對該作品嘅評論，更批評他人嘅電影評論不知所謂。發表有關言論嘅作者認為，藝術評論即利用各種批評理論針對藝術作品、類型等作出解讀及評論，而評論之好壞，在於理論運用得啱唔啱、文本理解夠唔夠說服力等等。

首先，呢位文筆中英夾雜到不能更中英夾雜嘅作者，對文本並無任何理解（連作品都未睇過，談何理解？），所引用嘅社會學分析概念亦不太能夠對應作品本身，似乎有寬己嚴人之嫌。其次，藝術評論是否必須使用理論，是否使用理論就等於言之有物，個人係相當懷疑。以筆者閱讀評論嘅經驗，學術性高低同評論是否有價值，並無任何關係。一般而言，無視文本、自說自話，胡亂引用其他作品或理論嘅評論，不但讀而無味，甚至會損害尚未睇過有關作品嘅人嘅觀感。

而作者完全無視文本、無視藝術媒介特色、無視創作者意圖，只為服務個人嘅信仰，就去批評電影作品及有關評論，並且獲得平台刊載，對此我着實目瞪口呆。作為一個偶有投稿，而每次投稿定必查證行文中嘅觀點是否有理據支持嘅無名作者，不得不慨嘆所有比較認真寫作嘅評論員都可以立即收皮了。

為此，筆者嘗試整理評論員嘅基本修養，既係自我提醒，亦希望可以改善某啲圈子嘅戰狼風氣。

1. 做資料搜集

正如蘇格拉底嘅啟示，認識自己嘅無知係所有智慧嘅根本。鑑賞藝術作品時，總會有啲地方同自己嘅想像有所出入，但呢啲出入係作品嘅瑕疵，定係自己產生左唔準確嘅想像，係需要查證。不經查證就批評作品，對創作人同作品都有欠公允。

2. 培養相關媒介嘅認識同修養

同理，有無知之知及自知之明都係十分重要。評論作品時，假如對相關創作過程或媒介認識不足，就會錯過值得欣賞嘅地方，唔理解創作者嘅設計，唔明白各種媒介嘅優點同局限。好似電影、寫作呢類相對容易接觸嘅媒介，因為門檻較低，觀眾可能會覺得睇得多就等於識賞析，但其實賞析都需要學習。

以電影《第三度殺人》為例，除左懸疑精妙嘅情節，律師同嫌疑犯係拘留所傾談嘅畫面亦為人稱道。儘管拘留所分隔左律師同嫌疑犯，但畫面中時有時無嘅玻璃，就好似隱喻兩者嘅界線並非黑白分明。儘管筆者唔清楚畫面係點拍攝出尼，但筆者知道拍攝冇想像中簡單，需要考慮燈光、拍攝角度等要素，亦因此更能夠欣賞到電影之美。

3. 認識創作者同觀眾嘅角度

假如評論員冇從創作者嘅角度出發，不但會錯過值得欣賞之處，有時更會誤解創作者嘅意圖。正如先前所述，任何好嘅創作同表達都會考慮觀眾如何接收訊息，平衡觀眾嘅吸收方式同作品想表達嘅重點。尤其係當作品想影響或衝擊既有觀念，如果唔先反映現實情況，會令人好疑惑、難以接受。

評論員當然可以，亦都應該同創作者持有唔同角度，但如果係自己誤解或曲解創作者意圖，又將責任推係作品身上，其實係損害緊作品、創作者同整個藝文環境。

好嘅作品需要好嘅觀眾，好嘅觀眾亦需要好嘅作品。當好嘅觀眾群體尚未成熟，好嘅作品懂得如何去培養好嘅觀眾。當好嘅觀眾開始出現，又會通過口耳相傳、評論分析等嘅方式，去鼓勵他人支持好嘅作品。評論其中一個作用，就係協助建立好嘅觀眾同好嘅作品。

而評論員都要明白，評論本身都係一種創作同溝通。如果只係滿足自我表達慾望，無視觀眾嘅觀感，那麼評論想帶出嘅訊息將大打折扣，只會吸引到一班同自身觀點高度一致嘅受眾，難以影響他人。

4. 從多方面分析評價，避免以偏概全

以電影為例，電影需要涵蓋拍攝、寫作、音樂、美術設計等多方面嘅藝術媒介，所以單睇對白、或者畫面、或者配樂，都係掌握唔到成套電影。筆者觀影時亦較容易專注於對白上，忽略其他要素。筆者電影課嘅老師就提及過，淨係着重對白，同聽收音機廣播又有咩分別呢。因此寫影評嘅時候，都會提醒自己，對白、文字訊息只係電影嘅一部分，不應該以偏概全。

除左從不同藝術媒介嘅角度分析作品，即使係單一藝術創作媒介，同樣可以從多方面評價作品。作品嘅訊息係其中一環，表達技巧、創作背景、真實性、創造力等等又係另一環。

近來經典電視劇《Friends》引起熱話，有人批評《Friends》種族有欠多元，迫使創作團隊道歉。追求政治正確或許係回應緊時代嘅呼聲，但忽略作品其他要素，無視當時創作處境，對讀者、對唔認識或冇咁認識作品嘅人，未必係負責任嘅行徑。

5. 盡量唔劇透嘅情況下評論

劇透，即係暴露作品嘅重要情節比可能尚未睇過作品嘅人知道。劇透不但會打擊他人觀看作品嘅意欲或趣味，用三言兩語尼概括人地創作嘅精彩之處都係好失禮嘅事。能夠唔劇透地評價作品，係學習，亦係修為。

6. 以作品為本

評論固然係創作嘅一種，但必須建基於被評價嘅作品。假如冇認真睇、只係水過鴨背，甚至冇鑑賞過被評價嘅作品，係單純創作，而非評論。

評論作為議論文，亦應不忘初心，每個論點都應有根有據，不能無中生有、無的放矢，否則詞不達意、言之無物之餘，更係惡意攻擊緊作品本身。

當然，若然評論只係重複被評價嘅作品，評論自身就冇任何價值。評論理應抒發己見，為被評價嘅作品同評論創造意義。然而評論有責任表達清楚「(我推測) 作品想表達嘅意思」，同「作品令我聯想到 (某啲可能同作品關係冇咁大嘅野) 」，以示對作品嘅尊重。

因為評論員想像嘅世界，同創作者想像嘅世界有差距，同其他觀眾想像嘅世界亦有異同。評論員嘅評價甚至指控，可能係評論員嘅眼鏡反映出某啲色彩，而非作品本身嘅色彩，呢點係創作評論時需要自我省思嘅。

7. 尊重

唔識得尊重人地嘅創作，他人都唔會認真看待你嘅評論。

如果你尊重自己嘅創作或評論，你都要尊重你評論緊嘅作品。

筆者並非行內專業人士，無意自詡權威，只係眼見某啲惡意、扭曲、毫無根據嘅批評而有感而發，希望可以守護同建立一個對創作者友善嘅環境。

支持本土優秀創作，由你我做起。