那些年，我追捧過而又唔紅嘅歌星

唔紅又好、紅過又好，最後都係消失風雨中；淡淡交會過各不留下印。

香港樂壇咁多年以來，都係一個修羅場。

自從1982年、TVB同華星開始舉辦「新秀歌唱大賽」之後，每年透過參加各式各樣嘅歌唱比賽（最好例子：全港十八區業餘歌唱比賽）入行嘅人越嚟越多。

入行嘅人越多，亦即係死亡率越高。當我哋聽緊生還者為我哋演唱嗰陣，請唔好忘記，喺呢個汰弱留強嘅圈子之中退場嘅人。

喺韓劇《請回答1994》裏面，成東日（成東鎰）認為，裴勇浚、全度妍同全智賢都係「一定唔會紅」、「睇個樣就知」。而我呢，就經常認定一啲歌星會紅，結果消聲匿跡。

（一睇就知，呢啲又係寫死人嘅題目，淨係做research都半日。所以，唔啱睇唔緊要，冇功都有勞，起碼都俾少少表示；唔該晒。）

喺八十年代嘅香港樂壇要站穩一席位，並唔係件容易嘅事。

七十年代以前，香港樂壇係國語歌嘅天下。潘秀瓊、潘迪華、姚蘇蓉、青山、崔萍、顧媚（忘不了 忘不了~），全部都係唱得之人；佢哋為香港樂壇定咗一個好高嘅標準。

到七十年代，粵語流行曲開始流行，由「粵語長片」裏面新馬仔、鄧寄塵、梁醒波、譚蘭卿嘅「灰諧滑稽」暗角走出嚟，上咗大檯。許冠傑、羅文、徐小鳳、葉麗儀、關正傑、仙杜拉、甄妮，個標準仍然係天咁高 — 你未必會認為，佢哋個個都係靚仔靚女，但相信冇人夠膽話佢哋唔唱得。

八十年代嘅標準，係譚詠麟同張國榮。論唱功，譚張同上述「前輩」，已經差咗一班波 — 譚詠麟以音域廣見稱，張國榮唱歌則感情豐富、有味道；論技巧，雖然兩人仍有所不及，但亦屬當年「頂班」之選。

喺「珠玉在前」嘅環境之下，八十年代入行嘅新星，其實面對嘅壓力同比較，唔會比而家呢個年代少。

於是，我哋就出咗一班曇花一現嘅歌手。

蔡立兒

鍾意蔡立兒，純粹係因為一首歌 — 《絕戀》。呢首歌當年紅到一個點，好多人都會大吉利是咁，希望發生一次咁淒美嘅絕戀。

常在霧裡燈孤單靠在墓前看著你的名字

假使再共你相見 只得冰冷舊照片

他朝再夢裡相見 也是仍舊那麼遠

但願天邊海角復見心未變

份詞係因葵嘅，算係難得你可以聽/睇得明佢寫緊乜嘅作品。呢期人人鬧緊陳詠謙，我覺得要鬧嘅排隊都未到佢 — 講爛，邊有人爛得過因葵？當年一句「陳東蘭茜後面站著慢熱電燈膽」，你陳詠謙投多兩次胎都未必填得出。

《絕戀》係第一首令我可以乖乖坐喺房、用半日時間、無限loop部walkman去聽譯晒成份結他cord譜、然後飯都唔食死練爛練都要練到個結他伴奏嘅歌；可想而知我有幾鍾意呢首歌。

如果你話我只不過係鍾意首歌，唔係鍾意蔡立兒，我冇異議。

近年，蔡立兒翻唱過《絕戀》。但係個人意見認為，無論編曲配樂同唱功，都唔及佢當年原唱咁好。

黃翊

黃翊係令我大跌眼鏡嘅一個，因為我以為佢紅梗。

當年嘅黃翊有一把好似譚詠麟嘅聲線，可能亦都因為咁，你可以聽得出，佢有意無意間，亦都模仿譚詠麟嘅唱腔。當年，唱「譚腔」嘅佼佼者，有已經上緊位嘅李克勤，同埋黃翊。

我最鍾意嘅，係佢嘅《最愛的妳》。唔知係巧合定有意，譚詠麟早年亦都有一首同名歌曲《最愛的妳》。

我與你看似曾渡過 千載不變愛之火

彷彿一生 早已註定 願陪伴著我

然後，黃翊喺毫無預警之下，消失於樂壇。後來睇返先知，原來係因為同黃寶欣（《酒杯敲鋼琴》嗰個）拍拖而被雪藏。論刻薄，香港娛樂圈同韓國冇兩樣，少少嘢就可以整死你。

聞說近年黃翊再出返嚟唱，我真心希望佢可以有啲成績；因為佢應得嘅。

甄楚倩

當無線嘅《新秀》獨步天下，一向鍾意抄無線嘅亞視亦都唔執輸，搞咗個「未來偶像爭霸戰」嚟頂無線；甄楚倩就係呢個比賽嘅產物。同屆出身嘅(即係第二屆），仲有曾航生同安德尊（你以為佢唱兒歌攞命？你聽過佢唱哥哥嘅《Stand Up》未？）。

甄楚倩靚唔靚見人見智，我就覺得佢幾ok嘅，樣同打扮都係當年好大路嘅「日系」。佢嘅聲線唱功都有啲似梅艷芳，但係風格上冇當年梅姐咁「前衛」。當年佢主唱改編自山口百惠《秋桜》嘅《深夜港灣》，至今仍然係我最愛嘅金曲之一。

長裙隨急風飛舞似浪漫 卻在別時人漸散

黑色絲巾 風中飄滿寂寞 盪入這港灣

隨霓虹千盞風裡我獨站 遠望渡輪隨浪去

身邊的呼呼北風 已經不感覺到冷 今晚最冷已是我心間

然後，唔知點解，佢唱唱吓就消失咗，據聞係拍拖嫁人之類；當年仲未有互聯網同google大神，呢啲傳聞好多時就不了了之，冇人會去深究（除咗《明周》記者）。

幾年後，佢走咗去拍三級片；以《刺馬》為藍本嘅 《滿清十大酷刑之赤裸凌遲》（即係咸濕版《投名狀》）我有睇過。對於我嚟講，同好多男人一樣，有個女星肯除衫俾你睇，梗係有殺錯冇放過；但同時，我亦都為佢可惜。

喺香港，唔紅走去除衫變紅，講嚟講去都係得葉玉卿一個；就算紅足咁多年嘅舒淇，都要著返衫先紅。甄楚倩當然亦走唔出呢個「定律」。

黎明詩

我認，當年我迷佢，係因為佢靚女。玉女還玉女，黎明詩係嗰啲，玉女得嚟間唔中都會著件小背心出嚟派吓事業線嘅女星。對於仍然喺男性賀爾蒙主導腦袋嘅年紀嘅我，呢啲好難抗拒。

認識黎明詩，係從佢嘅《停不了的愛》開始。同甄楚倩唔同，黎明詩聲線比較嬌嗲，走嘅亦都係玉女路線，啲歌少女味好濃。就好似呢首《全心愛我》咁：

去到兩個世界裡 還是在共聚

Love me with all of your heart 到死相愛

愛莫悔莫忘 盡你每秒 盡你一生

全部浪漫 全部愛我 像我心

With every beat of your heart

但係，我相信黎明詩最多人認識嘅演譯，係張立基《異性相吸》裏面嘅一段featuring rap：

真係嘥心機，日日送花嚟，點樣先心死？快啲返屋企！本小姐冇你咁冤氣，唔該你啦張立基！

呢幾句嘢，當日rap到街知巷聞。

然後，2004年，喺擺花街某紅酒鋪，我撞到黎明詩。唔止撞到，仲傾過偈，佢仲介紹咗支法國酒俾我。成熟咗、洗盡鉛華，成個人成件事都唔同咗。不過我唔太喜歡佢介紹嗰支酒，單寧太重，擺到變醋都仲係澀嘅。

曾航生

鍾意曾航生嘅原因，係因為佢有把同陳德彰好似嘅聲 — 呢啲係當年標準嘅DJ聲。我好鍾意聽電台節目（雖然多數係「華僑之聲」嘅重播），所以特別鍾意DJ聲。

曾航生最為人所熟悉嘅，係佢同何婉盈嗰首《再見亦是朋友》 — 標準K歌風格，再加一個玩食字玩足幾十年嘅歌名。但係我最鍾意嘅，係佢嘅《永遠幸福》。

沉醉相愛時候 絲絲暖意在流

從人群中尋覓到你 夢和人生一一擁有

讓浪漫做前奏 將溫馨延續

深情從雙手滲透 願你永遠幸福

然後，佢同DJ梁安琪（唔係人哋四奶）拍拖；然後，佢再冇唱歌；然後，某日我喺梁安琪嘅競選宣傳中，睇到「選一得二」嘅宣傳……

然後，我就只係聽見曾航生嘅負面新聞，主要係食軟飯同打女人，做佢女人真係永遠幸福；然後，就再沒然後。

Raidas

直至2019年嘅今日，我仍然唔知道，點解當年如日方中嘅Raidas會解散。呢個謎，同當年紅透半邊天嘅韓國組合「徐太志和孩子們」（ 서태지와 아이들 ）喺最紅嗰陣解散一樣，可以一齊列入「二十世紀最大謎團」之一。

一句「風格上有分歧」就解散？唔係好logical囉；你問吓「達明」？一個鍾意rock一個鍾意techno、分歧分歧咪又三不五時出返嚟開騷cap吓水！

Raidas有幾好聽？聽Raidas嘅專輯，係唔使fast forward飛歌㗎！一隻碟十首八首歌，首首都聽得吓，唔使點飛。

《春嬌救志明》玩過嘅（兼且玩得唔好）係《傳說》。但係個人最愛嘅Raidas歌曲，一定係《傾心》，堪稱「情歌之王」。

曾自問 樣子真太笨

曾自問 外表都不怎麼吸引

卻妄想跟你同行

請你 明白我已暗中因你傾心

人愈近 愈不敢發問

人愈近 愈不敢將我心拉近

我的心窩已下沉

心裡 留住了只有苦困

如何 在你心窗一角 朦朧呈現我的愛

縱是驟晴驟雨 儘管昏昏暗

祈求在你窗外徘徊 任這風吹雨打去

我仍然情願更甘心 不悔恨

歌詞形容緊嘅「愛」，喺呢個年代，叫「毒撚暗戀女神」。黃凱芹能夠將一段單思嘅愛，寫得咁有詩意咁冧，亦屬絕無僅有。一句「祈求在你窗外徘徊 任這風吹雨打去 我仍然情願更甘心 不悔恨」，當年都唔知幾多女就係咁忘記咗條仔「樣子真太笨」而受咗溝！

究竟係黃凱芹夠詩意，定係呢個年代嘅人完全缺乏想像力？呢啲留返你哋自己解答啦。

Raidas對香港流行樂壇嘅貢獻，除咗前後出過嘅三張半專輯（最後陳德彰出嗰隻新曲加精選，只能算半張）之外，仲有一樣，係我哋一直都受惠到而家嘅「貢獻」：

就係林夕。

林夕雖然唔係Raidas帶出道，但作為Raidas嘅專用詞人、包辦佢哋大部份嘅歌詞，林夕的確係因為Raidas而出名嘅（或者你可以話，係林夕令Raidas出名）。

小玉典珠釵 鉛華求長埋

祝君把新歡 乘龍投豪門

我要是變心有誰為我盡情罵

小玉休相迫 檀郎無忘情

三載失釵風 瑤台求重逢

我叫天搶地誰過問

庵中孤清清 長平難逃情

江山悲災損 流離仍重圓

我偶然與她見面亦覺甚疲倦

花燭映窺妝 難為郎情長

交杯飲砒霜 泉台諧盟鸞

我散心解悶誰作伴

淨係睇《傳說》呢幾句歌詞，你就可以睇到，林夕對粵劇劇本有幾熟悉。喺未有google嘅年代，要將《紫釵記》同《帝女花》兩大名劇撮入歌詞，仲要同現代文化糅合，所花嘅功力，並唔係中文根底淺嘅人可以做得到。

我覺得，即將開幕嘅「私處中心」（Xiqu Centre；唔係咁讀/譯嘅咩？）應該好好珍藏Raidas同林夕呢首傑作。

張立基

同呢篇文嘅其他歌手唔同，張立基當年之所以「紅」（如果算紅過的話），絕大部份嘅原因，係因為佢嘅勁歌熱舞。

（話時話，佢同甄楚倩真係有啲兄妹相。）

論歌藝，張立基只屬平平（其實譚耀文當年都係屬於「跳好過唱」呢個cat嘅歌手）；但論跳舞，佢就係典堂級。香港一向都缺乏「能歌善舞」嘅歌手；咁多年嚟，數嚟數去，就係得張國榮、張立基、杜德偉同埋郭富城呢幾個比較出眾。

《今夜你是否一人》、《Electric Girl》、《震撼》、同埋上文提過、改編自Paula Abdul嘅同名歌曲《異性相吸》（Opposites Attract），呢啲都係張立基又唱又跳嘅「首本戲」；當年亦都紅過吓。

慢歌？其實又唔係冇嘅，《盼你此刻奔向我》係佢比較hit嘅慢歌；《妳好嗎？！》係另外一首。但點講都好，佢嘅慢情歌點都唔夠佢啲舞曲咁hit。

從前是對是錯

無謂辨別 寂靜夜深交給你和我

為何放棄愛 放棄此刻這些夢

再這麼傻

盼你此刻奔向我

蔡楓華

呢個係我戥佢唔抵戥足卅年嘅歌星，沒有之一。

蔡楓華身形高大、眉清目秀、聲線沉厚，呢啲都係佢喺八十年代走紅嘅優勢。佢嘅唱腔略帶重鼻音，我有理由相信，早期嘅黎明（《無名份的浪漫》嗰期），的確有模仿過佢嘅唱腔。

仲有好多人認為，當年佢係因為妒忌張國榮，所以先講出嗰句「名句」。我心諗：你哋都黐鳩線嘅！當年，張國榮的確係稍稍紅過蔡楓華，但係兩者之間嘅距離，其實係有限之極，根本唔會構成呢種妒忌。

事實上，無線當年嘅「雪藏」，只不過係起咗個「帶頭」嘅作用，將佢嘅「當頭起」煞停。之後佢載浮載沉、最後沉到谷底，其實唔多唔少都係運氣再加上自作孽使然。

（當然亦要多謝壹傳媒系嘅報章雜誌，不遺餘力咁做大佢啲負面新聞。）

但無可否認，喺「白馬王子」嘅年代，蔡楓華的而且確有紅過，而且仲係幾紅。

有幾紅？紅到佢首《倩影》嘅MV，係由當年無線嘅當家花旦戚美珍演出。

遙望你倩影經過 看燈飾與夜色輝映

明亮眼眸裡一縷失落 令我眼光不禁追隨

凝視你步履多優美 發披肩在風中飄起

明亮眼眸裡憂鬱的夢 又似帶出一點傲氣

唯願你永遠不會失去 凝視你說話輕輕笑

隨著你進出於晚燈裡 願結識相相墮愛河

八十年代嘅詞，同而家嘅比較，最大嘅分別，在於「優雅」二字。

到而家，仲有好多比較年輕嘅朋友唔明，點解電視台嘅「雪藏」同「封殺」，可以整死一個歌手或者藝員。

因為八九十年代，香港就係得兩個電視台，亞視從來都「唔係波」，雖然後來有「有線電視」，但係佢哋喺娛樂圈全無影響力。如果無線唔捧你，或者唔俾你亮相佢哋嘅節目，作為歌星藝員，你都唔知點「入屋」 — 唔通靠電台同《明周》咩。

所以，電視喺香港娛樂史、以至香港歷史上，都係舉足輕重嘅。而睇電視亦都係垮代香港人嘅集體回憶之一，比任何嘢都重要。

唔信？你咪問吓楊岳橋囉！睇電視真係重要過立法會開會㗎！