寧可食無肉 不可居無Amazon

冇得買慘過冇得食

喺歐洲住、特別係德國，你可以冇樓，你可以冇車，你可以冇女，你甚至可以冇居留權（最多俾人遣返）；但係，你唔可以冇咗Amazon。

「吓？乜Amazon唔係書店嚟嘅咩？你要間書店做乜呀？」

唔好笑，香港人真係夠膽死唔知㗎！

我唔係講笑，香港人，講gadgets可能係全球最勁嘅；周街都新iPhone，個個都無限上網。但係一講到gadgets以外嘅IT嘢的話，香港人嘅思維，可能仲停留喺1968年。

「1968年有咩IT呀你老味！」

咪就係冇囉。喺2018年，竟然仲有人問我「喺booking.com訂酒店靠唔靠得住㗎？」你係我你會點答？

香港人就係咁可愛，開個支那寶上淘寶天貓買有毒化工染製嘅老翻時裝就好靠得住，去二百五十億美元資產嘅booking.com訂酒店就靠唔住。所以你哋啲錢拎晒去起港豬噢同埋填海，應該都好靠得住。

其實，Amazon又真係書店嚟嘅；起碼，佢哋真係靠喺網上賣書起家。

仲記得我第一次幫襯Amazon買書，係1997年嘅暑假。當年啱啱開始喺漢城教書嘅我，急需一本Concise Oxford English Dictionary。但係我搵遍漢城，竟然冇呢啲咁基本嘅工具書賣。號稱全韓國最大、位於光化門附近嘅「敎保文庫」（ 교보문고 / Kyobo Book Centre ）成萬呎嘅書店，竟然只得兩隻櫃嘅英文書；當然亦冇供應。

結果，Amazon救咗我一命。

然後，我同Amazon呢段關係，斷片十幾年 — 喺好似漢城同香港呢啲24x7都咁方便嘅城市，Amazon真係冇乜存活空間。

當我同老婆喺2010年移居德國之後，Amazon呢個名，從此就長駐生活當中、揮之不去。然後我發現，唔止係我，其他嘅亞洲或者北美移民都係咁。但凡非歐洲原居民，對Amazon嘅需求係超乎想像嘅。

因為對於非德國原居民嚟講，喺德國「鳩嗚」shopping，無論去商場定係網購，都係一個災難。

我哋必須承認，任何人喺未嚟過德國嘅情況下，對「德國人」其實係全無認識嘅。港豬最撚叻，就係喺FB每逢有德國嘅新聞，特別係政府或者麥克爾有關嘅，就加句「Heil Hitler」，仲要以為自己好撚醒好有見地；然後就係Oktoberfest。但除此之外，對德國或者德國人，可以話係零認知。

簡單嚟講，德國人無論係衣食住行，同地球上其他國家（特別係歐洲以外）嘅人，都非常唔同。亦即係話，我哋平時買開嘅嘢，喺德國嘅百貨公司或者網店，好大機會會冇得賣（柏林、漢堡、慕尼黑呢三個上百萬人口嘅城市除外）。

（舉個例：你唔會想買德律風根Telefunken或者根德Grundig嘅電視、Tristar嘅電飯煲、Kaufhof自家品牌嘅柒衫、Bugatti柒到冇朋友嘅鞋。你想買返啲係香港或者美國見慣見熟嘅品牌。）

喺呢啲情況下，Amazon就成為救星。

網上嘅華文媒體，我經常見到佢哋將Amazon形容為「網上零售商」或者「網上百貨商店」，其實都不盡正確。Amazon其實係屬於Fulfillment Distributor（佢哋個program名為Fulfillment By Amazon/FBA），中文有個好怪雞嘅譯名，叫「履行經銷商」。

用句老香港嘅說話嚟形容，Amazon其實係「通天經紀」。

Amazon本身冇乜點「責貨」（經紀又點會同你坐貨？），自家品牌「AmazonBasics」亦只屬少數。佢嘅主要生意模式，係提供物流、貨倉、代收貨款之類嘅fulfillment services。充其量有啲似呢個年代嘅百貨公司模式（但現代嘅百貨公司更似一個包租公）；用「零售商」去形容，未能反映現實嘅全部。

喺德國，Amazon嘅「貨主」，除咗一眾嘅本土零售商或者品牌之外，其餘嘅，就係好多大大小小嘅Importer of Record （IOR）；我都算係其中之一。

IOR可以係貨主（Owner），可以係承銷人（Consignee），亦可以係清關代理（Customs Broker）；甚至可以同時扮演晒上述所有角色。

IOR嘅主要工作，係從外地入口貨物、然後安排物流、提供EORI（Economic Operators’ Registration and Identification number）同埋清關，最後將貨物送到Amazon指定嘅倉庫；禮成。所有付運中途嘅風險，如車船嘅意外、貨品清關嘅問題、貨品嘅銷售情況等等，全部由IOR負責；Amazon可以話係零風險。

（德國係歐盟中入口管制最嚴嘅國家，我住嘅Regensburg海關就係全德國最嚴嘅海關；你哋可以想像到，我呢個IOR係頭獎連特別號碼都中埋）

呢啲咁筍嘅生意（對Amazon而言），如果大家知到邊度有得做，不妨預埋我。

Amazon喺德國嘅market positioning清楚不過：佢要做德國、荷蘭、波蘭同捷克嘅One Stop Shopping Agent（上述四國嘅Amazon都係由德國統籌）。

喺德國網購伏味好濃，稍一不慎就會成為伏爾泰個細佬（伏已中；個gag好爛我知）。唔係話德國網店好鍾意呃人；事實上，德國人做生意一般都算老老實實。

德國好多網店、甚至freelancer（包括本文作者），其實都係由一啲個人公司（Eingetragener Kaufmann/e. Kfm）經營。個人公司好處係小本經營、街坊生意，絕對係本土經濟嘅代表；唔好處係，由於小本經營，好多時呢啲網店都係採取「代購」模式，收咗錢先訂貨；如非熱賣item，一般都唔會「責貨」。

我上個月喺呢啲網店度買咗件Jack Wolfskin嘅羽毧（RDS認證產品，唔會虐畜），結果足足等咗兩個星期先到貨。網購要兩個星期先有貨，喺呢個秒秒鐘幾廿萬上落嘅互聯網世界，係死罪。

另外一個伏，係價錢。

德國人出名孤鳩寒（猶太級數）。喺德國撈得最掂嘅網站，係格價網。一系列嘅check24.de（格晒所有嘢，包括保險、電訊、電力、銀行息口手續費、信用卡年費利率etc）、旅遊有關嘅ab-in-den-urlaub.de（呢個夠狠，係check其他格價網嘅網）、購物專用嘅idealo.de等等。總之屙篤尿都要格兩次渣（腎石都係礦物嚟㗎）；you know, just in case。

問題係，好多時呢類格價網都係未計郵費同埋credit card/PayPal嘅surcharge嘅（德國網購/購物流行EC Karte同埋GiroPay，即係EPS咁上下，信用卡喺德國其實唔太受歡迎）；計埋又唔係嗰回事。

幫襯Amazon，如果你係Amazon Prime會員的話，就連呢啲都唔使煩。每個月7.99歐元會費，只要你買Amazon Prime嘅貨品（即係大部份），咁就免郵費。7.99歐大約等於兩次購物嘅郵費，你嗰個月買兩次打和、三次就有賺；除笨有精。唔怪得Amazon Prime全球有一億付費會員（medium很想要吧？）。

Amazon嘅另外一個最新吸客殺著（暫時唔係全部account都得，你要成為Prime會員兼活躍用戶一年先有），就係佢旗下嘅gadgets（Kindle、Kindle Fire、Echo等等）有免息分期。

唔使申請，亦唔使check credit；只要你係符合上述條件嘅Prime會員，就可以喺check out時選擇五個月分期。

我上次喺Prime Day嗰陣，買咗部Kindle Fire 8 HD；由原價99.99歐，減到64.99歐，仲有五個月分期；真係抵到爛。

順帶一提：Amazon Prime Day係另一個繼美國嘅Black Friday（感恩節後嗰個星期五）同Cyber Monday（Black Friday之後嘅星期一）之外，你唔會想錯過嘅網購event。

Amazon Prime Day買嘢平就梗㗎啦，有幾平先？

平到每年Amazon Prime Day都搞到全球互聯網大塞車，好似俾人DDoS攻擊咁，夠厲害未？

大家如果有喺Amazon買過嘢的話，就會知道，佢嘅廣告真係無遠弗屆。只要有network，佢就可以按你嘅cookie嚟推你會「有興趣」嘅產品宣傳俾你。

Amazon推行嘅，係一種叫「Performance-led Data Driven Marketing」。簡單嚟講，呢種孖屐亭顧名思義，係以客戶數據推動嘅marketing campaign。喺你同意同Amazon分享你某啲嘅個人資料之後，佢哋會開始從你嘅瀏覽器資訊，去分析你嘅購買行為。

Amazon嘅marketer就會因應你嘅購買行為，去推有關嘅產品或者特價campaign俾你，刺激購買意慾。

作為一個過期marketing人，我會話你聽，呢類咁嘅Performance-led Data Driven Marketing，對公司同老細嚟講，係高效率嘅marketing strategy；但對於marketing執行人員嚟講，係個惡夢。

有別於以往零售業嘅marketing campaign、無論KPI同ROI都係以一個週末為單位；「P-lDDM」係以分鐘為單位，客戶對有關campaign嘅反應，會透過click rate或者實時銷售數字之類嘅data，即時回傳到marketer嘅電腦裏面。情況就好似股票嘅「大利市機」一樣，不過你睇嘅唔係股價，係呢個marketing campaign嘅實時數據。

以往「風水佬呃你十年八年，marketing同事呃你一個weekend」嘅歌仔冇得唱喇，喺P-lDDM之下，嗰啲同老細吹到天花龍鳳、天上有地下無嘅marketing campaign係龍係蛇，幾分鐘就知。作為P-lDDM嘅操盤人，每次都要準備定好多plan B（或者係plan Z），去應付突如其來嘅市場動態。

俾著我咁樣望住部機、然後老細或者貴客係咁電話響，真係命都短幾年囉。

利申：本文作者冇收Amazon錢寫嘢，亦冇持有任何Amazon嘅股份。