人寫我又寫之：我最喜愛的十套電影

雖然，我比較想寫「我最喜愛的十套日本AV」

其實想寫呢個題目好耐，但非常唔鍾意Facebook嗰種chain letter式嘅傳染病tag人法，所以都係自己柄埋一二角喺Medium寫。

排名絕對分先後，但純粹個人意見。如果我呢十套同你嗰十套有出入，我真係恭喜你呀，你同我有唔同嘅taste。

呀！有劇透喎！不過如果連呢十套戲你都仲要講「唔好劇透」的話，電影應該唔係好適合你，都係返出去睇《黃巴士》啦。

《教父續集》（The Godfather Part II）

好多人都寫《教父》第一集，我都非常鍾意第一集。但係《教父續集》多咗一份「高處不勝寒」嘅孤獨，同埋「騎虎難下」嘅無奈。特別係電影末段，Al Neri喺Lake Tahoe嘅小艇上面、向Fredo嘅後腦開鎗；然後鏡頭一轉、見到Michael坐喺別墅入面嗰種孤獨同埋寂寞嘅感覺。

如果想翻睇的話，建議大家選購哥普拉2008年嘅復修版。同之前DVD完全唔同嘅母片、人手逐格復修、值得珍藏。用4K電視睇呢個版本，你會發現，原來黑色都可以有唔同層次。

《甜蜜蜜》

如果要用兩個字嚟形容呢套戲，我覺得會係「唏噓」。

睇呢套戲嗰陣係1996年。我睇完之後同自己講，好似黎小軍同李翹呢啲咁蕩氣迴腸嘅愛情故事，千其唔好發生喺我身上；拜託，唔該晒。點知，好嘅唔靈醜嘅靈……

《月黑高飛》（The Shawshank Redemption）

如果仍然有人唔明白咩叫「唔怕生壞命、最怕改壞名」的話，請參考呢套戲嘅港版譯名：「月黑高飛」呢個譯名絕對係令你唔想入場嘅最主要原因。

如果你問我「何為自由」的話，我第一個諗到嘅畫面，係Tim Robins爬屎渠離開監獄、喺小溪除低佢件衫、然後向天「擁抱」雨點嘅一幕。但係呢套戲最令我印像深刻嘅，係Morgan Freeman呢句對白：「These walls are funny. First you hate ’em, then you get used to ’em. After long enough, you get so you depend on ’em. That’s ‘institutionalized.’」

我哋又何嘗唔係institutionalize緊？

《蝙蝠俠 — 黑夜之神》（The Dark Knight）

荷李活一向都以創造「Super Hero」而聞名。然而，呢套戲正正就係打住「超級英雄」嘅旗幟嚟「反英雄」。小丑固然反英雄，就連喺呢套戲裏面嘅蝙蝠俠，其實都好有反英雄嘅意味。

好多人都喜歡小丑喺呢套戲裏面嘅「金句」；但我最想quote嘅，係Alfred呢句說話：「Endure, Master Wayne. Take it. They’ll hate you for it, but that’s the point of Batman, he can be the outcast. He can make the choice that no one else can make, the right choice.」

當我每次見到飯民班老海鮮死攬住個位唔肯放嗰陣，我都諗起呢句：「You either die a hero, or live long enough to see yourself become the villain.」

《雷霆救兵》（Saving Private Ryan）

除咗豆腐火腩飯之外，呢套戲係對「男人的浪漫」最準確嘅傳繹。一班男人，為咗命令，為咗救一個同佢哋風馬牛不相及嘅人，結果大部份人都犧牲性命。最後，Captain Miller喺臨終前對Private Ryan嘅一句：「Earn this, earn it!」唔係男人的浪漫係咩？

係愛呀！（誤）

除此之外，呢套戲嘅混音效果真係一流。如果史匹堡將套戲嘅鎗炮爆炸聲出OST的話，我諗我會買嚟搭車或者開會聽。

《The Threads》

呢套應該係我呢十套戲當中，最少人認識嘅一套。嚴格嚟講，呢套甚至唔算「電影」。BBC喺1984年，以四十萬鎊嘅低成本，拍咗呢套講述英國喺核戰前後嘅電視電影；令我相信，荷李活所有有關核戰嘅電影，其實都係對人類過份樂觀。真正嘅核戰，比我哋所能想像到嘅，恐怖百倍。

點恐怖法呢？電影其中一段，講述核戰爆發後十年，英國全境嘅人口降至四百萬至千一萬人，生活處於中世紀水平。先唔好去講點樣重建英國，核戰後十幾年，你嘅下一代，連母語都唔識講/講唔掂。

《再見螢火蟲》（火垂るの墓）

我係一個睇《鐵達尼號》會睇到忍唔住笑嘅人。卅年都嚟緊頭，我從來未試過睇完《再見螢火蟲》而唔喊；你呢？

《JSA安全地帶》（공동경비구역 JSA）

大部份人睇呢套戲，都會強調佢嘅「手足之情」、「分裂之痛」；我同意大部份人嘅睇法。不過，我想講嘅，係吳中士（宋康昊）嘅一句說話：

「光石，為何這麼早逝？」（광석이는 왜 그렇게 일찍 죽었다니 ?）

金光石係南韓嘅一個傳奇；而《JSA安全地帶》就係將呢個傳奇，深深咁刻入每一個未能及身而見呢個傳奇嘅南韓年青人心中。呢套戲之後，冇任何南韓服過兵役嘅人，未唱過金光石嘅《이등병의 편지 》（二等兵的信）。

之前見 Jeromy-Yu von 寰雨膠事錄寫過「未去過阿根廷，都不要說自己吃過牛」嘅語錄；我而家加多一句：「唔知道『光石，為何這麼早逝』呢句話嘅真正含意，唔好話自己係韓國KOL」。

利申：我唔係韓國KOL。

《玻璃之城》

早幾日，同 深霧輕輕咁討論過呢套戲。大家都同意，呢套戲並不完美；大家之所以鍾意《玻璃之城》，完全係因為呢套戲拍出嚟嘅「情懷」。

作為一個「番書仔」，呢套戲係少數令我恨入「Kong U」嘅原因之一。「Ricci仔」、「何東妹」、「大仙」、「搶Gong」、「中山階」、「荷花池」、「保釣」，呢啲都係好鬼浪漫嘅「港英情懷」。係咪戀殖？Who fucking cares？

當然，後來我溝過一件何東妹；然後幻想破滅，乜嘢fantasy都冇晒……

《色，戒》

每次當我見到啲大愛左膠，搞埋啲咩「快樂抗爭」嗰陣，我就即時諗起，王佳芝俾易先生扑嘅任何一幕戲。

真㗎，唔係唔俾你抗爭，我覺得「左膠」同「極右法西斯」應該各有各抗爭。當一個社會左右都同時發聲嗰陣，人民先至真正幸福。但係，可唔可以唔好抗爭得咁膠？「革命」固然「不是請客食飯」，同時地亦都唔係「暑期作業」；一個唔覺意玩大咗，會死人㗎。