老舉過年

是咁的，「老舉過年」係廣東話歇後語。老舉者，性工作者也。香港人做生意興喺過年時候「埋年」結算，睇吓今年獲利多少。性工作者「埋年」，自然要計一下今年嘅恩客數字；故「老舉過年」即係「算鳩數」。

講就咁講，2019年對香港人嚟講，無論如何都冇可能算鳩數囉！

之前我已經講過，我唔會喺呢篇回顧度寫記敘文，我相信喺嚟緊嘅一個星期內，無論Medium定Matters，都必定充斥回顧記敘文，所以少我一篇唔少喇。唔寫記敘文，咁不如寫吓我諗緊乜啦。

首先，亦都係最緊要嘅：我真係要多謝呢半年以嚟，身體力行出嚟參加時代革命、向港共說不嘅香港人，多謝晒你哋！

因為，你俾我發多幾次夢，我都估唔到，大家可以堅持到今時今日。坦白講，我一直以為，過咗二百萬人遊行，大家就會側側膊「階段勝利」、然後照常返工返學去旅行打卡。港豬嘅嘢，大家都知，肯喺網上貼一句「復仇」已經好撚激啦嘛。但係今次，大家竟然堅守咗半年，而且仲未有棄勢；實在難得。

香港人從來都唔識珍惜任何嘢，個個恃住自己有so-called嘅critical thinking（其實九成以上都只不過係屎撚忽鬼），任何人事物都喜歡批評得體無完膚，然後仲覺得自己好有point、「鬧你即係教精你」。到真係有事嗰陣，就個個死老母咁喊驚、「點解會搞成咁」、「可唔可以變返以前咁」。今次時代革命嘅少數「好處」之一，就係喜見大家開始懂得珍惜身邊眼前嘅人事物，懂得去保護佢哋。亦都開始意識到，個人利益適當嘅犧牲在所難免。

時代革命去到呢個階段，基本上冇任何人可以預計到結果 — 我睇咗大大小小KOL N篇嘅分析，恕我唔客氣（幾時客氣過呢又）講句：全部鳩噏。

點解？因為「The Guns of August效應」（各位國際關係磚家唔好同我講未睇過呢本書咁驚嚇喎） — 第一次世界大戰係人類史上第一場牽連全球嘅「總體戰爭」，超過四千萬人死亡。戰爭開始時，歐洲列強仍然以拿破崙時代嘅國際關係同戰略思維去制定策略、企圖透過幾場關鍵戰役去取得勝利。問題係，喺1914年，無論科技、火力、破壞力、經濟能力、貿易、國際政治等等嘅所有嘢，同一百年前經已好唔同。結果喺錯誤嘅估算上面制定嘅錯誤策略，令全球捲入一場史無前例嘅浩劫。而之後以同樣思維去「結束」呢場戰爭，就埋下第二次世界大戰嘅火藥引。

現在，大家仍然企圖以傳統嘅觀點同思維，去看待呢一場前所未有嘅革命；大家仍然覺得中共過往係點點點、老套路係點點點、香港嘅地位係點點點、香港人會點點點、所以時代革命最後會點點點……

問題係，呢堆「點點點」基本上都係建基於錯誤嘅估算 — 因為目前中共黨內嘅形勢、國內嘅形勢、香港嘅形勢、中港兩地嘅國際形勢、經濟形勢、國際間嘅博弈互動，所有呢啲決定性嘅因素，其實都係前所未有、之前未見過。如果基於過往嘅經驗去計算一啲未見過嘅嘢，老老實實，有幾準大家自己心裏有數。

好簡單嘅實例：好多人覺得，香港一亂，中共就會出老解，於是就會「攬炒」、被國際孤立。點解？當年六四後咪就係咁囉！但事實上，「時革」去到而家，經已遠遠超越咗香港開埠以嚟發生過嘅任何政治事件（未超越香港淪陷囉）。咁耐以嚟，老解除咗出嚟掃過地之外，完全未有動員嘅跡象；大家渴望嘅攬炒畫面冇出現過。但係，係咪咁就代表，中國嘅武裝部隊，從來未介入香港事務？係咪之前大家都預咗，中國公安武警，會靜雞雞混入香港喬裝警察執法殺人？

所以，冇人知道時代革命會點樣延續落去，ok？

喺過去半年，香港人最了不起嘅，係打咗一場前所未見嘅國際輿論戰。喺半年內，能夠令美國國會通過《香港法》，然後仲陸續有其他國家跟隨，呢啲都係一項成就 — 可憐吓南蘇丹、索馬里、盧旺達、敘利亞等等國家，有啲打咗二三十年、打到差啲冚國剷都未有人肯多望半眼呀陰公豬！五大訴求？人哋一大訴求咋：我唔撚想死呀！

只不過，如果你認真睇一睇半年來嘅成功的話，你唔難發現，當中埋藏咗日後失敗嘅基因。

首先，亦都係最重要嘅，係香港人看待「國際戰線」嘅態度。

直至今時今日，如果你有觀察一下身邊嘅泛黃朋友喺FB嘅態度，不難發現，其實仲有為數唔少嘅人，心目中嘅「國際戰線」，係自己除咗簽聯署同retweet之外，就乜都唔使做，然後就等美國為首嘅歐美國家，代香港人去同中共打一場proxy war。成功令中共屈服的話，咁香港就有民主自由+五大訴求。

香港人數口一向精，不過係想撚創咗個心。

其實所謂嘅「國際戰線」，就等於戰場上嘅「Suppressive Fire」，或曰「Covering Fire」 — 我知大家都未受過軍事訓練，但戰爭片都總睇過吓啩？當Captain Miller或者Captain Winters叫一聲Covering Fire，所有士兵就會向對方猛烈開火，令對方士兵動彈不能、個個要低頭保命，然後我方突擊士兵就可以喺火力掩護下，向對方陣地進攻；此為「壓制性火力」。Suppressive Fire雖然兇猛，但甚少可以將對方軍力全殲 — 人哋風冚咁掃射緊你呀，你係咪戇鳩到伸個頭出嚟中彈先？！

留意到上段文字中嘅「然後我方突擊士兵就可以喺火力掩護下，向對方陣地進攻」嘛？冇錯，Suppressive Fire只能提供協助，真正嘅勝利，仍然有賴我方嘅進攻。「國際戰線」亦都一樣，國際可以提供火力掩護，但真正要取得勝利，我方仍然要諗辦法進攻，唔係齋等「國際戰線」去幫你爭取五大訴求。

然後，喺美國國會通過咗《香港法》、大家「階段勝利」咗之後，就開始迷信任何事都可以用相同方法去爭取；呢種諗法直接引至國際戰線迷失方向。大家只係成為咗TwitterTwat、每日去領取當日嘅twitter任務，至於點解要tweet呢堆嘢、tweet完有乜作為，其實冇乜人會諗多少少。

點迷失方向？家陣香港個個都一窩蜂去寫各種語言嘅「傷痕文學」，賣身葬父學做國際苦主、然後就有理冇理轉貼過去Twitter，覺得咁樣，歐美社會就會好同情你、個個都喊濕N包紙巾，然後幫你哋代打proxy war。於是乎，每個週末「開拖日」，大家就努力去放大黑警嘅警暴，然後譯成六十七國語言，響徹雲霄咁同全世界講：「你睇我嘅幾慘豬！痛痛呀！」

呢種唔多唔少都係一種圍爐取暖嘅方式，無可厚非。

問題係，鬥慘呢樣嘢有個先天缺陷，就係心理上嘅適應能力 — 今日我哋見到仆街黑警扭斷前線巴隻手，大家覺得好慘；聽日就要扭斷兩隻手大家先覺得有啲料到。幾年前「雨革」清場嗰陣，大家對警察抬示威者離場嘅手段非常不滿；如果嚟緊有集會，警察唔再出TG唔出椒，用返抬人走嘅手段的話，大家就會覺得佢哋「有進步」。動作一樣，但標準已經唔同，因為適應咗。

其實喺外國睇香港新聞嘅人，亦都會受同樣效應影響，慢慢會覺得，「打來打去咪又係咁，有幾慘呀」、「又唔係大屠殺」。坦白講，外國都分黃藍，時革經已發生咗超過半年，要知嘅人晨早知，唔想知嘅人你迫佢睇佢都只會繼續扮唔知。爭取外國大多數人認同我哋嘅理念，從來都唔應該係真正嘅agenda — 唔好真係戇鳩到，覺得人哋一個ordinary citizen會為咗你向議員同政府施壓囉。喺H.R.3289投贊成票嘅兩院議員，有幾多個真係因為普通選民嘅施壓而投票？唔好玩啦，你真係仲信係聖誕老人放禮物入床頭隻襪度呀?

更何況，講鬥慘，我哋又點夠喺國際間「感情行乞」數十載、經常以國際苦主自居嘅中國玩？人哋一單南京大屠殺都食足幾十年老本、屈咗日本幾十億啦！唔講呢樣，自五十年代初韓戰爆發、國際對中國實施制裁、藥物禁運、國內大饑荒，中國都仍然捱得過。而家啲拘拘黑名單，對佢哋嚟講真係咁恐怖咩？充公咗啲海外貪贓咪再刮過民脂民膏囉！中國咁大，一人屈兩蚊都成廿幾卅億啦！冤枉嚟瘟疫去，從來都係大自然定律。

唔好誤會，我絕對唔係覺得大家鳩做冇用，事實上，大家嘅「傷痕文學」，的確令到外國關注香港嘅事態發展，最後促成美國《香港法》嘅通過，應記一功。而家進入另外一個stage、打另外一隻大佬，大家係咪應該諗吓，用啲另外嘅方法再下一城？

2020年係美國嘅選舉年。2月3日Iowa Caucus、2月11日New Hampshire Primary，選戰即將全面展開。老實講，直到呢一刻，我仍然睇唔到Donald Trump嘅彈劾，有任何機會可以過到參議院，佢尋求連任嘅呼聲仍然非常高。至於民主黨，十幾個「小矮人」，仍然未有任何一個有鐵定嘅勝算，局勢仍然未明朗。

喺美國，政黨輪替除咗係白宮換個主人之外，政策嘅連貫性同延續亦都係另一大uncertainty 。對比起共和黨嘅保守勢力，美國對香港政策嘅最大難題，其實係2021年1月20日，某個民主黨員喺國會西翼平台宣誓入主白宮。點解？因為大愛liberal左膠對中國嘅綏靖，遠比共和黨恐怖。如果現任美國總統仍然係奧巴馬的話，你哋發夢都唔使指意《香港法》可以咁快咁順攤就過到。Nancy Pelosi？一個偶然而已。白宮主人係唔係對家，Madam Speaker個取態會好唔同。

新任總統要叫停執行《香港法》有幾難？一張Executive Order。如果Bernie Sanders嗰日風濕發作，咁簽個名都應該有啲難度嘅。

大家如果想延續國際戰線、特別係美國戰線，其實可以考慮做吓呢樣嘢：用各種唔同嘅渠道、文字、製造輿論，令到各個總統候選人candidate，喺嚟緊嘅初選、黨團會議、造勢大會、辯論大會、甚至全國大會等等嘅場合，就外交政策發表方針嗰陣，都要就對華同對港政策表態，令到延續H.R.3289嘅落實執行，成為佢哋嘅競選承諾。同時亦都要一眾侯選人wannabes簡單闡述一下，日後對華對港政策嘅明細，例如如果中共公然撕毀《中英聯合聲明》，咁佢哋會有啲乜嘢相應行動嚟抵制？會唔會取消《美國－香港政策法》？唔會的話咁會點處理？（簡單講個大方向嚟聽吓都好啩）

對華政策係美國外交政策嘅一個重要議題，候選人candidate唔可能避得過呢個質詢。剩低落嚟要諗嘅，就係點樣攝埋香港呢個agenda入去，要佢哋表態。只有喺紅藍兩黨都承諾入主白宮後，仍然會延續對港政策，香港先至有機會爭取到任何嘢；否則，當國際鎂光燈過後，香港只有死路一條。

細節上點樣去做呢樣嘢，仍然有好多嘅方法同討論空間，但我覺得呢個係時代革命嘅喺未來一年「國際戰線」嘅大方向之一，而唔係見到任何金髮藍眼嘅人，都挖個傷口出嚟喊驚。

揭發港共黑警嘅殘暴手段幾時都係正確同有用，只不過target audience係邊個、揭發之後嘅目的係點，大家應該好好討論一下。

講完公，講私。

時代革命除咗影響到住喺香港嘅人之外，連我呢個喬居海外已久嘅人都受到直接影響。我今年嘅專題文章，有半年時間因為時革嘅影響而全面停頓。

坦白講，我唔敢冒險喺大家抗爭得火紅火綠嘅日子、如七二一、八三一等等，去刊出我寫一啲無關痛癢嘅專題文章，而當中好大機會係同吃喝玩樂或者嗜好有關。我自己本身，都unfollow咗某幾個喺整場運動中從未表態、但繼續吃喝玩樂嘅文友 — 你唔關心都算，同理心總要有啩？

《中環遊戲》就係喺個咁嘅社會狀態下誕生。其實當日我都有問我自己：究竟我仲應唔應用繼續寫？而家唔寫，咁又等到幾時呢？

小說我繼續連載，但亦都因為極端嘅事態而暫停過數次。畢竟人非草木，見到大家受壓迫，縱使唔可以同大家physically一齊面對，停一停表達吓心意，其實都非常應份。

喺嚟緊嘅日子，我計劃喺一月份內，完成《中環》嘅連載。喺剩餘嘅劇情入面，我仲有適量嘅炸彈要引爆，劇情雖然唔會太多plot twist，但亦一定唔會悶，請大家繼續留意。

喺《中環》完結後，當然就如我之前所講，重頭戲《都是我們的日子》登場。喺之前嘅《夜信》，多謝大家踴躍發言。經過考慮後，我決定喺開始連載之時，繼續維持每週兩篇小說嘅進度 — 起碼第一個月會維持，再睇情況決定會唔會減慢。

要重新走過嗰三年嘅路，對我嚟講，痛苦係必然。只不過，究竟係每個星期痛兩次、痛八九個月，定係每個星期痛一次、痛足年半，我諗我要試過先知自己嘅承受能力。

（金銀美你睇到呢段嘢的話，保佑吓我好唔好？）

而家只差嘅，就係我完成《中環》後，究竟會唔會小休一陣。坦白講，未有定案，主要視乎喺未來四五個星期，《都》嘅儲稿進度。目前嚟講，只係寫咗個prelude，進度未如人意。

講開《都是我們的日子》，喺未來嘅一段日子，我都會喺唔同嘅欄目，寫一啲有關嘅嘢，嚟幫大家warm up。其中應該會對韓國元祖女團《Fin.K.L》有唔少嘅著墨，因為佢哋會喺《都是我們的日子》，起骨幹嘅作用。至於點解會係咁？大家就要留意吓我點講故仔。

經過咗咁多輯小說，大家應該對我講故仔嘅功力有啲信心啩？

都係嗰句：大家留意吓啦，就算故仔你未必likey，資訊性都應該幾夠嘅。

祝大家聖誕快樂！五大訴求，缺一不可！

本週《中環遊戲》免費文章：

中環遊戲（50）雙劍合璧

其他免費文章：

IF夜信（ 사랑하다 밤편지 ）KW51準備收爐！

最近有文友反映，用「IF」呢個名，好難search到我嘅文章。所以，建議大家使用我嘅domain name 「@herrfung」 去search，比較容易搵到我嘅文章。