IF

小說、隨想、散文,廣東話寫作。Medium長篇小說 《當首爾仍是叫漢城的那些年》、《北角演義》、《初雪》、《中環遊戲》作者。 https://medium.com/@herrfung 、 https://t.me/ifpush

都是我們的Fin.K.L( 5 회 )單飛歲月(下)

Fin.K.L嘅忠實fans都知道,Fin.K.L嘅真正隊長,係玉珠鉉,唔係李孝利;呢樣嘢連孝利自己都無從否認。

先從外表講,珠鉉「神高神大」,非常具備一個「姐姐」、「隊長」應有嘅件頭。五呎七八兼大咪,單係呢個份量,嬌小嘅孝利甚難匹敵。加上孝利性格內向 — 雖然好難去相信,一個性感女神會性格內向,但呢個確實係事實,孝利某程度上仲摺過宅女。試問一個內向嘅十九歲少女,又點樣去照顧三個來自唔同背景嘅「妹妹」?

相反,珠鉉比較外向,亦係人際關係比較好嘅一個,從佢日後喺演藝界相識滿天下呢一點嚟睇,佢嘅人緣的確比孝利好好多(孝利喺圈中,就係得BoA同張弼順兩個比較好嘅朋友)。亦正因為如此,所以無論係Fin.K.L年代、定係日後單飛,珠鉉、李真、宥利永遠係一個團體,而孝利同其餘三人永遠格格不入。

但事實係咪咁呢?

唔係咩秘密:雖然近年有所收斂,但年輕時嘅玉珠鉉脾氣暴躁、氣焰亦非常大。好多同佢合作過嘅人,其實都受佢唔少氣。某次珠鉉同孝利上清談節目嗰陣,孝利就踢爆佢:喺Fin.K.L時代,某次佢哋嘅經理人同珠鉉發生爭執,結果珠鉉將佢趕落車、然後自行開車離開。呢件事令珠鉉自己都耿耿於懷,覺得自己太過份。後來喺《Camping Club》嘅安排下,該經理人終於同珠鉉再次見面,並接受道歉。

作為佢嘅同團姊妹,又點會唔知珠鉉嘅性格?所以,包括孝利在內,三個女仔對珠鉉親還親(連孝利都承認珠鉉同佢感情最好),但對於呢位de facto隊長嘅脾氣都避忌三分。喺《Camping Club》其中一站,孝利就曾經即興扮高中生「𢭃」珠鉉,結果珠鉉一喝,孝利好自然後退兩步 — 呢啲自然反應好難fake到。

除此之外,孝利、李真、宥利三個有個小「習慣」,就係鍾意搞對方「後面」;每次當是但一個趷起屎忽嗰陣,都好難避免「後庭花劫」,就算喺綜藝節目佢哋亦都會照隊如儀,特別係籮柚比較豐滿嘅孝利更從來不能倖免(因為佢係始作俑者)。但睇咗咁耐,大家從未見過珠鉉「遇襲」,可見佢哋雖然不改貪玩,但仍然知道個死字點寫。

唔好搞我後面.gif

珠鉉脾氣臭、感情亦豐富。《Camping Club》開車五分鐘,四個女仔啱啱開著部音響播自己嘅成名作,珠鉉已經搶先出眼淚。速度之快,連孝利都忍唔住笑佢一句:你更年期呀?

自後嘅七日六夜camping,以及日後嘅演唱會排練同錄音,都以佢嘅眼淚最多。多到一個地步,佢自己都不禁自問:我做乜成日喊咁丟架?!


喺開始寫《都是我們的Fin.K.L》嗰陣,我提及過,當日以一曲《Hero》贏得歌唱比賽嘅玉珠鉉,其實對入娛樂圈做偶像嘅興趣唔大。喺當時已經係非池中物嘅佢,根本志不在此。佢甚至對當年想簽佢嘅DSP創辦人李皓延表明,佢唔想入女團做偶像歌手。

作為娛樂公司嘅負責人,我相信呢類說話都應該聽唔少。個個都話唔想入行、「玩票性質」、「即管試吓」,個個其實都恨成名恨到出面。只不過,玉珠鉉係真正例外嘅一個 — 冇錯,佢最後的確入咗女團、做咗偶像歌手。但當佢走紅、有選擇餘地之後,佢就選擇自己想行嘅路 — 音樂劇。

承接前文有關佢推出瑜珈DVD同開瑜珈學院嘅同時,珠鉉亦都開始佢嘅音樂劇之路。其實佢喺之前推出嘅兩隻單飛專輯,成績亦都唔差,特別係第一隻個人專輯嘅主打歌《亂》( 난 / Nan ),受歡迎程度不下於任何Fin.K.L嘅歌。但似乎,珠鉉志不在此。

珠鉉嘅天賦好高,相信佢自己唔會唔知。韓國嘅娛樂圈,無論你撈得幾掂,先天條件唔會改變,呢個都係一個非常難「久留」嘅小圈子。與其苦苦掙扎做一個singer,點解唔索性發揮自己嘅talent,做一個真正嘅Diva、Prima Donna?

Singer係娛樂圈,Diva同Prima Donna係文化界,大家嘅audience唔同,地位亦都唔同。

於是,由05年開始,玉珠鉉就主力參演音樂劇。佢嘅debut演出,係《Aida》。十五年日子,珠鉉參演音樂劇無數,幾乎所有喺韓國公演嘅名劇,都有佢嘅蹤影。《Aida》、《Chicago》、《Cats》、《Sweeney Todd》,全部都賣過滿堂紅;特別係《REBECCA》,自2013年公映到而家,已經演出咗超過200場。

成績雖然婓然,但珠鉉為「文化界」所接受嘅日子,仍然一推再推。好多自命為「文化人」嘅觀眾(a.k.a. 屎忽鬼),仍然否定玉珠鉉嘅努力,覺得佢係女團偶像出身,唔應該亦冇資格屬於文化界、亦冇可能成為真正嘅Diva。

如果唔係南韓人,你會以為呢班講出身論嘅人係共產黨員。

最令珠鉉氣結嘅,係連自己媽媽都「睇小」自己嘅成就。喺《Camping Club》,佢就同孝利講過,玉媽媽將珠鉉同孝利比較,令到佢好傷心同扯火:

「我從來冇妒忌姐姐(孝利)嘅成就,我覺得我自己好努力、亦都做得唔錯。但每次我媽媽將我同姐姐比較、然後話我『點解唔學吓孝利咁,做啲大家都聽得明嘅音樂?』嗰陣,我就會覺得姐姐嘅存在,令我好火滾……」

但呢一切嘅負面睇法,都冇動搖珠鉉。那怕全世界人覺得佢錯,佢仍然堅持己見、行自己要行嘅路。其實Fin.K.L呢四條女當中,以呢個女人嘅性格同我最為接近。

珠鉉嘅堅持同努力冇白費到,自2008年開始,佢慢慢被大眾所認同,佢演出音樂劇嘅獎項亦開始隨住佢嘅聲名與日俱增。最佳女配角獎、最佳女主角獎、最佳音樂劇女演員獎、文化體育觀光部長官表揚,玉珠鉉喺音樂劇嘅努力,終於得到回報。

然後,喺2017年,珠鉉有一個證明自己實力嘅機會 — 《神秘音樂秀:蒙面歌王》( 미스터리 음악쇼 복면가왕 )。我覺得呢個係比較公平嘅比賽,因為大家都蒙面。喺呢個比賽節目入面,珠鉉總共贏過兩次「蒙面歌王」,算係對佢嘅實力錦上添花。

都是我們的Fin.K.L( 1 회 )

都是我們的Fin.K.L( 2 회 )

都是我們的Fin.K.L( 3 회 )單飛歲月(上)

發佈評論

看不過癮?

馬上加入全球最高質量華語創作社區,更多精彩文章與討論等著你。