都是我們的Fin.K.L（ 6 회 ）妹妹

有時候我會諗，如果Fin.K.L喺近年出道的話，究竟佢哋有冇走紅嘅條件同機會？

李孝利同玉珠鉉就認為，以Fin.K.L四女出道嗰陣嘅聲色藝，喺呢個年代要走紅比較困難。孝利表示，呢個年代啲人動不動就MR removed，如果當年Fin.K.L出道嘅專輯俾人MR removed，後果不堪想像。言下之意，就係除咗珠鉉之外，Fin.K.L其餘三個當年都唔係一等一嘅唱歌材料。

孝利以「1998年啲人比較寬容」作為對話嘅結尾。

的確，1998年嘅我哋，係比現在嘅人寬容 — Fin.K.L出道最初期，喺某啲現場節目（《Music Camp》係其一）唱live嗰陣，除咗玉珠鉉之外，其餘嘅三個，都分別試過走音。雖然，細聽之下，你會知道呢種走音通常係因為怯場所致；但走音就係走音，冇任何嘅觀/聽眾會認為歌星走音係可接受嘅行為。（Stephy例外，佢唔走音大家唔認得佢。）

講開又講，1998年同而家嘅樂壇，又豈只「寬容」嘅分別？就算錄音室嘅科技，1998年同而家，都係天同地嘅分別。喺1998年，數碼混音科技（Digital Mastering）仲未普及、唔存在「逐粒音執」嘅技術。歌手喺錄音室，仍然需要一定程度嘅唱功；「呃飯食」嘅機會成本點都俾而家高。

（OT：亦都由於冇數碼混音嘅關係，Fin.K.L嘅經理人DSP娛樂甚至冇將佢哋最紅嘅作品數碼化；所以去年佢哋要開演唱會嗰陣，所有歌都因為冇數碼音源嘅關係，要由零開始重頭錄過。但由於孝利經已微近中年、聲底開始變得沉實，重錄當年佢唱開嘅中高音有啲吃力。）

另一個1998年同現代嘅唔同係：當年嘅觀眾，冇因為佢哋曾經live走音而將Fin.K.L全盤否定，亦冇將佢哋走音嘅片段放上YouTube無限loop（當年都冇YouTube）恥笑。相反，作為歌迷，我哋不斷支持、Fin.K.L亦努力改進。到最後，大家成就咗一個韓國樂壇傳奇，亦為後起之秀訂立咗一條winning formula。

觀乎當今香港樂壇mut7domo，連個似樣少少嘅歌星仔都捧唔出，究竟係香港真係缺人才缺成咁、定係大家對歌手嘅要求仲苛刻過惡家婆教新抱仔、將稍為似樣嘅新人都喺萌芽階段連根拔起，答案其實亦都不言而喻。

寫到最後，係時候寫吓Fin.K.L兩個「妹妹」 — 李真同成宥利。

其實，喺落筆寫佢兩個嗰陣，我心情有啲起伏 — 雖然話，Fin.K.L停止運作後，四個女仔都各有發展，孝利成為性感天后、珠鉉成為音樂劇Diva、兩個作為妹妹嘅亦都喺電視劇各有出路、獲獎無數，但無可否認嘅係：李真同宥利無論喺團中定係離團後嘅發展，都及唔上佢哋兩位姐姐。

套用一句幾年前好流行、有啲俗氣嘅說法：我們都想成為李孝利，但其實我們都是李真。

Fin.K.L其實係個幾奇怪嘅組合。喺最初，李真同成宥利係因為要成為玉珠鉉嘅和音而入團；但後來，DSP改變計劃、空降李孝利入團成為隊長。無論係一個阿姐定係兩個阿姐，由於做大嘅兩個姐姐嘅鋒芒同氣場都咁強橫，兩個做細嘅，就只可以喺兩個姐姐嘅狹縫之間搵生存空間。

呢一點對於我哋呢班喺社會上碌咗咁耐年資嘅人嚟講，真係閒過立秋。試問喺我哋嘅社交圈子當中，有幾多個真係一出嚟就做大佬㗎？只不過，對於兩個十七八歲嘅𡃁妹嚟講，呢一課應該係人生第一課 — 你無論覺得自己幾突出幾獨一無二都好，你叻晒都只能夠成為別人嘅陪襯。

特別係，當年嘅成宥利只得十七歲，大佢一年嘅李真係高中校花（宋慧喬同學）。對於兩個本身都算出眾嘅人嚟講，呢課係幾殘酷嘅一課。

雖然話係陪襯，但其實佢兩個喺Fin.K.L嘅全盛期，亦都聚集咗唔少嘅fans — 特別係宥利呢個「 막내 」、「老么」、「孻女」，因為佢一來係全團最細嘅一個，通常孻女都會特別討人喜歡。二來，其實宥利亦係個大美人、四個當中顏值最高嘅一個。每次Fin.K.L演出，你都可以喺會場同出入口，見到大量舉住「 유리 」、「 성유리 」（宥利、成宥利）燈牌嘅「Yuri鐵粉」。

如果你將Fin.K.L唱過嘅幾十首歌重頭聽一次的話（我有），你會發現，佢哋大部分嘅歌都係由李真開頭、宥利結尾。其實，佢哋兩個就係日後一眾女團「門面擔當」嘅始祖。呢個安排嘅另外一個原因，就係佢哋兩個比較抵key、音域亦唔夠廣，佢哋唱A，其實因為B要留返俾珠鉉去飆高音。

作為細妹，宥利比李真更加稱職 — 李真係個比較「倔擂槌」嘅人，性格比較男仔頭，其他成員鍾意叫佢做「沙悟真」、「軍人」。亦正因為呢種性格，同比佢細一年、喜歡詐嬌嘅宥利就形成強烈對比。宥利當時雖然話年紀比較細，但相信佢亦深知自己嘅有利位置（宥利位置）— 對住三個姐姐詐嬌。唔知呢啲叫三歲定八十、定係十七歲定八十，宥利嘅「詐嬌神功」的確係手到拿來，就算廿一年後嘅今日，喺《Camping Club》，卅八歲嘅佢仍然可以向三個姐姐詐嬌，而電視機前面嘅觀眾同佢啲姐姐們都唔會覺得噁心；功力匪淺。

相反，李真對住兩個姐姐，好多時就冇咗呢種「優待」 — 一來，李真其實只係細玉珠鉉一日，兩個份屬舊同學，好難真係當佢妹妹看待。二來性格使然，李真絕對唔係識詐嬌扮可愛嘅人；相反，佢性格比較強悍，唔會係委曲求存嘅人。可能亦因為呢種性格，佢係Fin.K.L入面、已知唯一一個同孝利開過拖打過交嘅成員。

亦可能因為咁，李真同孝利雖然冇交惡，但亦冇交深。喺《Camping Club》嘅七日六夜相處，佢兩個先驚覺，原來喺性格上，大家係同一類人。其實論合作嘅chemistry，孝利同李真嘅「上下把」演出所製造嘅喜感的確唔錯。

喺2002年3月，Fin.K.L推出《永遠》專輯後，雖然冇公告天下，但佢哋開始咗佢哋嘅「停罷期」。隊長同主音蓄勢待發準備單飛出道，兩個妹妹亦都因此進入不明朗期 — 好明顯，DSP並冇為佢哋個人出道做任何準備，二人喺前途未明嘅情況下，開始喺電視台接拍電視劇（李真就係咁開始拍sitcom拍到攞新人獎）、展開不見天日嘅「銀色旅途」。

喺《Camping Club》，孝利有意無意間分別單獨同兩個妹妹詳談，兩個妹妹對佢哋「後Fin.K.L時代」拍劇嘅生涯，都有接近嘅評價：每日不停做戲，一日十幾廿個鐘嘅工作，收工嘅時間只僅夠睡眠；長年累月嘅拍劇，令到佢哋兩個「情緒壓抑」、「連喊都冇時間」。李真甚至表示，由於佢拍嘅係「日日劇」（即係一星期播足五日嘅劇，有別於我哋睇慣嘅「兩日劇」），每日喺外景車等埋位、見到行過嘅路人，都覺得人哋好幸福、唔知自己做緊乜……

儘管孝利仍然非常口硬、覺得自己當年嘅決定冇錯；但觀乎佢多次對住兩個妹妹流淚，其實佢亦知道自己嘅決定，間接將兩個妹妹送入「地獄」。

事實上，Fin.K.L嘅日子對於呢兩個妹妹嚟講，都係「唔想記起嘅日子」 — 同玉珠鉉最初俾音樂劇界別人士杯葛一樣，電視台劇組嘅人，認為呢兩位偶像出身嘅姐仔，唔係拍劇嘅材料。偶像歌手出身、反被偶像身份所累，呢個可能都係韓國娛樂圈嘅「特色」之一。 宥利講過，拍劇嘅生捱就係「被拒絕」，佢每日努力工作嘅目的，就係「唔使捱鬧」。久而久之，佢喺所有人面前都表現得好冇野心、好冇所謂；連經理人到話佢「你咁冇野心，點喺呢行闖出名堂？」

但其實，宥利嘅「冇野心」，其實只不過係唔想自己連最後嘅斗零自尊都冇埋……

尚幸嘅係：兩個人最後都喺演藝界闖出個名堂。宥利係韓劇女王之一，拍過好多經典韓劇，如《千年之愛》、《雪之女王》、《快刀洪吉童》等等，亦有參與電影嘅演出。佢拍檔嘅男主角全部都係大名男一，如蘇志燮、孔劉、炫彬、車太鉉等等。李真亦都係嫁人之前，一嘗女一嘅滋味。雖然兩個都捱咗唔少咸苦，但總算苦盡甘來。