貼地中產的離地生活

上星期講嘅係，兩個喺香港嘅「離地」中產，點樣嚟到德國嘅Regensburg，過「貼地」嘅生活。然而，「地」嘅「離」與「貼」，其實好大程度上，都係觀點與角度嘅問題。

我哋由香港嘅「離地」，嚟到德國，諗住過一啲「貼地」嘅生活。點知，嚟到Regensburg之後，第一段嘅日子、第一段嘅生活，對於我哋兩個而言，卻相對咁「離地」。

因為，我哋要入住學校嘅宿舍，同一班二十出頭嘅「小朋友」，喺同一個空間生活；是故「離地」。

我哋係Frankfurt停留咗四日，兼且渡過咗我哋嘅結婚一週年紀念 — 食pizza；唔知點解，做得我嘅女人，總係逃唔過陪我捱pizza嘅命運。四日後，我哋連同隨身嘅105kg行李，搭ICE去Regensburg。

我哋係Regensburg訂咗五日酒店，亦即係話，五日之內，我哋要搵到地方落腳。

喺香港，我哋兩公婆，有間公關公司。我老婆係做event management嘅專家，呢類人有一個特點，就係唔急唔開坑 — 一般人搞一個婚禮，分分鐘要一年時間；我老婆從來未試過，有多過三星期時間，去搞比婚禮大得多嘅event。就係呢種「世界都係用六日創做啫」嘅思想，我哋喺到埗之前，完全冇落腳嘅準備。

我哋唯一有做嘅，就係email咗語言學校嘅校長，話佢聽我哋會幾時到；但係條茂利幾日冇覆email。

喺第三日，佢終於覆機。我哋約好，上語言學校視察環境。但我哋嘅底牌係：只要有四道牆，我哋都制；因為冇選擇，酒店喺我哋五日「卜瓊」之後full晒。

學校嘅位置喺Regensburg嘅舊城區中心，地理上靚得無可再靚，非常方便。學校有兩層樓（2–3樓），宿舍同課室都喺3樓。校長帶我哋去睇宿舍，一望之下非常放心，因為宿舍乾凈企理，有獨立廁所；廚房共用，有好大嘅common area，其實有啲似北美嘅hostel。

既然啱呢，就講錢喇。三個月讀到A1–2，學費每人€1,700，合共€3,400；宿舍每月€800。

三個月學費，四個月租，合共€6,600。

好過去搶。果然「萬般皆下品，惟有讀書高」。

比條數大家去比較一下：德國最出名嘅社區學院，名為Volkshochschule (VHS)，提供海量各式課程；亦係聯邦政府為新移民及難民指定嘅德文學習機構之一。VHS嘅德文課程，喺冇任何優惠嘅情況下（即係閣下係連BNO都冇嘅非歐盟人士），由A1–1讀到考入籍試嘅B1–2，6個課程合共€1,500（2010年價）。

如果你持有BNO或其他EU護照，咁VHS嘅學費就統一每個鐘€1。政府德文課程當年係600個鐘（而家900），讀到B1–2即係€600。

以同樣B1–2目標為本，兩個人，扣除租金。

私校 vs 公校 vs EU護照讀公校

=€10,200 vs €3,000 vs €1,200。

仲有邊個想同我講，特衰護照好過BNO？「特衰護照平啲喎！都係旅遊證件啫，冇乜分別啦」？不過講真，有人鍾意跌錢，關我撚事。

Any肥，我討厭政治，都係講返讀書。

我哋被編配入最基礎嘅A1–1班，同班嘅有一對委內瑞拉夫婦，背景同我哋差唔多，都係中產、準備移居德國、搵地方落腳。兩個日本人，一男一女，都係準備喺德國升學。一個烏克蘭妹，一個捷克仔，老老實實，我唔係好知佢哋嚟做乜；同埋一個諗住喺德國開餐廳嘅俄羅斯人。

後來，捷克仔同烏克蘭妹走咗，加入一個日日炸機嘅巴勒斯坦人，同一個比我見過任何基督徒都更老實更君子嘅突尼西亞穆斯林。

上課時間係一至五早上八點半至十二點半；下晝學校會安排課外活動，如舊城遊或者安聯球場遊，又或者係德文電影播放。課外活動自由參與，外出的話交通費自付。

至於宿舍嘅生活，我諗有入過U住過hall嘅，都會想像得到。鬼仔鬼妹住hall最鍾意隊酒，呢度都唔例外。每星期一晚都係不成文嘅蒲吧夜，成班同學去蒲啤酒館。其餘嘅晚上，喺common area，班友都係隊個天昏地暗。

學校會分配，每個寄宿學生每個月都會「值日」一至兩次，工作係喺夜晚，將分好類嘅垃圾，拎落去車場嘅收集站，同埋保持廚房清潔，夜晚11點鎖廚房門。

寄宿嘅日子，維持咗四個月。四個月後，我哋喺舊城區搵到我哋嘅第一個住宅單位。呢四個月，我哋喺學校識嘅朋友，係我哋喺德國日後嘅social network嘅基礎。戒唔甩嘅習慣係，搬出嚟住後，我哋都間中會喺屋企開party，招呼以前嘅同學，同佢哋帶嚟嘅新朋友。

下面有一堆組圖，都係嗰四個月寄宿日子嘅留影，有興趣的話可以睇睇。

吹咗咁耐，咁究竟想嚟德國讀德文，有咩要注意呢？嗱，以下嘅全部都係個人經驗、個人意見，大家聽完就算，唔好同我講「呀乜乜佢去過德國讀書，佢話乜乜柒柒，同你講嘅唔同喎」。我從來冇叫你信我；我係分享經驗，唔係佈道大會，你冇必要聽我點。

事實上，每個唔同城市都有唔同嘅做法同經驗；所以，我講嘅嘢，參考吓好喇。

第一樣嘢，就係唔需要「打好個底」先嚟學。我哋落腳嗰陣，連德文有幾多個字母都未知，咪又一樣學得識。有時候，唔需要太過穩陣㗎；信我，你唔會因為冇打好個底而死喺德國。

更何況，喺呢邊學德文，課程除咗係德文文法聽寫讀之外，每課課文，都有適量嘅公民教育，以至德國生活教育；例如：點樣開銀行戶口、點樣喺市政廳搞文件、點樣睇醫生買藥、點樣start up創業問銀行借錢、點樣投訴鄰居噪音、點樣通知鄰居你今晚開party會嘈少少等等；呢啲香港歌德學院應該冇得學。

第二，唔好迷信名牌。好多香港人，一講起學德文，就話要入歌德學院。喺香港可能係，喺德國就未必。一來只有大城市先有；二來，喺呢邊，學德文嘅龍頭學院，係VHS。

最重要嘅係，德文學院基本上都係冇fulltime教職，老師係斷鐘計，多勞多得，同我當年喺南韓教英文一樣。你哋喺師資優良嘅私校跌錢，教你嗰個喺落堂後，可能係去VHS教同樣嘅課程。信我，我係過來人；喺韓國我教過書，喺德國我跌過錢。

第三，德國嘅歸化課程，即係呢個年代嗰900個鐘德文同公民教育班，係設計嚟俾留喺德國嘅新移民讀嘅。課程嘅設計，只係裝備你日常生活對話，或者喺工廠、餐廳之類嘅地方工作。如果你想喺德國搵一份白領工作，好似我老婆咁，係tech firm做個admin manager之類嘅工作，你嘅德文程度，一定要有B2或以上；否則德國HR係唔會睇嘅。

B1同B2，貌似差一級，但課程內容差天共地。如果你喺香港已經完成B1課程，諗住嚟讀B2的話，小心course shock。都係信我，因為我shock過。

最後，唔好好似啲中國人咁，追求標準德文。所謂嘅「標準德語」，其實就係Hanover一帶嘅口音。呢種口音，喺德語系國家，冇人會當係標準德語。因為德文口音，根本就冇標準。我哋喺巴伐利亞，講嘅係類高地德語；而高地德語中，基本上每三四十公里嘅距離，就會變出唔同口音；何來標準？

由Regensburg去紐倫堡，八九十公里路，我數得出嘅唔同腔口，最少都起碼有三種。Regensburg講嘅係近乎慕尼黑口音嘅類高地德文、我屋企呢邊係古老封閉嘅Oberpfalz德文、去到大紐倫堡區嘅係法蘭克德文。我已經唔講啲小鎮嘅地方口音，同埋混雜咗嘅波希米亞土語。標準？邊個嘅標準先？喺柏林嗰班離地政客？

標準德語，喺Hanover就係標準，嚟到巴伐利亞就變咗「譚仔腔」，掉返轉頭都係一樣。所以，唔好迷戀標準，搵個你有興趣嘅城市落腳最實際。