初夏 0507

四日無去跑啦。之前long weekend都堅持到4-5點落去跑，天氣實在越來越熱啦，踩一踩就好易上到145，pace亦都越來越差，四月中可以跑到7分半但而家去返8分半，有啲灰。但速度同心跳真係魚與熊掌，後來就睇開咗就同自己講，慢慢跑，享受跑，龜速就龜速。好彩一直以來對有人從後過我都無乜感覺，都係一件好事，自知之明嘛，哈，同埋每個人體質目標年紀體重都唔同，從一開始踏上跑步呢條track到，都知道要比較嘅對象從來就只有自己。

原來未係呢度做4月月結，156km，應該係我人生以來跑得最多嘅一個月。都有同自己講，都係唔好跑咁多，下個月會追得好辛苦。如果真係要儲里數，跑多啲long d，應該更易。上年年年尾起碼每個星期六/日都總有一日都會跑過深井，動輒都15/6K啦，雖則而家就每次min play都多咗去到8-10K，但反而就再長啲就無跑過，好耐都無去過深井啦，莫講屯門轉車站，哈哈。今個月會計劃下。

M到抖咗幾日，熱熱地都要頂硬上架啦，再早啲跑囉，或者夜啲跑囉，總會有堅持下去的理由。究竟仲有無機會去跑一次馬拉松呢。