堅持 0425

呢兩個星期都仲維持到，雖則唔係日日去跑，一個星期都跑到四日。要出去返工嘅日子就朝早六點幾起身，跑佢6K都好，沖涼食早餐返工，好在而家都早咗天光，如果起身個天仲係全黑都幾痛苦。

就咁睇返啲數字，進步就好似無乜，仲比之前最好的七分半pace差咗，上返去接近八分鐘pace，我會賴係路線有上有落(唔似引水道全平路)，難做到穩定心跳同配速，同埋賴天氣開始又濕又熱。其實呢排都有涼返啲，同埋我就算18度都只係披件背心出去，背心無咗隻袖真係爭好遠，涼爽好多，雖然個加拿大好似會有少少擦傷的機會，但touchwood暫時都OK，唔知遲啲熱啲會唔會仲咁有神心繼續跑呢，希望自己能夠堅持到落去啦。

其實未到四月底埋數，早幾日，月跑量已達100K，超過咗3月的總跑里數。雖然快就無乜點快到，又無乜瘦到輕到(其實發現個排唔食或食少啲炸嘢珍珠奶茶，個體重就唔會點升)，但的確我有點兒沾沾的，哈。原因係呢個數字唔係話你可以用錢買返來，亦都唔係由別人嘅準則assign俾你嘅一啲數字，而實實在在係自己起身換衫著鞋落街，用自己汗水一步一步咁換返來。跑得快又好、慢又好，都係屬於我，無得偷雞造假。呢個世界總有比自己更快更強嘅人，亦都有比自己更有錢更多時間嘅人，但我做好自己，清楚自己的目標，try my very best，就夠了。

沒有奇蹟，只有累積。一啲都無錯，每次起身跑完都唔會後悔早起，通常只會係無去跑個日後悔個朝點解無去跑。我唔係奢望堅持落去一定要有咩回報，而係希望繼續堅持落去，我回頭一望時而唔會後悔，更而更欣賞自己。成為better me，slimmer me，都係bonus，現在嘅我希望對得住將來嘅我，no regret，just move on。