無奈過《逆流大叔》嘅《我的大叔》

「45正」與「N拋世代」在「地獄朝鮮」相遇的故事。

呢期啲「大叔」真係渴市到偉哥都賣斷市……

當我落筆寫呢套劇嗰陣，我個心情有啲複雜；因為，我唔知自己係寫緊劇評，定係寫緊社評。所以，你當呢篇嘢係乜嚟睇都冇所謂，識睇嘅睇門路唔識嘅睇熱鬧，睇完記得拍手就得喇。

更令我詫異嘅係，喺我離開南韓十八年後嘅今日，南韓人嘅生活，竟然完全冇變。

應該係話，外在環境變好咗，人工各樣都高咗，但係生活差咗。生活喺1998年嘅南韓，可能比生活喺2018年嘅南韓，日子過得更好。

要了解呢套劇（嗱，開始透喇），你首先要學習幾個韓國流行嘅網絡詞彙：

*「45正」（ 사오정 ） —「沙悟淨」嘅同音諺文； 即係45歲就被公司開除、被迫「正式退休」嘅人。九七年亞洲金融風暴時嘅流行詞彙，一直沿用到現在；

*「N拋世代」（ N포세대 ） — 源自另一詞彙「三拋世代」（ 삼포세대 ）；三拋係指為咗喺職場上面能夠創一番事業，而放棄戀愛、婚姻與生育嘅人。至於N拋呢，即係放棄一切、包括人生。泛指長期失業或者長期低收入、由「三拋」頹到變「N拋」嘅「厭世」年青人；

（可能讀者會有興趣知道究竟點先算「N拋」。根據網上嘅主流意見，N拋者放棄嘅係：戀愛、婚姻、生育、就業、置業、人際關係、希望、健康、外表、人生；社會學學名「Mut7domo」。）

*「地獄朝鮮」（ Hell조선/헬조선 ） — 即係今時今日嘅南韓，某啲智障港女發夢都希望係自己「家鄉」嘅地方。唔需要深入解釋，只要你有個非專科學位，再喺當地有份工（如果你夠運搵到工的話。更多非專科學位畢業生，畢業後直接成為「 長未足/장미족 」，即係長期失業），你就自然會明；因為你已經自動進入三拋世代體系。

「南韓係咪地獄我唔知，但你講到好似廿年冇進步過咁，唔係呀？！人哋GDP咁高！係你自己際遇唔好溝唔到條女，就討厭晒人地全國咋？仇韓撚！」

或者咁講啦：廿年前，喺一個普通住宅區嘅一個百多二百呎studio（ 원룸 ）單位，月租廿萬圜；廿年後嘅今日，同樣嘅嘢月租七十萬圜。除非你同我講，廿年後嘅今日，一般市民嘅月薪都高咗三倍啦，否則的話，好咗去邊？人哋起多咗幾幢摩天大廈、多咗幾個億萬富翁、「三叔」成為全球第一大手機品牌，呢啲都關你叉事咩！？

只有某啲香港人先會智障到，覺得李嘉誠成為全球十大富豪，你都會「與有榮焉」。GDP高關你撚事呀！李嘉誠年賺十億，你年賺十萬，你哋兩個嘅人均生產總值就係五億零五萬；咁請問你好咗去邊？成日掛住打飛機，五億精蟲你都冇呀！

講返套劇。

當你了解咗上述嘅三個詞彙之後，《我的大叔》（ 내의 아저씨 ）嘅劇情就唔難理解：呢套劇主要係講述，一個準「45正」中坑，同一個「N拋世代」𡃁妹，喺「地獄朝鮮」相遇相知嘅故事。

男主角朴東勛（李善均飾）係一個失勢嘅結構工程師「部長」（唔係免茶芥嗰啲部長），集齊中年男人「三大悲哀」於一身：人又老（四十五）、錢又冇（㩒機時銀行結餘得卅八萬圜，折合港幣二千七唔夠）、老婆又走路（未走，不過同自己個師弟兼老細有路；帽事嘅）。喺友儕間一直係「尖子」嘅佢，由於太過善良正直、不善交際應酬，所以廿年職場生涯並不順遂。

佢嘅大學學弟、老細兼奸夫為咗要整走佢，方便繼續同佢老婆通姦，於是搵咗女主角 — 合約員工李至安（IU飾），以一千萬圜一個嘅代價，幫手用計迫害朴東勛同埋佢嘅直屬上司。

正如我喺之前嘅文章所講，「事業」係男人一生嘅咒詛。唔順利嘅事業，再加個唔生銹嘅女人，咒詛就直接變成降頭。

李至安就係一個「N拋世代」嘅典型。自小失去雙親嘅佢，同婆婆相依為命。由於冇識法律嘅人教佢，佢唔識得放棄母親嘅繼承權，結果「繼承」咗媽媽爭落嘅一條貴利數，被迫高中輟學出嚟打工搵食，大部份人工要嚟還貴利之餘，間中仲要俾大耳窿虐打。每日只能以喺公司茶水間偷返嚟嘅兩包類好立克飲品、同埋晚上兼職洗碗所收起嘅廚餘充飢；仲要照顧聾、啞、癱嘅婆婆，欠落安老院幾個月嘅費用，只能漏夜以超市手推車將婆婆偷偷接走。

男女主角因為一單插贓嫁禍嘅事件而相交。最初，李至安只係想以「一個月嘅晚飯連飲酒」嘅代價，交換能令男主角證明清白嘅證據。後來借意接近男主角，亦都只不過係想製造緋聞，令佢被炒；事敗後又喺男主角手機安裝偷聽器，廿四小時竊聽，以便監視、伺機迫害。後來，卻因為長時間嘅竊聽，知道佢係正直善良嘅人，於是暗中出手幫助。

而朴東勛喺認識李至安之後，亦開始同情佢嘅遭遇，教佢點樣幫婆婆申請免費安老服務。由呢度開始，兩個人由原本嘅敵對，變成一種互相安慰、支持嘅關係。

這常冷一臉我非偽裝

因時光一再無情盡繪

妳曾於笑面跌出淚水

哀濃於癡百倍

無論哪些際遇 回憶都會太倦

恐發現 和前言違背

情願賠上一切 都不說後悔

應不應已經相會

我和妳不需再講甚麼 因曾彼此敬佩

王傑嘅《今生無悔》同呢套劇襯到絕囉！

大家睇到呢度，可能覺得，《我的大叔》又係一套「三歲死老豆、四歲死老母」、「一哭二鬧三上吊」類型嘅悲情催淚韓劇。

非也。

《我的大叔》嘅人物設定的確夠晒慘，但冇過份嘅悲情，亦冇非必要嘅煽情。貫穿全劇嘅，係淡淡嘅哀怨、沉重、同埋無奈。男主角面對事業上面嘅壓迫、老婆出軌，都只能無奈以對；女主角自出娘胎後，從未試過有好日子，甚至從來未試過有人同佢講句「對唔住」。除咗一臉厭世之外，亦都只能無言以對。

「無奈」，相信亦係大部份成年人嘅寫照。人生中「無奈」嘅成份比重，可能有六七成以上；大喜大悲只不過係歸邊嘅少數。

同時地，呢套劇亦都冇過份嘅「正能樣」。女主角最正能量嘅一面，都只不過係對住大叔男主角嘅一句「fighting!」鼓勵。男主角嘅軟弱無能，女主角為生存不惜偷呃柺騙；呢啲都唔係充滿正能量嘅事情。

成套劇我最滿意嘅，係選角。

其實在此之前，我係有啲怕睇李善均嘅。之前睇佢做男二嘅《咖啡王子》都冇乜點，但之後佢擔正嘅《意麵情迷》，每晚聽住佢力竭聲嘶咁對住孔曉振（孔孝真）咆哮，真係有啲吃不消。好彩，喺《我的大叔》裏面佢完全內斂嘅演技，不慍不火，百分百演活一個中年兼且危機四伏嘅大叔嗰種無奈，同埋對現實妥協嘅悲哀。

至於IU，貴為當今樂壇天后，佢冇一般韓妹嘅高䠷身型；嬌小瘦弱嘅佢，可能因為童年成長環境嘅關係，喺冇乜化妝或者裸妝時，有一張天然「厭世」嘅面孔。由佢去扮演一個長期著唔暖食唔飽、90分鐘一集嘅劇去到第七集先第一次有笑容嘅女主角，真係洽如其份。

除咗主角之外，呢套劇嘅配角，亦都係好睇嘅原因之一。

編劇們創造咗一個名為「後溪」（ 후계 ）嘅社區，位於地鐵「後溪驛」（都係作嘅，部份拍攝地點係西大門渼芹洞）附近。呢個係男主角三兄弟成長嘅地方，亦係女主角租住嘅「半地下室」所在地。後溪係一個老區，亦都唔係有錢嘅地區。但主角身邊一班同佢一齊成長嘅人，就係呢套劇裏面嘅「溫暖」所在。

男主角有一個真正「45正」嘅大哥，五十歲，被迫提早退休之後，做生意又俾人呃晒啲退休金；結果要同老婆「分居」。男主角細佬係一個曾經參加過康城影展嘅導演，但係自後都冇人搵佢拍戲，只能喱喺屋企寫劇本，妄想有一日可以東山再起。

三兄弟對於仍然在生嘅媽媽未來嘅葬禮非常注重，大哥希望男主角二弟盡快升職、位列「常務」（即係director），咁母親未來嘅喪禮先會「有體面」。到後來男主角真係有機會「坐正」，三兄弟幻想母親喪禮「衣香鬢影」、非常有體面而感動。（儒家文化「薄養厚葬」嘅投射？）

除此之外，佢哋同一班有相同遭遇嘅「失敗中坑」老同學，經常都會聚腳於女配角靜熙（非常靚女嘅女配角吳娜拉）嘅小酒館「靜熙家」；時而風花雪月、緬懷過去，時而互相鼓勵；呢啲都係呢套劇嘅正能量所在。

冇咗呢啲正能樣的話，其實呢套劇都幾厭世吓。

除咗正負能量嘅發放，《我的大叔》仲有幾多嘅「感動位」，隨手執兩個作為本文嘅完結：

女主角嘅婆婆好喜歡月亮，女主角為咗滿足婆婆，漏夜去超市再次偷來一架手推車，然後千辛萬苦推婆婆上半山睇月光；

劇終之前，男女主角喺街頭重逢；寒暄過後再分道揚鑣。喺離開嘅時候，男主角喺心裏面問女主角一句：「現在是否達到舒適了？」女主角心裏面答咗一句：「是的。」

除咗淡淡嘅哀愁同無奈，呢套劇仲有淡淡嘅幸福。

呢首好好聽，係劇裏面播放率最高嘅歌曲，但我唔敢肯定係主題曲。歌名叫《成人》（Adult），主唱係Sondia。我有諗過，咁近城隍廟，點解唔叫女主角IU唱埋主題曲呢？後來諗一諗，以IU嘅身價，一首主題曲可能就係一集嘅budget；tvN同製作公司冇必要咁使錢法。

歌詞嘅意思，應該係女主角嘅心聲。MV內附中文歌詞 — 質素ok啦，不過不失，睇得明嘅。不過心情唔好就唔好聽住喇，免得你真係厭世。