中環遊戲（19）

House of Cards

「……解鈴還需繫鈴人，你嗰兩個女人，是但一個要……消失……」

As always，Christine 講出咗重點；as always，佢講出一啲我唔知應該點做嘅嘢……

其實咁多年嚟，我有冇放低過 Chloe？呢個問題，連我自己都唔知答案。

咁多年嚟，我經常同自己講，既然當日，我同佢最終都同意呢個決定，咁我亦應該 honour 呢個我哋之間嘅最後協定。事實上，呢句亦都係我一直同自己講嘅說話：既然已經離開咗，咁就要繼續行落去；一場努力，唔好白白浪費。

但係，當 Christine 同我講、Chloe 仍然獨身嗰陣，我心裏面嗰種忐忑不安，亦係我近年未曾發生過嘅激烈。我知道，只要我肯回頭的話，我同佢，仍然可以重拾舊歡……

問題係，當我諗到呢一步嗰陣，我先發覺，原來，我已經唔可以隨便咁放低 Winnie。佢喺我心中嘅地位，原來比我想像中高。

為何離別了 卻願再相隨
為何能共對 又平淡似水
問如何下去 為何猜不對
何謂愛 其實最愛只有誰

2009 年 8 月，結婚前一個月，我喺個死胡同中間，不知進退……

八月初，觀塘某夜冷鋪。

當你以為大熱天時睇樓辛苦嗰陣，原來仲有一樣嘢更加辛苦，就係去夜冷鋪揀 office 傢私。

點解去夜冷鋪睇傢私，唔買新嘢？老老實實，屋企自己住嘅，就話買新嘢啫，公司做嘢地方，冇就話啫，有得揀，點解要俾咁多買新嘢？嚟夜冷鋪，五六千銀就可以執晒全公司所有檯檯櫈櫈 partition，佢哋通常仲有窿路幫你搞埋水、電、電話線之類嘅嘢，真正嘅 one stop shopping，何樂而不為？

更何況，一個金融海嘯冚過嚟，呢大半年都唔知死幾多公司；而家去夜冷鋪，可能執到又平又靚嘅筍嘢𠻹呀！

唯一嘅小小缺點，就係呢類夜冷鋪，通常都開喺廠廈裏面，莫講話冷氣，有時連風扇都冇。八月天嘅香港，去行夜冷鋪，同去做高溫瑜伽冇乜分別……

「老細……」Jessica 大汗疊細汗、面容扭曲咁望住我。「你仲記得我未跟你之前，係美容 blogger 嚟㗎呵……？」

「梗係記得！你而家都仍然係 beauty blogger 啦，靚女！」我笑笑口答佢。「趁熱搽返少少護膚品，等毛孔擴張嗰陣吸收一吓，對皮膚好有益㗎！」佢冇聽我話搽返啲 cream，只係嘟嘴。

「咁我哋諗住整幾多個位、買幾多傢私呀老細？」同樣喺半溶狀態嘅 Queenie 問我。

「前堂擺幾張細檯，留返做手作嘢或者執 kit 用；」我答佢。「後堂就留六個位左右，連埋 partition，然後一張圓檯要嚟平時開會用；大量嘅櫃，同埋我同 Winnie 房嘅傢私……應該係咁上下呀呵，Winnie？」

「差唔多啦……」成面汗、非常水潤嘅 Winnie 答我。「問埋佢哋有冇水電師父，幫我哋裝埋燈盤同射燈，同埋拉電話同寬頻線。Wifi 可以裝，但一定要保留 LAN 線；我唔想好似 Soliloquize 咁，三日唔埋兩日就冧 wifi、要臨時臨急周圍去黐LAN線。」同樣喺 Soliloquize 踎過嘅 Queenie 連忙點頭。

正當我哋喺個高溫瑜伽場度揀緊檯櫈之際，電話響，係 Joseph：

「點呀，忙緊乜？」佢問我。

「冇呀，揀緊傢私、搞緊寫字樓啲嘢；」我一邊抹汗一邊答佢。「有乜幫到你？」

「轉頭得唔得閒？有啲嘢同你傾。」佢好直接咁講。

「Hmmm……揀完傢私 ok 嘅，」我答佢。「咁你想去邊傾？」

「上嚟我 office 坐吓吖！」佢答返我。「你搞掂啲嘢俾個電話我吖！」

唔知搵我有乜搞作呢？

轉頭，紅磡，Joseph 嘅 office。

「點呀 Jo 哥，咁好搵我出嚟，有乜關照？」坐低後，我先嚟個開場白打開話題。

「關咩照吖，」佢都客氣返句。「係喎，我個 friend 旅業商會嗰壇嘢，搞成點呀？有冇嘢要我幫手？」

「嗰邊？Ok 啦，其實佢哋要求唔算好高，所以啲嘢都好易話為；」我答佢。「不過，佢哋個秘書好似……」

「有啲蠢吖嘛！哈哈！」Joseph 插嘴。「你唔係第一個咁講，佢做開 NGO 嘢好多年，所以有啲唔係好識轉膊，板板六十四。係咁㗎喇，做秘書𢭃份硬掘人工，邊識咁多呢啲嘢吖！識嘅話就轉咗行啦！哈哈！」

我陪笑咗兩句，然後，佢停咗講嘢，托住頭望住我。坦白講，望到我有啲唔自在……

「Hmmm……」佢欲言又止。「究竟……我信唔信得你過呢？」

「屌你老味……等我仲以為呢諗緊乜咁沉重…….」我擺出個恃熟賣熟嘅款、輕輕啤住佢。「你話呢？」

一個你識嘅人咁樣同你講嘢，其實佢已經心裏有數、準備同你講佢嘅「秘密」或者大計。Joseph 剛才嗰句說話，只不過係擺姿態多於一切。生意佬之所以係生意佬，因為佢哋埋檯之前，已經計好晒數。如果講完呢句，但去到最後又唔肯講乜事的話，咁就平白為我哋之間嘅「友誼」無啦啦整條人工裂痕。一個跑慣江湖嘅成功生意佬，絕對唔會做啲咁戇鳩嘅嘢。

所以，Joseph 呢句，其實旨在引起我嘅興趣；我信唔信得過，其實佢心中早已有底。我要做嘅，就好似開水喉咁、輕輕𢭃起個開關掣，之後，佢就會源源不絕。

「好！既然係自己人，都唔怕同你講；」佢輕輕一拍檯面，然後講出佢要當我係自己人先講得嘅嘢。「IT 會嗰邊，bid 到個政府 project，搞個IT獎，我想你幫我搞呢個 launch event、簡介會、同埋日後 panel 嘅 logistic……」

唔好睇小呢幾句說話，對我嚟講，要分析嘅資訊量好大。

首先，佢話叫我搞呢個政府 project 嘅 event，但係根據我坐過區議會同立法會議員辦事處嘅經驗，呢類 project 要開政府數，就一定要拎三份 quotation。拎得三份 quotation，就即係唔係 sole bid。個 project 係咪我嘅囊中物，仲係未知之數。我要套佢更多料，此為其一。

IT 會嘅 project，由佢嚟開口叫我做，即係話，IT 會有人事變動。因為我有了解過佢哋做嘢嘅程序，一般嘢話就話集思廣益，實質上每屆 committee 都係內閣制、主席說了算。照咁睇，Joseph 好大機會已經定咗係下屆主席，所以接咗呢個波。換屆嘅消息，可能要遲多一兩個月 AGM 先公佈。

好彩上次見完佢之後，我有做 background check……

「IT 會搞政府 project，你搵我幫手……」電光火石間，我已經要落注。「恭喜晒喎 Joseph！恭喜你榮任新一屆主席！」

「屌，你轉數使唔使咁撚快呀！果然係食開政治飯嘅人……」佢笑到見牙唔見眼。「多謝先！未定實嘅，未定實嘅！仲要過某啲人最後嗰關……不過，如果呢個 project 搞得好好睇睇的話，咁嗰班 men in the smoke-filled back room 就會睇我台戲喇。」

「咁你想我點幫你搞呢？」套料時候到。

「嗱，就咁；」Joseph 開始分享佢嘅大計。「政府呢個 IT 獎呢，就搞咗兩三年㗎喇。不過，你都知啦，政府搞呢啲嘢，要睇GIS嗰班友嘅 mindset，即係想唔柒都唔得。結果搞嚟搞去，雷聲又冇雨點又冇，根本冇人知呢壇嘢嘅存在。今年 OGCIO 決定，拎返嚟自己搞，搵我哋啲商會入 bid。你都知我哋個會有幾耐歷史㗎啦？呢啲嘢，又點會少得我哋呢……」

我一邊聽，一邊開行我個腦嘅 CPU，去分析佢所講嘅嘢。

「但係你都知我㗎啦，同某啲政治人物行得咁埋……」佢開始講到戲肉。「IT 會有班元老，政治上比較中立。佢哋驚我同佢哋行得太埋，政府嗰邊會覺得我哋有立場、會疏遠我哋、減低我哋嘅影響力。我就想趁呢個 project，做啲嘢出嚟，話俾班元老聽，我哋就算同呢班人行得埋，都唔代表會失去喺政府眼中既有嘅地位。」

咁我開始知道，點解佢要搵我喇。咁樣睇，我唔需要太擔心係唔係 sole bid 呢個問題 — 香港大把 PR 連立法會有幾多席都唔知，識做政治公關嘅就一定斬到佢一頸血；佢呢個情況，可以搵嘅人唔多。

「其實呢，話難唔難啦……」我答佢；呢個亦都係我討價還價嘅時刻。「好似你呢類 IT 獎，我冇估錯的話，應該個 launch event 嘅嘉賓，就係日後坐 panel 睇 project 評分嘅評判。我可以幫你度個 panel list，裏面嘅人名可以做到兩邊都討好，你啲朋友們唔會覺得你俾政府『河蟹』，政府唔會覺得你係反對派。我諗，咁樣就夠晒你去說服班元老啦。」

Joseph 聽完後連連點頭，然後同我講：「See?! 我都話冇搵錯人㗎啦！我一開聲，你就已經知我想點，仲諗好個 plan 𠻹喇！要喺外邊搵好似你咁熟政治嘢嘅公關，真係搵到都使我一大筆囉！」

「多謝賞識；不過……」係時候講最現實嘅嘢。「就算我幫你搞，都唔代表我會平得去邊喎……」

「呢層當然，」Joseph 收起笑容。「不過，我亦都聽得出，你唔係同我講緊錢……」

「聰明！」我索性開門見山。「IT 會 committee，我想你預埋我。」

Joseph 冇答我，只係點頭微笑。

坦白講，幾個 event 嘅 P fee，我唔志在。我想要嘅，係香港數一數二嘅 IT 商會嘅執行委員；只有係咁，再配合埋 marketing 會嘅執委身份，我先有機會喺呢個天時地利人和都唔喺我嗰邊嘅「戰場」裏面，同 Richard Ong 或者任何嘅「前輩」去一較高下。

更何況，我真正想要嘅一個「虛名」，叫「選舉委員會委員」 — 我對小圈子選舉一啲興趣都冇，但我知道，呢個 title，就代表咗我喺業界嘅 KOL 地位。有咗呢一堆公職，先至可以做到生意搵我，唔係我搵生意。

拉人裙冚自己腳？係㗎，fake it till you make it。有日當我有李嘉誠咁嘅成就嗰陣，我都唔介意叫自己做「一個香港市民」。

我可以唔搞任何嘢，乖乖哋打份工，個個月等出糧。但當我踏出第一步之後，「搵餐晏仔食吓」已經唔再滿足到我。係唔係都拋咗個身出嚟，一係唔做，一做就要做大。我唔肯定我可以成功，但呢份野心唔可以缺少。否則 eat or be eaten，我唔做大，遲啲就會俾人食埋。

腳踏實地做嘢，有料到就會有人賞識？你咩年代嘅人嚟㗎？喺 2009 年腳踏實地做嘢，出路有兩條：一係做死、一係餓死。

八月初某夜，凌晨一點幾。

Winnie 已經返咗屋企，我仍然喺書房做緊嘢、寫緊 proposal。當我正在享受深夜嘅寧靜、埋首工作嗰陣，電話響：一個冇來電顯示嘅電話。

今晚我冇約 Cammie 入 game 做嘢，所以呢個電話有啲唔尋常……

「邊位？」我換上一把幾拘謹嘅聲音。

「仔呀，阿媽呀……」電話傳來阿媽虛弱嘅聲音。「你爸爸今朝心臟病發，入咗醫院，醫生話佢可能唔得喇……」