love nature, love travel, love drawing, love photographing

My little detour - 《7.5星期後，終於動身》

2022 年 12 月 26 日

7 Oct 2019, Mon (Day 128 晴->雨， Xela -> San Lucas, Lake Atitlan, Guatemala )

今朝一早起身準備，食埋兩隻蕉就去睇下琴晚洗嘅衫乾唔乾。當然...唔係全部都乾，但都要照pack 啦！搞掂埋的嘢（包括叫Eva幫我食埋的米同2隻蛋），再放低埋Q30租，諗住去埋廁所走人。點知Mai好鬼sweet咁送左pack沖熱朱力的chocolate bar比我，仲加多封信，真係好感動！

8:40am出門口，本來都諗住搭車去巴士站。但等車、上落諗起都煩，所以最後行過去就算。中途仲經過Xelapan, 買左我想試左好耐的蛋治餐（Q10)，佢個包仲有紙盒加保鮮紙包，又熱又衛生，雖然其實我都係一路行一路食。

去到巴士站，我大概知位置，有人走埋嚟問我係咪去San Pedro。我話唔係，我要去Panajachel，但想要直達，點知佢話佢嗰架係...我有上網search過架嘛，當然唔會信。過無耐就搵到flor del paisaje, 我將個backpack交比佢，但佢無選擇放車頂，只係隨意放車尾，都好嘅，唔使日曬雨淋囉（Q25)。

2.5 hours後終於到Panajachel，無耐仲有一個著住唔知咩鬼tourisim的tee嘅人跟住我，知我想去San Lucas後一直跟住我。由於覺得呢的成日借的意呃錢，所以話佢知我自己搵ok，佢又話係自己工作。咁好啦，入正題，問佢去San Lucas嘅船幾錢，佢竟然夠膽答我無直達，要先去其他六個島先可以去San Lucas。佢應該真心覺得我似羊牯，因為佢哋每跳一個島要Q25, 即係total要Q150。我再問佢無直接到San Lucas咩，佢答我無，唯一方法只可包船，仲要係Q250。我話太貴，佢叫我自己查，都廢事理佢。最後當然是有直接船（Q25)，真係搭15分鐘到。

落船後找住宿，跟住maps me行，明明已到但都搵唔到。咁啱有人出嚟我便拉住佢問一下。當時剛好落狗屎，佢勁好人咁開左湖邊的閘比我避雨，原來呢位伯伯係喺到打工嘅。停雨後便繼續行，屋是找到了，但咩人都無。在屋外問人及打電話都試勻晒但不得要領。等左個幾鐘後覺得真係唔係路，於是放低大packpack出去左hotel 借wifi。

個staff勁好比我用，為報答他，我唯有去佢哋的餐廳飲杯朱奶（Q15)同去廁所。埋單時順便問下佢哋識唔識Marcelino，佢哋唔識但搵左個人幫我，真係好好人。佢哋幫我打左n次電話後終於有人聽，仲話我知已有人在homestay等我。於是雞咁腳返去，佢竟然比我揀住張平房或者主屋內的一間房。最後我揀入主屋住，因為有齊廁所廚房。果然唔錯，今晚間屋我一個人獨霸，正！