中環遊戲（22）

見我粉身碎骨還點上一把火

我有幾個娛樂圈嘅藝人朋友，其中不乏大紅大紫嘅，都曾經直接或者間接同我感嘆過，花無百日紅，能夠順風順水一直由年青當紅到老嘅，萬中無一。所以，好多時佢哋都會喺如日中天嗰陣，轉移一吓投資，希望多線發展。

其中，最多藝人喜歡嘅，就係做生意。因為佢哋覺得，生意嘅嘢，做得好的話，唔只一直做到老，甚至可以傳俾下一代。

佢哋唔知、或者知道但唔願意面對嘅係：名利場中固然花無百日紅；但就算商場，真係要將一盤生意經營得頭頭是道、一代傳一代，其實同佢哋想喺娛圈紅足幾十年一樣，萬中無一。

我寫呢個 lead 嗰陣嘅感慨之情，並唔係因為我自己嘅生意。我之所以感慨，係因為我老友兼姐姐 Christine。由於我同佢係喺「漢城」年代認識嘅，喺當年嘅姐姐弟弟稱呼，就一直跟住我哋咁多年；姐弟嘅感情亦然。

呢個人，可能係我喺香港十年日子中，所認識最有 marketing 頭腦嘅人。佢甚至係我事業上影響最大、最重要嘅人；同時亦係我喺韓國認識於微時嘅舊知、媲美至親好朋友。如今，佢面對事業、人生嘅低潮、甚至出現問題；但係我呢個「細佬」，並冇能力去幫助佢……

人生在世最難啃嘅感覺，就係你對你關心嘅人事物愛莫能助所帶嚟嘅無力感……

同日晚上八點。

辦公室外風雨雷電交加，辦公室內嘅我，內心亦風雨交加。唔知發生咗乜事嘅Winnie，正喺佢房一邊做緊嘢、一邊等我嗌收工，然後去食飯。但係此刻，我實在冇心情做任何嘢、應酬任何人……

一個鐘前。（承接上一集）

「唔緊要啦，你有嘢做緊要啲；」我安慰 Christine。「係呢，之前冇聽你提過嘅？接咗個大 project 要親身去招呼客人？去邊度呀？又係韓國？」

「唔係呀，今次去紐約。」佢答我，把聲仍然非常落魄。

「嘩！連美國 job 都俾你接埋，使唔使咁國際化呀！」我想緩和一吓電話中古怪嘅氣氛。「你玩晒啦！俾條生路我哋呢啲公司仔行吓好喎癲姐！」

「Job 乜鬼吖……」佢有啲欲言又止。「其實……我今次去，係 take up 一份三個月 contract 嘅 temp job 呀……」

Christine take temp job？我唔係好相信我啱啱聽到嘅嘢。

「Temp job？」我狐疑。「熟人嚟㗎？你過去幫朋友手三個月咋？」

「我都希望係……」佢嘆咗口氣。「可惜，朋友的確係朋友，但我唔係因為幫佢。我需要去搵錢嚟維持生計……」

公司生意唔好、要食榖種，我明；但點解要去做份 temp job 嚟維持生計呢？我認識咁多年嘅 Christine，雖然未至於大富大貴，但點講都好，佢都一定係中產以上嘅水平、揸 Benz 住羅便臣道著 Ann Dem 戴卡地亞嘅人。點解要搞到咁……折墮呢？

但係就算幾熟嘅朋友都好，問啲咁敏感嘅嘢，需要嘅技巧好高 — 先唔好去講人哋願唔願意同你分享呢啲咁敏感嘅事情，喺一個未知破壞程度嘅環境之下，去問人哋切膚之痛嘅嘢，亦都好需要一啲技巧，同埋同理心。

「姐姐呀，其實……發生咗啲咩事，可唔可以講得俾我聽㗎？」我一直覺得，咁多年嚟，其實我對佢嘅關心，並不及佢對我嘅關心；呢次正好等我補足一吓。「或者，我可以幫到你呢？就算幫唔到，最起碼我都可以幫你分擔一吓啩……」

「唉……我都唔知應該點講……」佢講嘢嘅聲調開始變，我感覺到佢應該喊緊。「Jonathan……Jonathan 佢……穿咗公司櫃桶底，攞晒公司啲錢走咗路……」

Jonathan 係 Christine 嘅多年生意拍檔，曾經「曖昧」過吓，但冇下文。話時話，點解叫親 Jonathan 嘅都係仆街嚟嘅呢？我識嘅咁多個 Jonathan，全部都係仆街，沒有例外。究竟係我識嘅 Jonathan 仆街、定係但凡叫得 Jonathan 嘅，都有返咁上下仆街呢？唔通要過到個「仆街 merit test」，先可以叫 Jonathan？

「佢攞咗你幾錢呀？」我問佢。

「公司數……二百幾萬……」佢越講越細聲。

咪住先，佢咁講……即係唔只公數？

「咁……私人呢？」我好猶豫咁問佢。「講唔講得俾我聽㗎？」

「私人……唉……」佢停咗好耐，我只係聽到佢好深嘅呼吸聲。「今日我俾晒遣散費之後，我……我……得返幾萬銀……」

「你遣散晒你啲員工？」我俾佢呢一著嚇咗一跳。

「係……因為我冇辦法再做落去喇……我起唔返身喇；」佢用一把好無助嘅聲音答我。「其實件事都唔係呢兩日發生，我考慮咗好耐。唉……唔想再撐落去喇……細佬，我好攰呀……嗚……嗚……」

一陣好淒涼嘅喊聲，暫時終止咗我哋嘅對話……

「咁……你有冇報警呀？」我聽見佢嘅喊聲停咗之後，再問佢。「你應該都搵唔到 Jonathan 㗎啦……」

「冇……佢都係好唔掂先出此下策嘅啫……」Christine 嘆息。「……話晒都緣份一場……算啦……」

Christine 喺感情上，其實係個容易受傷的女人。佢唔係濫情嘅人，但每次當佢愛上一個人嗰陣，都會愛得好深，將所有嘢押晒上個男人身上。呢十年嚟，呢類俾人騙財騙色嘅事情，唔係第一次。不過，今次佢真係俾人傷得好深；我完全感覺到佢嗰種痛……

「點解你唔早啲同我講呢？」我相信，如果佢早少少同我講的話，個結局可能會唔同。「可能我幫到你呢……」

「你點幫我呀？」佢答我。「你幫我出糧俾啲伙記，定還錢俾銀行？你都係啱啱先企穩陣腳咋，我點可以拖埋你落水喎……」

還錢俾銀行？Shit！

「你幫佢同銀行借錢？」坦白講，我個心開始有啲驚，因為件事嘅破壞程度，可能超出我估計。

「我加按咗層樓借錢俾佢……」佢好細聲講，好似驚我會鬧佢咁。「我諗，遲啲銀行會收返層樓拍賣……」

我開始明白，點解一向以硬淨見稱嘅佢，會覺得今次撐唔住喇。我亦都明白，點解佢要暫時離開香港 — 我唔相信佢有清理唔到嘅債務，但十年嘅努力一朝化成飛灰，離開呢個傷心地散吓心，都係人之常情。

「姐姐呀，不如你唔好去美國，留返喺香港，過嚟幫我手？」我都開始情急，再顧唔到任何談話嘅「藝術」，好直接咁同佢講咗呢句。

「傻嘅咩！你都係啱啱起步咋，點開咁多 headcount 呀？」佢答我。「多謝你嘅好意，不過，心領喇。」

「驚乜喎！事實上我真係擴充緊吖嘛！」我死撐。「放心喎，我有投資者 back up，頂得住喎！更何況，你又唔係入嚟齋出糧唔做嘢，水漲船高啫，冇問題㗎喎！」

「嗰個係投資者，唔係你老豆呀，佢冇必要俾你亂使錢㗎！」Christine 出大絕打沉我。「你知唔知我幾錢人工先？你一間新公司，養唔起我㗎！唔好傻啦！」

對話喺呢個位再次 dead air。

「細佬呀，多謝你，真心多謝你。」佢先打破沉默。「我知你錫我，不過，我真係唔可以接受你嘅好意；就好似你一年前唔接受我嘅好意一樣。放心啦，我唔死得㗎！我只係想沉澱吓自己啫，返嚟再搵你啦！幫我同 Winnie 講聲唔好意思，祝你哋白頭到老。」

電話收線後，我仍然呆呆咁望住個螢幕，唔知應該點做……

喺過去十年，Chrsitine 唔只一次喺我有事嗰陣伸出援手。如今，我對佢嘅處境，毫無幫助嘅能力。呢一刻，我為我嘅無能感到羞恥。

2009 年 9 月，形勢大好，公司業務正在喺上升軌道上飛馳。

9 月頭兩個星期，可以用「瘋癲」兩個字去形容。單單呢兩個星期，公司就有四個 event；連埋我同 Winnie 嘅婚禮，總共五個 event。人手少少嘅我哋，四個人都忙得不可開交；有時候甚至連食飯時間都冇。

喺呢四個 event 當中，最重頭戲嘅，當然係IT會嘅IT獎揭幕禮暨發佈會。無論台上台下嘅嘉賓，都係重量級人馬；就算場地，亦都唔係求其搵間酒店租個 ballroom 摺埋一二角。呢個 event 舉行嘅地點，正正係九龍最旺嘅 shopping mall。

可以話，呢個 event，對我公司、我嘅員工、我自己、以至我公司以外嘅拍檔，都係一場考驗。究竟，我呢間新束束嘅 Infinity Communications，可唔可以過到呢個 stress test 呢？