IF

小說、散文,廣東話寫作。長篇小說 《當首爾仍是叫漢城的那些年》系列、《北角演義》、《初雪》、《中環遊戲》作者。 https://medium.com/@herrfung 、 https://t.me/ifpush

北角演義(十)

發布於

星期四上晝,大會議室。

例會。其實我哋個例會一啲都唔例,主要係睇Simon嗰個星期幾時蒲頭,同埋得唔得閒,人到就開會;所以冇話定係邊日。

「點呀Alan,」Simon問我。「下星期啲日本仔嚟,你準備成點?」

「都七七八八㗎喇,」我答佢。「酒店方面,我諗住book『金鐘三寶』是但一間;入嚟開會前check過,全部都有房。我個人prefer Conrad,因為個早餐好食啲……」

「咪住先,點解要住咁貴呀?」Simon打斷我。「住粵華咪得囉,近近哋;再唔係就城市花園囉!住金鐘,又貴又遠,出入都唔方便……」

嘩!唔撚係呀……呢兩間叫雞酒店嚟㗎喎!你自己上得141多,都唔好咁老點你啲日本客呀……同你開完一日會,返到酒店都仲要聽住隔離房喺度吔咩嗲kimochi熱姑熱姑;仲使瞓咩!

「但係人哋係日本龍頭電訊公司嘅高級職員,」我嘗試解釋。「一般呢啲大企業都有corporate standard,唔係求其有地方住就得㗎……」其實我即係轉個彎話佢聽,人哋有class㗎,你估係你個cheap喱咩!

「佢哋有corporate standard係佢哋嘅事,」Simon強詞奪理。「而家係我請客,我book乜佢哋咪住乜囉!之後點呀?」

「下星期五佢哋三點幾機到香港,我哋會去接機,然後車佢哋去酒店安頓好;」我忍住道氣繼續答。「晚飯我預咗去遊艇會食……」

「使唔使去club house食呀?」Simon又打斷我。「working dinner啫,酒店食咪得囉!」不如落北角強記食吖笨!

「好!」我有少少藐視嘅聲線。「咁星期六全日開會,三餐都係酒店搞掂得啦!」好明顯佢聽唔出我串緊嘴,點頭表示滿意。

「星期日休息,我諗住帶佢哋遊吓香港;」我繼續。「下晝book咗隻遊艇同佢哋出海,夜晚會去南丫島食海鮮……」

「去遊香港咪遊香港囉,又出乜嘢海唧?!」佢繼續聽一樣駁一樣。「使唔使又食海鮮咁貴呀?!廟街都係香港特色吖,去廟街食咪得囉!」

廟街?我俾佢嚇到眼都跌埋出嚟!人哋就算肯陪你癲,食物中毒你賠湯藥費呀?!

「黃生,人哋今次話晒都拎住九個位數字嘅港幣嚟同我哋合作,」我終於忍唔住發作。「食幾餐四個位數字嘅飯都唔係好過份啫……」

「Alan你呢排做乜呀?」佢問我。「唔係錢嘅問題,而係使得值唔值。使埋呢啲錢去飲飲食食、住靚酒店,我點樣同股東交代呀?」

哦。

人哋喺日本帶埋幾億嚟同你傾入股、傾合作,跟返個corporate standard住好少少食好少少,就要同股東交代;你自己連數都未audit好就快刀斬亂麻咁收幾十間濕鳩鋪返嚟,連日後點運作都未知,就唔使同股東交代?

使幾千萬就係咩碰,使幾千銀就要同股東交代,真係抵鳩你咁多年啲股價都上唔到一蚊!等我轉頭打俾個經紀、沽返一手貨、質低你兩個價位、等你今日day low收市先!

「呢單嘢都係唔使你跟喇。」佢意猶未盡。「Andrew,你take over返啦!唔好使咁多錢呀!Alan你下星期去珠海跟埋啲手尾啦!」Andrew聽完後唯唯諾諾、面有難色。

「好呀!」我好大聲應佢。坐喺我則面嘅Rachel喺檯底拉一拉我件衫,然後微微擰一擰頭,示意我收火。

我先冇咁撚得閒同佢嘈呀,咪等佢下星期喺啲㗎仔面前出吓醜囉。


午飯時間,杏花村某餐廳。

「你呢排做乜呀?個人咁燥嘅?」Rachel好關切咁問我。「係咪有啲咩唔開心呀?」

「我冇嘢喎,」我答佢。「以事論事,個cheap喱好慳唔慳,喺呢啲位嚟慳?自己平日飲飲食食跳舞叫雞開公司數嗰陣,又唔見佢話要同股東交代?!」

「係咪個胃仲未好返晒呀?」Rachel睇得出我口不對心。「不如攞幾日假唞吓吖!」咁又係,Simon之前啲嘢就算更過份,我都未試過咁樣頂撞佢。

「冇事啦!」我敷衍佢,其實唔想再講落去。「我轉頭冇嘢㗎喇;食嘢啦。」

「知道。」Rachel答我。

「我哋之前訂咗嘅酒店,千其唔好cancel;」我轉話題。「你諗計hold住Conrad嗰邊,佢哋見我哋用公司名訂,應該會易話為啲。總之㗎仔嗰邊一日未有酒店check-in,一日都要hold住間房,就算要罰錢都係咁話;如果唔係到時人哋唔肯住地踎酒店就真係要瞓街喇!仲有,喺『夏宮』訂定星期日晚飯嘅廳房,以防萬一。」

「你真係驚啲日本人罷食呀?」Rachel笑一笑。

「人哋係嚟做嘢,唔係嚟旅遊,冇必要同你搏老命食老廟;」我答佢。「呢啲財閥級數嘅企業,未必肯俾佢哋嘅高層住四星級以下嘅酒店㗎!到時要人自己俾錢轉酒店都事小,人哋一個唔好老脾,賣機票飛返日本我就笑。」

「我又學到嘢喇!」Rachel點一點頭、吐咗呢句說話。「Alan呀,我有嘢想問你呀……」

「咩呀?」

「其實……其實呢……」Rachel吞吞吐吐。「……你心情唔好,係唔係……同Chloe有關㗎?」

我聽見Chloe呢個名,抬起頭啤住Rachel。

「做咩喎……呢啲嘢,我唔問你……仲有邊個會問你喎……」佢俾我嚇到耷低頭,好細聲咁講。「我都係擔心你咋嘛……」

「Chloe係我以前嘅一個朋友,」我驚嚇親Rachel,於是略為解釋一吓。「嗰日喺醫院,我個人未清醒,誤會咗你係佢……」

「以前女朋友呀?」佢繼續問。

我點頭,再同佢講:「好喇,唔好再講喇。總之我冇事啦。」佢點頭;我哋繼續食飯。

Chloe……我都唔知點解,同佢分開四年後,Chloe呢個名,好似變咗個禁忌咁……

情即使不再 未可放下來 男人的感慨

Alan Fung究竟你喺度做緊乜呀?


星期五晚上,IFC禮鮨。

「Alan哥,終於都蒲頭喇!」Renee一邊呷住杯凍清酒、一邊講。「我以為你唔記得咗我呢個老朋友喇!」

「傻啦,唔記得我阿媽,都唔敢唔記得Renee姐你啦!」我邊食緊螢光魷魚邊答佢。

正如之前講過,我同Renee相識於微時。佢係我入行做財經記者嗰陣,第一個識嘅公關;當時我只係返咗四日工,佢亦都未過試用期。由於兩個當年都係「青BB」嘅新人,於是好快就混熟。我哋經常約埋一齊飲飲食食、把酒談心;共醉咗唔知幾多個晚上。

但係我哋並冇超越我哋嘅友誼;亦正因為咁,我哋嘅友情,先可以維持咁多年。否則,Renee或者我,都可能成為另一件用完即棄嘅「愛情消耗品」。

「記者、編輯、議員助理、上市公司高層,」Renee數緊手指。「睇嚟,你真係一步步咁,向你自己嘅夢想邁進喎!」

說來慚愧,好多年前嘅某個清晨,我同Renee喺我屋企天台飲又到天昏地暗。當時七葷八素嘅我,傻吓傻吓咁向天發誓,話要喺香港創一番事業……

「妖!講呢啲……飲到傻吓傻吓講嘅嘢,你就唔好記喺心啦!」我面皮薄,應該有少少面紅。「講返轉頭,你都撈得唔錯啦!都Director喇,大家咁高咁大啫!」

「我係Associate咋,未坐正㗎!」Renee嘆咗口氣。「唉……喺Yvonne治下,我都幾難有坐正之日……」

「你哋關係仲係咁差咩?」我問佢。Yvonne係行內有名嘅PR,亦都係行內有名、同同性相處唔到嘅PR;好多女PR都叫佢做「李莫愁」。

「時好時壞啦!你都知我同佢嘅故事;」Renee有啲感慨。「咁多年,一方面係佢提攜我,另一方面又係佢hurt得我最深……」

佢哋兩個最經典嘅「故事」,就係Yvonne呢個劍橋高材生,曾經「勒令」同樣係英國大學畢業嘅Renee去英國文化協會讀Business English;呢件事Renee一直視為奇恥大辱。可以話,當日Renee係喊住去金鐘上堂嘅。

「唔好講我喇,講返你公司嗰筆先!」Renee入正題。「其實,你哋想搵PR幫你做乜㗎?」

於是我將上一集(第九集)下半部嘅嘢,講一次俾佢聽。呢,即係你哋嫌長skip咗冇睇嗰幾段呀!

「哦!咁唔難吖!我哋份contract俾夠每個月三隻top story你咪得囉!」Renee講得好輕鬆。「總之講電訊業又好,講企業管治又好,我哋可以當正你老細係VoOL咁pitch俾啲記者咪得囉!」VoOL者,公關術語「Voice of Opinion Leader」也。當年要做VoOL,你點都要有返啲料有返啲人面;唔似得而家,有身份證就係KOL,KOL仲多過新移民。

「呢層你哋自己諗掂佢啦!嗱,水就放晒俾你喇,」我飲緊sake。「你哋到時做得好好睇睇,Simon滿意的話,我哋就合作愉快!」

我約咗三間PR公司,喺日本仔走咗之後嗰個星期二上嚟做presentation。其實其他嗰兩間都係陪跑,Renee佢哋先係我想retain嘅PR公司。

出嚟做嘢,一定要用人唯親。識唔識做嘢、做唔做到嘢,呢啲可以慢慢教;但你唔可能冇自己嘅班底、走去信任一班三唔識七嘅人、擺佢哋係身邊做嘢。唔用人唯親,唔通用人唯疏、然後俾人起自己飛腳咩?

而我不知道咩叫「用人唯才」。你有才關我撚事呀?你唔係我嘅人你有才對我有乜用?

我搞小圈子選舉?你傻㗎?!香港搞選舉,梗係內定啦!你未睇過選特首咩?咁大個人唔好仲柒吓柒吓、信香港有真民主咁戇鳩好唔好?大個仔喇!

(待續)


本故事人物及情節如有雷同,實屬巧合。

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

《北角演義》全集目錄

1

看不過癮?

一鍵登入,即可加入全球最優質中文創作社區