ccthewords

「喔!你也有在跑步啊!」

足下 0413

發布於

連續四天假期,好充實,每日不是往山上走,就是往海邊(的公路)跑。天氣又好,涼風送爽咁,又有太陽可以扮下練烈陽神功,最想就係曬黑啲手手腳腳,黑色比白色顯瘦呀!

有日係山上準備u turn嘅時候,迎面見到兩母女散梗步,個女都十幾歲個隻。當我過咗佢地少少然後u turn啦(其實因為夠4KM所以我要折返架啦-個晚要出去食晚飯不能太遲),就聽到個阿媽話「呢啲唔係好消耗到卡路里架咋」,我估佢係指跑步。老老豆豆,佢講得啱,尤其如果佢指以我咁嘅龜速去跑,就算跑成粒鐘,都只係消耗大概500卡路里,認真唔多,或者更貼切即唔夠效率。如果花一粒鐘去做啲更高強度嘅運動,卡路里來說,會消耗得更多。但唔知點解,有點兒在意佢嘅說話,可能係因為佢兩母女都唔係健美型個隻,而由呢啲人嘅口講出來,真係無乜說服力。咁之但係既然無乜說服力,我又何必在意呢,係喎,哈。

記得小學大概一、二年班時,有一堂係圖書館堂,即係可以係課室個圖書櫃到借書睇,然後要做工作紙畫返有咩感想之類嘅功課。畫畫就一直唔係我拿手好戲(其實我都無乜咩拿手嘢),我好似要畫張凳有個人坐係上面之類,都係畫咗啲火柴人之類嘅東東啦。臨放學有個同學見到(其實到而家我都仲記得佢叫咩名,我真係好記仇),然後話我畫得好核突,之後我就一路行返屋企,一路係咁喊,阿媽安慰我話,把口生係人地到,人地鍾意講乜都得架啦,唔洗理人地咁多,云云。坦白講,我到今時今日先好似開始明白到(即係30年之後!?):只要有自知之明,別人講乜都唔會傷害到自己。就好似如果有人話你肥,而你明知你自己係肥,係要減,咁你唔會因為別人嘅呢句說話而搞到自己唔開心;但如果本身自己都唔覺得/唔認為自己係肥,別人一句說話就會令自己徹底崩潰。我又開始明白到:首先要徹底認識自己,有自知之明,從而有種自信可以慢慢建立起來。又例如:我跑步,跑得慢,所以我試下用低心率去練習,繼而我跑得比之前更慢去維持低心率,我盡量保持好挺直的姿勢去跑,盡量提高大腿,盡量減少著地嘅時間,而如果此時有人話我跑得慢,我只會笑而不語,因為只有我最清楚不過,自己在做什麼。

反之,都要提醒自己不能輕易地評論別人。在跑路上,有fit過我多多聲嘅人跑得比我更慢,我心諗咁慢架,仲慢過我不如返歸啦。但之後又諗,會唔會其實人地啱啱傷後練習,會唔會其實人地已經跑咗廿幾三十KM而咁啱係呢度俾我遇上,等等。

Don’t judge someone unless you’ve heard their story.

千里之行,始於足下。認識自己,做好自己,be a better me,就無愧。

喜歡我的文章嗎?
別忘了給點支持與讚賞,讓我知道創作的路上有你陪伴。

1

看不過癮?

一鍵登入,即可加入全球最優質中文創作社區