斟波!

註：呢段嘢，其實係之前已經寫落，貼咗上Tumblr一段時間。算係今次重新出發嘅頭炮，所以覺得應該要搬埋過嚟。

註2: 斟波，其實即係 Jump Ball，正式籃球比賽開始時嘅動作，用港式英語發音，就係「斟波」。用呢個題目嚟代表一個新嘅開始。

寫blog 呢，唔覺唔覺，原來前前後後都差唔多二十年。之但係咁耐以嚟成日都寫寫下龜縮，停多過寫，但係又硬係唔死心，成日都想開個新blog寫下。

結果呢，blog就開咗好多次，次次得個殼，唔係因為個layout整極唔啱心水，就係怕個題材唔吸引(其實都未寫)，又或者係喺度糾結寫中文定寫英文，總之就係揸唔定主意。(呢個係我嘅仆街個性，以後有機會再講)

其實好早一輪就已經有呢個idea寫關於作為老竇嘅日常嘢，呢個名又係撞啱識到一班鍾意打波睇波同玩fantasy league嘢老竇，於是用左呢個名開咗呢度。跟住，乜都未寫又走返去糾結用中文定英文寫, 第一篇寫啲乜…

如是者，就pandemic咗兩年。困左係屋企work from home兩年。去到呢排，由公司嘢到自己嘢都煩到痴線，世界又大亂，忽然覺得，𨳒，唔𨶙好理啦，諗乜寫乜算啦，以前覺得自己寫啲嘢係有人睇嘅，所以左度右度，而家，就當自己留個底啦，再唔寫返，睇嚟以後都唔會寫㗎喇。

以前睇過我寫嘅嘢嘅，都知道我不嬲都寫開白話文，好少寫廣東話；但係去到今時今日仲唔整多啲廣東話，遲啲我啲細路都唔知仲識唔識，諗諗下都係覺得寫返曬全部廣東話好，起碼叫做自己盡一分力，希望廣東話可以有咁耐得咁耐。

好！而家開咗個頭，睇下一篇幾時會再寫，同埋睇下會寫啲乜。