BBallDad
BBallDad

老竇當入樽 | Parenting in a Fanatic way 就是希望可以把對籃球的熱愛傳承下去的 Dad. 在現實也好, 在元宇宙也好… twitter @BBallDad8 discord njai#7639

其實,點解要嚟呢度?

咁難得先有一個機會去到一個新嘅地方,就應該好好享受呢個地方能夠帶畀你嘅嘢,唔好要求佢改變呢個地方而遷就你自己。大家一齊進步先至係對呢個地方最好㗎嘛!

喺加拿大咁多年,中間認識過好多新移民,或者離開咗加拿大好耐然後回流再回流嘅人。同佢哋傾偈,好多時佢哋共同嘅投訴,就係話加拿大嘅嘢好貴。然後又有一啲過嚟探親嘅朋友(其實呢,就好少人會嚟加拿大旅遊嘅,十個有九個半都係探親㗎啦)成日喺買嘢嘅時候都會話:「嘩!圍起成幾多幾多錢港紙喎!點樣喺度生活呀!」

其實有好多人嚟到加拿大之後,成日用住之前響原居地嘅眼光去睇加拿大嘅事物,於是乎慢慢產生好多不滿。其實你係為咗乜嘢去移民呢?我明白而家有好多人,尤其是近來移民或者「回流再回流」嘅,都係想去一個政治環境比較安定嘅地方;簡單啲講,就係去搵一個能夠安居嘅地方。

其實唔係淨係加拿大;無論你選擇去美國、去英國、去澳洲、甚至乎係其他嘅地方,你都唔能夠帶住你原居地嗰種眼光去睇呢個新嘅地方㗎……好似買嘢咁樣,喺加拿大同好多其他國家,都係需要畀消費稅;加拿大而家好多地方嘅消費稅係大概13個percent,咁即係話,買每樣嘢你都要畀多超過價格嘅一成三:例如你想買一部新嘅電話—當一千蚊到啦,喺稅嗰度你就要畀多一百三十蚊,唔習慣嘅人就會覺得:「嘩大拿拿百三蚊我可以去食餐好㗎啦!」於是乎就覺得呢度啲嘢貴咗好多。

但係有時價格嘅嘢,你唔可以攞去同其他地方嚟比較,始終每個國家,甚至乎一個國家入面嘅每個城市,都有自己消費嘅指數。例如喺加拿大買車一定會平過喺香港買好多,然後好多本地出產嘅必需品,好似牛奶呀嗰啲咁樣,都會係相對平嘅;但係如果你想食一啲東南亞出產嘅生果,好似榴槤呀、火龍果呀嗰啲,你要同香港比一定係貴到飛起㗎喎……

其實講到尾,你決定要移民離開你嘅原居地嘅時候,心態就應該去改變,唔能夠希望呢一個你移民去嘅地方,會同你嘅原居地嘅生活模式會係一樣。我見到有好多移民,成日沉醉喺自己原居地嗰種生活模,式然後猛咁話加拿大呢樣唔好嗰樣唔得;但係最終如果你原本嘅生活模式真係咁好嘅話,點解你會移民呢?

我唔係話移咗民之後就要將你以前嘅嘢全部忘記,移咗民就要洗腦……其實唔係咁㗎,尤其是喺加拿大呢個多元族裔嘅地方,本身係好尊重各種唔同嘅文化,啲人亦都好接納好多唔同嘅嘢。既然係咁,係咪都要尊重返本土本身嘅文化呢?

多倫多雖然係北美洲第四大城市,但係嚟過嘅都知道多倫多嘅地鐵系統係幾咁落後……呢啲完全係因為加拿大嘅政府係政黨輪替,所以如果冇人好堅持咁去要喺地鐵嘅話,一屆政府嗰四年其實真係好難可以拍板起到一個完善嘅鐵路網絡……不過我唔講呢啲住,想講嘅係,最近地鐵終於可以擴展去到一啲華人聚居嘅地區。政府宣佈咗之後,就有一啲市議員走出嚟喺度講話:幾十年前香港嘅地鐵點樣起,點樣發展上蓋物業,點樣令到政府唔使出好多錢;然後啟發到佢喺呢邊點樣奔走,點樣同唔同嘅部門磋商咁……佢好似就想將香港幾十年前嗰一套照板煮碗咁拎嚟加拿大;但係佢有冇諗過個環境係咪一樣呢?喺一個原本係安靜嘅低密度社區嗰度,夾硬塞一個幾棟樓幾十層高嘅社區,仲要係喺地鐵都未起好嘅時候就搬一大堆人入去嗰個社區,原區嘅交通問題點算?有無起新嘅學校同醫院去對應人口嘅增加?原本住喺嗰區嘅人會有幾高興呢?加拿大唔同香港,動工興土木呢啲,唔係話你叫啲工人加下班就可以趕得到,要做一啲咁樣嘅工程係有好多嘢要安排,好多嘢要做—冇錯你可以話呢度嘅人唔識轉彎,咁但係呢啲就係呢度人做嘢嘅方法,你憑乜嘢要人哋改變呢?

移民嘅生活的確係唔容易㗎,但係係咪就代表你就要將你原居地嘅生活倒模咁喺呢度再呈現返出嚟呢?如果係咁嘅話點解要移民呢?嚟到一個新嘅地方,唔係應該去嘗試融入呢個社會㗎咩?唔係要去搵一種新嘅生活咩?

我嚟咗加拿大咁多年,見過好多新嚟嘅移民,有好多都成日好眷戀住以前嘅生活;成日叫人寄嘢過嚟,食飯又一定要食唐餐;其實最好嘅唔係淨係爭取你自己嘅權益,而係要學識投入呢一個新嘅社會,再尊重別人嘅權益,你咁樣做先至能夠得到你自己能夠擁有嘅權益。

咁難得先有一個機會去到一個新嘅地方,就應該好好享受呢個地方能夠帶畀你嘅嘢,唔好要求佢改變呢個地方而遷就你自己。大家一齊進步先至係對呢個地方最好㗎嘛!

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论