香港傳奇財經評論員曹仁超先生講過: "有智慧不如趁勢" 呢個社區就覺得"趁勢發達都要有基本智慧" 虛擬貨幣，去中心化金融，區塊鏈技術都涉及相當的知識及理解。 如果無一定程度嘅理解，你就算選擇正確的投資平台或工具，都難免成為"韭菜"一族，任由鯨魚們收割。 我希望一點一滴咁為大家收集和分享每日全球科技金融的知識和新聞，每日為大家充值信念，陪伴大家做『踏浪者』去享受科技金融嘅樂趣和資產增值的機遇。
因緣際會
假使百千劫，所造業不亡；因緣會遇時，果報還自受
《大寶積經》卷57
一個人過去所造的善惡業報，不管時間多麼長，一年、百年、千萬年、一劫、百劫、千萬劫，乃至無限的時空，在業報還沒有還清以前，是不會消失的；自己過去造下的善惡業種子，因緣會遇的時候，還是要自己去承擔果報。
喺你人生中最低點嘅時候，有冇曾經埋怨過無人幫你一把？
其實真係好視乎你每日嘅一言一行，待人接物，有冇經常心存善念和感恩的心
“人在做，天在看”
上天永遠都有睇住你係前世今生即落嚟嘅”功德”同”業力”
“業力”(Karma)係每個人必經嘅苦難，呢個係你前世今生積落的”因”，導至生命中必需要面對嘅”果”
作為一個凡人，每日都係修行，當你今生人選擇逃避，來生都必須要在經歷同一個苦難
但係當你每日去到做好你嘅本分，有利他之心，心存善念，踏實咁去做人，上天冥冥中一定會有所安排
其實每一個人每日都有遇到”小困難”同”大困難”
有啲”小困難”只需要自己作出少許改變，肯正視面對問題本身就已經可以得到解決
有啲”大困難”則必須要面對近乎生與死的決定。
倘若你面對生與死的抉擇已經超乎你本人可以解決嘅程度，而又有一個人巧妙地被安排出現係你生命之中替你解決
呢一個人就係廣東話入面所謂嘅”做𣕧樑”
“𣕧樑”係中式建築入面用作分散整個屋頂壓力嘅結構部份
即係話屋頂所有嘅壓力都係透過呢一條”𣕧樑”全部減至最低，避免成間屋比天面瓦嘅重量壓至倒塌
即係話你呢一生人本來要成擔和承受的”業力”由呢位貴人分擔左
我自己本人生命之中亦出現過呢一位”𣕧樑”
幾年前我一個工程項目做到陷入非一般困局，整個地盤相繼發生 “天不時，地不利，人不和”的局面
我自己本人和團隊日以繼夜連續數個月去處理地盤都冇辦法改善狀況，成個地盤近乎崩潰邊緣
就喺近乎斷氣嘅一刻
一位德高望重，喺行業入邊有頭有面嘅前輩為咗幫我渡過難關”做𣕧樑”
呢位恩人佢捲起衫袖就跳落去渠入面同我一齊共事，佢舉一人之力同政府某署署長，佢旗下幾十名高級官員，甚至和香港著名地產商周旋到底替我解困
我呢一世都欠佢恩情
報答佢嘅方式，就係將呢位恩人嘅做人精神，繼續好好承傳落去，每日努力學習令自己進步，到上天安排的時候好好去為”真正”有需要幫助的人”做𣕧樑”
睇緊呢篇文章嘅你，不如發幾分鐘諗諗自己嘅”功德”同埋”業力”？
本文轉載自 ‘智慧社區 Wise Community’ Facebook 2020年7月18日貼文
喜欢我的文章吗？
别忘了给点支持与赞赏，让我知道创作的路上有你陪伴。
发布评论…