曜靈

筆名「曜靈」,來自楚辭《天問》「角宿未旦,曜靈安藏?」,角宿二星,曾被認為係天門,太陽昇起必經天門而出,屈原於是問太陽夜晚匿埋咗喺邊?太陽匿埋咗,唯有磨劍到天明。

筆記:張騫、西王母

週末講啲引人入勝嘅話題,吹下水。好多人都知張騫去過西域,但一講「西王母」,你會諗起乜呢?瑤池?羿?嫦娥奔月?蟠桃?「西王母」同張騫又有乜關係?西域又有咩地方?

《史記.大宛列傳》記載咗張騫用條命剌探返來嘅西域情報,當中有呢兩段:(唔想睇可直接跳過)

安息在大月氏西可數千里。其俗土著,耕田,田稻麥,蒲陶酒。城邑如大宛。其屬小大數百城,地方數千里,最為大國。臨媯水,有市,民商賈用車及船,行旁國或數千里。以銀為錢,錢如其王面,王死輒更錢,效王面焉。畫革旁行以為書記。其西則條枝,北有奄蔡、黎軒。

條枝在安息西數千里,臨西海。暑溼。耕田,田稻。有大鳥,卵如甕。人眾甚多,往往有小君長,而安息役屬之,以為外國。國善眩。安息長老傳聞條枝有弱水、西王母,而未嘗見。

上面講咗幾個地方名:

大月氏:被匈奴所迫,由敦煌祁連(古匈人語即天山)北遷到伊犁河流域,再南遷到阿姆河(即媯水,古希臘語稱 Ὦξος(Oxos),拉丁語稱Ōxus),大概喺今日烏茲別克土庫曼一帶

安息帝國:大月氏西數千里,西方史書稱其為帕提亞帝國(Parthian),裏海南,範圍及亞美尼亞、巴比倫、波斯,即大概今日伊朗

條枝:張騫喺安息聽一個長老講,條枝喺安息西再數千里,維基話中心區域喺敘利亞,覆蓋伊朗、美索不達米亞。西海明顯即地中海,弱水即幼發拉底河( Euphrates ),張騫懷疑幼發拉底河有可能即係《山海經・海內西經》中,出崑崙西南隅嘅弱水。

由地圖所見,條枝同埃及相鄰。假如推測西王母即古埃及女祭司 Sekhmet ,而條支實際係Egypt音譯,又唔算好荒謬,始終張騫無去過,都係聽人講⋯⋯

《山海經》中,對西王母有噉嘅描述:

「西王母其狀如人,豹尾虎齒而善嘯,蓬髮戴勝」(〈西山經〉)
「西王母梯几而戴勝杖」(〈海內北經〉)

對比下圖,Sekhmet嘅獅面、揸住權杖,同《山海經》係唔係有幾分相似?

古埃及女祭司 Sekhmet

大家要留意,西王母同古埃及嘅關係,真係只係推測,仲差幾萬里先到結論。但《史記》話張騫聽到西亞都有西王母,就好大機會係堅。

(寫於二〇二一年十一月六日,二〇二二年六月三日第一次修訂)


喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

〔轉載〕立場新聞:青銅時代新疆小河木乃伊 與古代北歐亞人基因上最親密

筆記:天竺、支那所指地域

芮姞簋銘文嘅 ▷◁ 係咩意思?

看不過癮?

一鍵登入,即可加入全球最優質中文創作社區