Tapakai Mintuha

Salawas baubah gawian manjadi supir trak, Palui rancak bulik tangah malam wayah anak wan bininya sudah guringan. Bisa jua inya bulik ka rumah wayah subuh atawa baisukannya. Tapi biar kaya itu, ngarannya supir biasanya kacakannya ganal, makanya bininya hakun haja ditinggalakan bagawi sampai batangah malaman.

“Abahnya..ui abahnya,” ujar bini Palui manggawil wayah Paluihandak tulak baisukan.

“Amun pian bulik kaina tulung basinggah satumat di Basarang, tukarakan kanas da-dua bigi. Pilihakan nang ganal-ganal wan nang mangkal haja, jangan talalu masak,” ujar bininya pulang.

“Gasan napa kanas ding, maka mandua bigi?” ujar Palui.

“Gasan napa lagi amun kada gasan mamancuk, mamacah liur,” ujar bininya.

“Baarti lampu habang kah?” ujar Palui pina kaciwa.

“Balum abahnya ai, masih lampu hijau. Kawa haja malam kaina saronde dua,” ujar bininya lihum.

Buliknya, wayah liwat Basarang, Palui basinggah di wadah urang bajual kanas di pinggir jalan. Ditukarnya dua bigi nang ganal wan masih mangkalmangkal, sasuai pasanan bininya.

Tangah malam Palui sampai jua di rumah. Anak wan bininya sudah guringan, lampu sudah bapajah. Dibukanya lawang bagimit, supaya anaknya kada tabangun. Imbah itu inya langsung masuk ka kamar, dilihatnya bininya nang guring bapajah lampu bapaling awak ampah ka dinding. Bagimit inya banaik ka atas ranjang lalu digawilnya bininya.

“Ding…ui ading,” ujar Palui manggawil.

“Aku handak managih janji baisukan tadi,” ujarnya.

“Ding…ding,” ujar Palui manggawil pulang, tapi bininya tatap haja kada manyahut.

“Daripada lapah manggawil labih baik aku lukupi langsung haja,” ujarnya dalam hati, langsung diragapnya bininya itu matan balakang.

Tuntung saronde, Palui bukah babasuh ka kamar mandi. Imbah tuntung babasuh inya takajut banar malihat bininya tangada baduduk di mija makan.

“Kanapa ikam babangun ding?” ujar Palui batakun.

“Babangun napa? Ulun dasar baluman guring abahnya ai. Ulun mahadangi pian bulik,” ujar bininya.

“Lalu nang guring di kamar kita itu siapa??” ujar Palui takajut.

“Ssssttt…, jangan ribut kaina sidin tabangun,” ujar bininya managur.

“Sidin siapa!?” ujar Palui makin takajut.

“Tadi siang mama ulun datang bailang, rancananya sidin handak bulik hari. Tapi ulun tangati karna sudah kakadapan banar, jadi sidin ulun suruh guring di kamar kita itu,” ujar bininya.

Langsung raum Palui mandangarnya.