nikkopputra
nikkopputra

Cinta Mayat

Kisah Palui Cinta Mayat

NGARANNYA hidup manusia pasti ada dua rasa nang ditamui, saling bartulak balakang. Ada suka, ada duka, ada bahagia, ada darita, ada sanang ada susah, ada sehat ada sakit. Kaya itu satarusnya dipargilirkan Tuhan.

”Ada kisah Bus ai, nang kada parlu dicuntuh ya?” ujar Palui manyurung pander ka Garbus.

“Kesah apa pulang ikam Lui?” takun Garbus.

“Waktu aku bahari begana di parantauan jauh di luar kuta dudul, ada urang cinta atas mayat,” Palui mamulai kisah.

“Napa Lui maksudnya, parcintaan atas mayat nitu?” takun jua Tulamak asa mamburinjing bulu awak.

“Artinya urang nang paling disayang maninggal dunia. Inya nitu mati laki, maka nang bini manangis manggarung kada sakira, mamukul-mukul dada, mancarik-carik baju, bahampas batilambung. Lakiku mati, kaya apa mahidupi anak sing banyakan wan masih halus-halus. Manangis kada sing ampihan nang bini nitu, maratapi laki nang sudah jadi mayat. Padahal nitu kada bulih banar, kada ridha atas takdir Tuhan,” Palui panjang libar bakisah.

Ngaran bapandiran di teras masjid ada nang mandagarakan, imam masjid Pak H.Arfian.”Bulih haja manangis mati laki, tapi nang sawajarnya Lui ai?” ujar sidin umpat bapandiran wan buhannya.

“Artinya jangan tarlalu manyasal maratapi kahilangan laki. Kadada laki, kadada lagi rajaki, kada kaya nitu pang,” Garbus manambahi.

“Iya kaya nitu am, bini kada bisa bausaha, jadi pas mati laki stres,” ujar Tulamak.

“Maka bila maratapi mayat katarlaluan nitu tadi, seakan kada ridha wan takdir Allah. Nitu bisa mati kafir kenanya. Makanya harus sabar manarima takdir musibah. Bila manarima takdir nikmat barsyukur. Iyakah Lui?” sambung Pak H.Arfian.

“Bujur Pak Hajia ai. Makanya rancaki ka masjid mandangar pangajian, tausiah, tiap Sabtu kamarian di masjid kita naya, ada Guru Kapuh Padang nang mambari tausiahnya, supaya kita sabar manghadapi musibah kamatian laki, kamatian bini atau kamatian nang kita sayangi, napa kita saurang gin cagar kana giliran mati jua, cuma balum sampai lagi iyakah Pak Haji?” sahut Palui.

“Iya Lui ai, makanya aku katuju banar buhan ikam batalu ne manyampatakan waktu salat bajamaah ka masjid, sudah nitu saling manasihati supaya baik berataan kita ne,” Pak Haji tarus bapander, manggut-manggut buhannya nang batalu nitu.

CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论