Sweet 爆Monday + 補回自我介紹

大家好,我叫Andrew,來自香港,昨天第一天加入Matters 太心急直接發帖,忘了來個自我介紹,小弟是一個快奔4,事業沒成,但有美滿家庭(未有小孩)的普通白領,喜歡帶家人去不同的地方旅遊感受異國文化及情懷.唯今年因疫情關係,已經被迫跟老婆分開快9個月 (我中港兩邊跑的), 希望疫苗能快點研發成功,等我早日等跟老婆團聚啦.好啦自我介紹就寫到這裡啦. 接下來就寫一下我今天Sweet 爆的一天 (我姐帶她兩個小孩來看我跟婆婆):

數下手指,我都有成個幾月冇見大小寶,感覺佢地一日比一日大,一日大得快過一日,上次見佢地既時候,小寶仲未好肯講野,大寶就已經識講好多野啦.

估唔到今次再見,小寶都學識一輪咀咁撩人傾計搏上鏡,真係笑死我.大寶就仲西利,而家係咁爆英文添,目測大寶英文己經有我7-8成,我諗到2021年個陣佢英文會好過我.

就即係咁,每次見到佢地,其實我都好開心,亦都好樂意同佢地玩到好癲.唯獨有一樣野係令我好勞氣,就係食飯,佢地由細到大都係每餐飯最少都要食一個鐘都未食到1/3,氹又唔得,鬧又唔怕你,打又唔捨得.所以佢地老母同埋我呢個舅父都冇晒辦法.

幾經辛苦,終於諗到方法迫佢地食飯,就係我同佢地講,如果媽咪同虎虎落去買完外賣返黎,你兩個都未食晒飯呢,就唔使旨意虎虎帶你地去NAMCO玩.

講完之後我就同我家姐落去買飯上黎食,嘿嘿,呢招果然好用,雖然返到上去佢地都只係食左9成左右,不過我都冇諗過佢地會咁聽話清晒碗入面既野,所以見食左9成我已經當目的達到架啦.

食完飯,咁我都會守承諾,帶佢地落去NAMCO到玩,佢兩個鬼馬囉,一知道有冇得去NAMCO係up to 虎虎,唔係up to 媽咪,就2個都要爭住拖住虎虎,果然係世界女.不過我內心都好甜既其實.

兩隻野一去到就對住個迷你迴旋木馬雙眼發光,得啦得啦,虎虎已經準備好張咭出黎同你地碌啦,兩位公主開心就好.

玩完迷你迴旋木馬,就同佢地玩下super soldier同掟彩虹,不過你知啦,小朋友邊識掟,其實都係比佢地兩個掟幾個銀過下癮,之後都係我地啲大人掟返,好在,衰衰地都比我掟中左個4等獎.唔使空手而回.

去完NAMCO,返上去繼續陪兩隻小寶癲,到5點零,又要氹佢地食返,今次冇得用NAMCO呢招,佢兩個就又作反啦,真係血都嘔埋,食到一半,佢阿媽話算啦唔好阻住我同我媽子就返去啦,臨走前小寶傻傻咁想自己開門,點知卡住左隻手指仔,跟住就勁喊,我地初時以為小寶夾親手,嚇到心臟病咁滯,後來知道係卡住左拎唔返隻手出黎我都定啲.都好,比個教訓小寶等佢知道門係唔可以除便玩.

送完佢地去坐車,我就自己買個外賣食,今日雖然超級攰,但亦都超級sweet, 渡過左完美一日