最孤獨位置

唔好意思，呢一篇想用我母語廣東話寫出嚟。

我都係打龍門，我好明白 Loris Karius 嘅感受，好多球場上嘅錯誤，自己會記一世，就算唔再打嗰隊、唔再打嗰個 level，甚至唔再打波，都會間唔中回帶。

雖然我好慶幸，冇喺人生最重要嗰幾場比賽，犯咗彌天大錯：前鋒犯錯或者太大想頭扭失個波好地地，空門射唔入亦都笑吓就算，龍門犯錯呢？就九成失波，累球隊輸波要誅九族咁滯。

事實上，係唔正常嘅人，先會揀去打龍門呢個位，紐西蘭曲棍球守門員設備生產商 OBO 一向有句 slogan：

Goalkeepers are amazing people!!

我非常之同意。

龍門企喺最後，係唯一可以睇晒成場波嘅位置，亦係場上面最孤獨嘅位置，我哋嘅感受，只有同行打龍門嘅先會明白。

最後我想講，我唔係利撚，不過都知道咩叫做，you will never walk alone，即使我尋晚喺網上，見到好多自封利撚嘅人，唔記得晒呢句嘢。

人喺最高同最低潮嘅時候，通常最容易見到自己真正嘅一面。