潮乜春
潮乜春

一個喜歡創作嘅宅人,希望可以用宅人眼光出發,講解日常的生活的大小事? 唔理係動漫、F1、科技、定係生活上芝麻綠豆嘅小事,星期六準時0000更新~

2021年度F1下半季簡單回顧

經歷咗大約三個半月,經歷咗10場比賽和1場『比賽』之後,雖然平治車廠仍然可以八年霸,但車手總冠軍則由MAX取下,亦都可以算是送給本田的最後一份禮物。不如一齊回顧下下半年發生咗咩事啦~

2021年下午年嘅F1賽季,應該算係近呢五年來最精彩嘅賽事。不如一齊回顧下發生咗咩事。

2021年F1最終賽程表

經歷咗三個星期暑假之後,我哋去到目前為止都仲係最長嘅賽道:比利時SPA賽道,經歷咗一場都唔知可唔可以叫『比賽』嘅比賽。首先講排位,雖然FP1同FP2雨勢仲未大到未能夠比賽,但係一去到FP3,我哋見到嘅係傾盆大雨。而不幸嘅係更加係Norrris 通過咗著名嘅Eau Rouge 到Raidillon嘅時候失控,雖然沒有太大傷勢仍然可以繼續比賽,但係可以見到這個意外的恐怖程度。但正所謂有危就有機,我哋見到嘅係William 嘅 Russell 竟然可以排到第二名起步,再一次證明佢嘅實力唔係差。之後去到正賽日,我哋見到嘅係滂沱大雨,甚至乎比賽之前嘅天氣預測都預計整場比賽會喺雨天作賽。正當我準備好爆谷睇比賽之際,大會宣布由於天雨關係延遲起步,不過都算係意料之中。隔咗大約20分鐘之後,大會嘗試一圈熱身圈之後起步,但結果係兩圈熱身圈賽道情況過於惡劣,大會便用紅旗迎接各位車手回維修區休息。跟住經歷咗大約180分鐘之後大會決定再用安全車帶領起步,但可惜天氣情況仍然惡劣,根本難以進行安全的比賽,所以便宣布終止這場比賽。嚴格上來講,整場比賽只有完成一個圈,總比賽距離只有6.88公里,但總比賽時間卻接近4小時,成為史上最短比賽距離和最長比賽時間的比賽。但其實如果根據FIA體育規條入面列明,比賽需要有最少兩圈才能成為正式比賽,所以這次FIA是不是搬龍門就交代大家決定。

比利時站最快最快圈速、Driver of the day得主:平治掃水車(X

下一站,我哋去到闊別左35年嘅荷蘭。呢條賽道嘅特色就係係近呢10年入邊我哋都好少見到嘅鑊型彎。作為荷蘭人嘅MAX,呢度係佢嘅主場,就好似佢屋企後花園咁,所以無論係自由練習到正賽,我哋都見到一片旗海係支持MAX。正如我係上面咁講,因為呢個賽道嘅特色就係獨有嘅鑊型彎,現役車手我諗除咗冰人Kimi同Alonso 之外應該無其他人有經驗,所以我哋見到係三日入面各位車手都有唔同嘅走線,但係當中亦都有唔少人甩尾。至於比賽,基本上都毫無懸念,係主場觀眾嘅支持下,MAX輕鬆取得冠軍。

之後我哋返到去速度天堂:意大利Monza,今站亦都係今年第二場短途排位賽舉辦嘅地方。經過正常排位賽之後,大家熟悉嘅33 44 77 呢個組合又出現。但係去到之後嘅短途排位賽,我哋見到HAM少有嘅犯錯,令到佢跌到第五名紅線。去到正式比賽嘅時候,今年第二單受爭議事件發生了。本來領先的MAX進行了一個11秒的Pit Stop,之後HAM進行Pit Stop時也花了接近5秒的時間,引致HAM回到賽道的時候遇到MAX。正所謂:鷸蚌相爭,漁人得利。雙方在1號彎也不讓對方,引致MAX撞到HAM,MAX整架車彈起並壓着HAM車頂,但幸好有Halo保護,但可惜嘅係兩個人也要雙雙退賽。結果冠軍的是自從2018年摩納哥分站之後便沒有再勝出嘅四萬哥RIC;而且亦都係自從2010年加拿大分站之後麥拿倫車隊再一次包辦頒獎枱的冠亞軍。

#ThankyouHalo

跟住我哋去到一場以為會好悶嘅地方:俄羅斯索契,但係因為自由練習同排位都無乜太特別(雖然HAM係Q3罕有地出現失誤,但係我覺得都係唔夠正賽精彩,所以我哋直接跳過)。去到星期日比賽時候,其實開頭嗰41圈,老實講我真係覺得好悶,不過睇嚟今年每站也有Netflix 嘅加持,彷彿好似每一場都要有啲意外出現。去到第42圈嘅時候,竟然開始落雨,由最初嘅毛毛細雨去到滂沱大雨,車手被迫進入Pit更換半乾濕車軚。結果今集最精彩嘅事發生啦,就係結果由第四起步嘅HAM勝出,不過最厲害嘅係,由最後一位起步嘅MAX趁着落雨混亂同埋車隊嘅優良計劃,竟然去到第二位,真係一場充滿驚喜嘅比賽。

跟住我哋返到去舊年都有進行過比賽嘅溜冰場:土耳其伊斯坦布爾賽道,不過呢條賽道都係因為疫情影響先至可以再次係各位眼前出現。不過今站比賽其實都算係有啲悶,雖然保子BOT可以一雪前恥,不用像去年一樣一起步便自轉,而且MAX繼續穩定地奪得亞軍,但是整場比賽比較似係策略多過車手技術。今年比賽像往年一樣,都係係一個半乾濕嘅情況下舉行(雖然我不明白為什麼VET要換乾地車軚表演溜冰),大部份嘅排位主要都係係Pit Stop期間改變,實際在賽道上進行的爬頭超車動作相對較少,所以其實都有啲悶。雖然去到比賽末段HAM進行Pit Stop時已經知道不能拿取冠軍,但是OCO卻達成了一項成就,就係歷史上第一位不進行換軚情況之下完成比賽距離最長嘅車手,雖然最後都接近爆軚邊緣,但這一次幸運女神彷彿站在他身旁。

之後我哋闊別兩年再一次重回美洲土地。容許我偷一偷懶,將呢一站美國站同下一站墨西哥站可以混合一齊講,因為實在太夜,其實我係無完整睇晒比賽,雖然我之後都有睇返重播,但係我都覺得係好悶嘅比賽。我覺得以今年下半年來講,對於呢啲高速比較少彎同埋比較高海拔嘅賽道,始終都係對本田最有優勢。我哋可以睇到無論係正廠隊紅牛定係副廠隊AlphaTauri 都係有絕對嘅優勢,甚至乎可以話係完全放甩對手,即使平治車隊出盡渾身解數都仍然與分站冠軍有一段頗大的距離,所以我相信這就是本田引擎勝出的方程式。墨西哥站都係歷史上第一個墨西哥車手PER能夠在主場登上頒獎台嘅車手。

離開墨西哥之後,我哋去巴西,亦都係今年最後一站舉行短途排位賽嘅分站。喺排位賽之後,我哋見到HAM因為尾翼打開幅度超過FIA的要求,所以取消排位賽成績;另一方面,MAX又手多多,喺完成排位賽之後走咗去摸自己同HAM架車個尾翼,雖然只是輕輕一碰,但因為已經違反咗當中的比賽規矩,所以信封也要受罰。去到今年最後一場短途排位賽,HAM雖然又最後一位起步,但憑着出色嘅表現,順利追到第五名衝線,但因為更換了引擎部件,所以星期日的正式比賽需要退後五名起步。去到星期日正賽,HAM在一次穩定地表現出七屆世界冠軍的頭銜,趁着多次幾會追到第二位。但之後發生了今季其中一幕最受爭議嘅事件發生了(為什麼今年好像每次有短途排位賽的週日正賽日也有很多奇怪的事情發生?)HAM係直路後面準備轉彎時MAX比較延遲剎車,導致雙方也跑出賽道外範圍。雖然FIA最後是覺得沒有問題,Let them race,但HAM要額外花多十圈才成功爬頭,不過最終亦有驚無險奪得本站冠軍。


Let Them Race 1.0 ?_?

之後我哋去到最後三站嘅賽區,中東地區。首先,我哋去到對於MotoGP車迷肯定唔會陌生嘅Qatar 賽道。現役車手雖然有PER同MAZ曾經喺呢度比賽,但睇黎對於整個比賽無乜太大作用。喺比賽之前,有唔少車隊表示由於準備時間太短,佢哋連喺電腦上面模擬比賽賽道都趕唔切,所以有唔少車手係當日FP1先至第一次接觸到整個賽道情況,導致到好多車手根本難以短時間內適應,繼而難以改善時間。係自由練習同排位嘅時候我哋可以見到平治基本上係毫無懸念,但有邊個諗到正賽嘅時候會黎個180度反轉。排位賽末段因為有車手無視雙黃旗減速,所以引致車手需要退後起步。雖然冠亞軍仍然係我哋熟悉嘅44、33組合,但係第三年就有闊別咗頒獎台七年嘅Alonso奪得。無可否認,今站佢嘅光彩絕對蓋過前面兩位,首先係因為佢自2014年中國站比賽之後相隔七年再次登上頒獎台;其次就係因為佢嘅養軚能力。去到比賽末段我哋見到佢嘅車軚已經接近爆裂邊緣,但係佢仍然努力將戰車駛向終點線,相比其他車手,無爆軚其實真係算佢好好彩,所以我覺得今站對佢來講除咗係實力之外,亦都唔可以缺少運氣成份。

第21站,我哋去到一條全新嘅賽道:沙地阿拉伯吉達『街道』賽。點解我要用『引號』特別註明街道賽?因為某程度上佢完全唔算係一條合法行車嘅街道,一年前嗰度都仲係一個海邊,一年之後就成為咗比賽場地,而部份賽道要明年先至開始開放比所有車輛行駛,所以算唔算得上街道賽,相信大家都心知肚明。而且基於明年舉辦世界盃,所以明年唔會舉辦;更甚嘅係有傳2023年會搬到一條長達7.5公里嘅賽道進行沙特阿拉伯比賽,所以呢一個賽道極有可能只會係大家眼前出現一次。排位唔講啦,直接去到比賽。大家預期第一圈會發生大炒車嘅情況無出現,結果要去到第十一圈先至開始出現狀況。首先係MSC撞牆,引發安全車,HAM同BOT進行Pit Stop,而MAX留起賽道,成功奪去第一名,然後賽會竟然出示紅旗,令到所有剛剛進行Pit Stop嘅車手嘅優勢瞬間化為烏有,亦都代表尚未換軚嘅MAX可以獲得一次免費換軚機會。休息一陣之後,比賽再開始,不過今次起步,再一次發生嚴重事故,四車相撞,三架車需要退下火線,引致到紅旗再次出現。但係起步之後MAX同HAM因為再次擦槍走火,令到OCO順利奪得第二名。係之後比賽暫停期間,我哋竟然聽到紅牛同大會喺度講數,雖然結果係紅牛願意將MAX退後兩格起步,排係OCO同HAM後面,但係因為佢已經轉咗做中性車軚,所以一起步又再一次取回頭位。之後HAM雖然有多次接近可以爬頭的機會,但因為其他濕滑嘅司機不停引起意外,VSC不停彈出又彈入,令到HAM每次接近嘅時候也不可以爬頭。終於去到第37圈,因為MAX利用賽道範圍外爬頭,導致需要於同一圈讓出頭位,但係呢個時候就發生咗全季最戲劇性嘅一幕,就係MAX突然減速,HAM 收制不及,撞到MAX。雖然好多人會問,點解MAX突然減速後HAM沒有爬頭?但係根據賽後報告我地得知,當時FIA只係通知咗紅牛,仲未通知平治,所以導致到呢個情況出現。當然你可以話既然MAX減速,HAM絕對係可以爬頭。但係呢個就牽涉到下一個問題,就係大家都唔想先通過DRS偵測點。結果係大約10個圈之後,HAM成功超越MAX,進占第一位直到比賽結束。被爬頭的MAX,可以睇得出佢心灰意冷,逐漸被被HAM拉開。至於第三位,就要去到最後一段直路靠DRS先至分出勝負,結果只係爭千分之一秒,由BOT 力壓OCO取得第三,大家熟悉嘅44 33 77組合再一次出現,呢個亦都係短期內最後一次出現呢一個組合。經過呢一站之後,HAM同MAX車手積分完全是一樣,呢個亦都係F1歷史上相隔47年之後第二次兩名車手以相同積分進入最後一站比賽。

Let Them Race 2.0 ?_?

經歷咗21個賽站,踏遍世界四大洲,由本季第一節FP1起步第260日之後,終於去到今季最後一站比賽:阿布達比大獎賽。係比賽之前,賽會為咗俾大家可以睇到更多爬頭機會,便將部份賽道更改成一個連續的彎道。去到排位賽,我哋見到紅牛同平治洗盡渾身解數爭奪頭位起步,結果紅牛MAX奪得頭位,HAM緊隨其後。去到星期日正賽嘅時候,本來以為用紅軚起步嘅MAX會有優勢,結果比HAM遲了千分之一秒起步,雖然之後係六號彎發生意外,但賽會因為想讓他們自由比賽,所以不作出任何處分。本來以為HAM可以輕鬆奪得冠軍,但想不到的是,他竟然應驗了自己一年前所說的話,就是:這條賽道是一條需要長期集中精神的賽道,應該去到比賽末段才會有意外發生。結果第54圈,William LAT失控在14號彎撞車,安全車繼而出現,HAM剛好過了Pit Stop入口,所以不能入Pit,但身後MAX剛好在Pit 入口前面,可以進行一個免費的Pit Stop。本來以為會以安全車終結,但最後結果竟然係賽會決定最後一圈重新開始比賽。HAM使用用了接近45圈的白軚對戰MAX剛剛換上全新的紅軚,結果重新開始比賽嘅時候,MAX輕鬆取得頭位,並且延續優勢衝過格仔旗,代表2021年一級方程式總冠軍係屬於Max Verstappen,亦都係歷史上第一個荷蘭籍車手取得一級方程式世界冠軍。

2021年F1曲終人散

今季都可以算係一個近年來最精彩嘅比賽,我諗就算放完暑假之後,當初都無人會諗到今年竟然要去到最後一站最後一個圈先至分到今年嘅冠軍誰屬,不過呢個亦都係點解我鍾意睇賽車運動嘅原因,因為一日未衝過格仔旗,一切都有可能。咁就簡單回顧咗今年下半年比賽嘅情況,不過因為我都知道今次篇幅真係太長,咁就未能夠攞幾件事出嚟再講下,所以就大家等多幾日,我會盡快完成。

最後亦都希望大家可以慷慨解囊喺下面拍五下手,支持我繼續創作嘅原動力,多謝。當然亦都歡迎喺下面繼續討論(土下座

CC BY-NC-ND 2.0

Like my work?
Don't forget to support or like, so I know you are with me..

2020年度F1賽季回顧

2021年度F1上半季簡單回顧

Loading...
3

Want to read more ?

Login with one click and join the most diverse creator community.