繁殖功能

身體早已7癆8傷嘅我,應該得返個繁殖功能,勉強仲用到,至少呢一刻,肚入面仲陀緊對孖B.

頭先同個教會姊妹食Lunch,我大住肚自不然,傾吓女人嘢,佢話個仔俾人問有冇兄弟姊妹,佢好唔開心(但其實會唔會感性得濟),因為覺得個仔好孤獨,然後佢2公婆,試幾年都未有第2個,世事就係咁,我唔想生,我老公就要生,結果,第2胎打孖嚟,當然呢個係福份,我都唔敢亂怨啲乜,但睇住呢個姊妹,揹住個基督徒身份,講明唔試IUI或IVF,咁最後,我除咗話會為呢位姊妹祈禱,然後喺個ToDoList入面,Mark好下個月關心同跟進吓之外,已經唔知仲可以為呢位姊妹做乜好.

真係俾佢拖多幾年,連個繁殖功能都退化埋,真係乜都唔駛再諗嘞,女人個子宮真係唔係玩到好多年㗎喳!上年出面打到膨膨聲,我自己真係冇咩心情,唔信心再度繁殖,不過老公大家族,個個女人過咗門就係咁變曬生仔機器,婚前都預咗會生,不過就冇諗過,生完一個,會再逼我催我生多個,不過諗諗吓,擺多幾年先再想有,都驚變高齡,可能到時要搞齊所有人工方法先再有BB都唔定,所以上年年尾先試吓.

面對住每日疲備不堪嘅身體,去到而家30週,真係就快死得,生仔先唔講女唔女權,淨係講副Body,除非你堅決唔要小朋友,如果唔係我覺得「有仔趁嫩生」係有佢嘅道理.