停咗喺4月20日

今朝刷牙,唔知係咪熱氣,有少少牙血,每次見到牙血,就諗起姊妹教落,出去曳曳前,只可漱口,唔可以刷牙,諗吓諗吓心血來潮,睇返同男神個Whatsapp,我同佢,最後嘅通話時間,停咗喺4月20日.

之前斷斷續續個個禮拜都會講2句,湊仔經又好,邊到有口罩賣又好,自從俾我發現,佢出面有SP之後,大家就冇再聯絡過,反而喺停車場,久唔久會撞到佢太太.

尷尬?定怕我會爆佢大鑊呢?點解我又唔搵佢呢?因為我好想上演一場肥皂劇,我望住佢對眼,同佢講:「如果你唔同我嚟幾次,我就爆你大鑊. 」我怕,我真係會忍唔住.

上網睇好多男人話,對大肚婆特別有興趣,成日幻想男神都有呢個特殊僻好,未有BB前我對自己都有多少信心,不過個肚越陀越大,身體嘅變化,連鏡都唔想再照,同人搞嘢只可以停留喺發夢同幻想入面.