香港傳奇財經評論員曹仁超先生講過: "有智慧不如趁勢" 呢個社區就覺得"趁勢發達都要有基本智慧" 虛擬貨幣，去中心化金融，區塊鏈技術都涉及相當的知識及理解。 如果無一定程度嘅理解，你就算選擇正確的投資平台或工具，都難免成為"韭菜"一族，任由鯨魚們收割。 我希望一點一滴咁為大家收集和分享每日全球科技金融的知識和新聞，每日為大家充值信念，陪伴大家做『踏浪者』去享受科技金融嘅樂趣和資產增值的機遇。
契弟與洗腳水
有一日，兩個有錢佬喺中環一路行，一路吹水
有錢佬A: 呢個世界我真係覺得樣樣事情，其實有錢賺，實有人肯做
有錢佬B: 我又唔同意得哂，如果唔講錢都可以令到人肯做，呢個先至係最高境界
有錢佬A: 邊有可能唔用錢叫到人做嘢呀？你諗吓，我整盤洗腳水放喺度，喺成班人面前叫你浸塊面落去，你估有冇人肯？調返轉，如果你放低十皮八皮，肯定有勇士即刻做
有錢佬B: 咁如果我可以唔使錢，可以叫到人浸埋面落洗腳水度，你有乜嘢獎勵我先？
有錢佬A: 如果你做到，我即刻過十萬蚊比你，再認你做大哥，你以後叫我做契弟
有錢佬B: 哇，玩到咁大！？好，challenge accepted!
有錢佬A: 調返轉，如果你輸咗，疫情解封之後就請我一家人去日本旅行。我好想去食Omakase。
有錢佬B: 好啦，就應承你。話時話，今日下晝你有冇嘢做，呢排我搞緊KOL Model應徵，喺我赤柱間別墅度搞，你有冇興趣一齊嚟睇睇？
有錢佬A: 有啲咁好嘅嘢你唔一早同我講？限聚令咁耐，悶到我發癲，好在我哋老婆成班去咗打麻雀，而家先有得鬆一鬆，啲咁好嘅野梗係預埋我啦！
於是，兩個有錢佬急急腳就上咗車直飛去赤柱別墅。
去到別墅，有錢佬B嘅得力助手，已經安排晒20個靚女KOL換好晒泳衣，企晒喺泳池邊等緊
唔知呢排係咪因為全國工廠停工嘅關係，定係比限聚令困得太耐？
有錢佬A今日見到個天空特別藍，d泳池水特別綠，啲靚女特別靚，啲靚女皮膚特別白滑，頓時小鹿亂撞。
有錢佬B嘅得力助手，已經安排左所有尺寸嘅VILEBREQUIN泳褲俾兩位老細換衫落水玩
說時遲，那時快，兩個老細已經即刻換好衫跳落水。
成間別墅頓時碧波蕩漾，水花四濺，嬌聲四起
快樂不知時日過，就快到5點鐘，兩位老婆就快打完麻雀嘅時間
有錢佬B: 喂，上水啦契弟！
有錢佬A: 死佬，叫咩我契弟啊！
有錢佬B: 你連洗腳水都飲埋，唔叫你契弟叫邊個？一陣揸車返去嘅時候記得過10萬蚊比我
有錢佬A: #%^*^{%#]#，你個仆街仔陰我
有錢佬B: 哈，你情我願，我唔係叫仆街仔，快d叫我契哥。不過，我都承認我係有陰你，你頭先唔止飲洗腳水，我頭先懶得上水，所以喺你則邊忍唔住屙咗尿
有錢佬A 慘叫一聲，即時沖入廁所拎李施德林狂𠺘口
有錢佬B喺門口大笑: 你一陣唔好借d易用匯豐張Red 卡打錢入我TNG錢包，一陣害我比人查就死。我收Bitcoin同USDT都得
近期比特幣價格上升，好多騙子都蠢蠢欲動，大家認真要提醒自己
其實金融騙案好多時都係偷換概念，喺大家嘅盲點度出手，到最後好多事主比眼前美好嘅景象蒙蔽，講到高回報，無風險，自動獻身，最尾輸到入肉
本文轉載自 ‘智慧社區 Wise Community’ Facebook 2020年5月19日貼文
喜欢我的文章吗？
别忘了给点支持与赞赏，让我知道创作的路上有你陪伴。
发布评论…