動畫 - 魔法少女小圓 - 魔法少女まどか☆マギカ

冇諗過10年前嘅一套動畫會顛覆我對魔法少女系列嘅想像，可能我對於魔法少女嘅想像只係停留於30年前高田明美做設定小忌廉之流又或者美少女戰士咁，若果唔係網台主持推介，單睇人物設定作畫我一定唔會睇，不過睇多少少又發覺佢加入一啲圖案平面設計戰鬥場面，美感安排上邊又有啲唔同。

能夠成為日本電視動畫史上獲得最多獎項包括星雲獎及14項大獎嘅作品，編劇虛淵玄嘅作品絕對值得你留意。

照樣係五個女仔，有師姐型、有朋友型、有冷酷型、有桀驁不馴型，一樣有吉祥物，成個設定熟口熟面，但係睇睇吓就發現：咦～有啲唔同喎。

成為魔法少女最基本嘅條件就係你有一個願望想實現，吉祥物就會幫你實現願望又令你成為魔法少女，繼而去打魔女，點知過冇兩集就發現點解有人死嘅，點解魔法少女唔夢幻嘅，你會發現咁暗黑嘅，咁顛覆嘅，絕對唔對路，甚至乎最後有啲佛偈添。又逆熵、又拯救宇宙、又因果，有幾多希望就有幾多絕望，縱有神通，不敵業力，要擺脫輪迴，就要超脱生死。

一連12集，一集半個鐘，若果你好耐都冇再睇魔法少女，甚至乎好似我哩種停留喺舊有魔法少女印象嘅，絕對適合你睇一睇，必定刷三觀。

By the way，Netflix 有得睇。