Maakali Sate

Kisah Palui Maakali Sate

SALAWAS pindah ka Banjar Palui wan kaluarganya makin pusang karna kada sasuai wan anjuran bubuhan kakawanannya.

Bubuhan kakawanannya mamadahakan asal hakun bagawi pasti banyak haja lowongan dan nyaman mancari gawian.

Apalagi upahnya larang-larang dan dapat gajian saminggu sakali.

Tanyata imbah pindah ka Banjar banyak banar tantangannya. Bujur haja banyak gawian tapi mamburuh di pabrik, banting tulang peras karingat bagawinya siang malam.

“Kalu kaya ini ngalihnya mancari gawian nang nyaman, baiknya kita bulikan ka banua haja umanya ai. Bagawi siang malam hanya cukup gasan baras iwak haja, kada kawa manukar baju salawar anak,” ujar Palui bapander wan bininya.

“Sabar abahnya ai, ikam tahu saurang bahwa kadada urang itu hidup nya­man, hidup sugih bakakajutan. Banyak buktinya. Bubuhan konglomerat itu samunyaan bakisah bahwa hidupnya matan basandal gapit jua, basapida buruk, bajual kacang, mamburuh atawa manjadi pasuruh tuku,” ujar bini Palui mandinginakan hati lakinya.

“Tapi hakun hajalah ikam hidup sakit?” ujar Palui.

“Sudah tajalani, tapaksa ai disandang. Mudahan kaina sampiyan kawa jadi kapala gudang maka kawa jua mandapat labihan uncuinya,” ujar bini Palui.

“Itu nah anak kita nang ampat ikung itu saban hari batagih macam-macam,” ujar Palui.

“Wajar haja kakanakan batagih macam-macam, paling-paling minta tukarakan kacang, es, jagung atawa permen, kada biasa jua inya managih minta tukarakan mutur,” ujar bini Palui.

“Samalam inya minta tukarakan sate, wayah rombong panjual sate itu liwat di sini. Tiap ikung minta dua bilah, kadada nang hakunnya sabilah haja. Sabilah haraganya Rp500, makanya ampat ikung, jadi 8 bilah kali Rp500, Rp4.000,” ujar Palui.

“Sampiyan tukarakanlah abahnya?” sahut bininya.

“Tapaksa kutukarakan. Tapi kuakali, aku manukar ampat bilah haja, lalu bilahnya kutatak dua dan tiap bilah kutusukakan talu hiris talu hiris, jadinya sabilah kawa dijadiakan dua. Himung banar kakanakan makan sate dua bilah saurang sasuai kahandaknya,” ujar Palui tatawa.

“Ooo… jadi abahnya kawa mahimat Rp2.000 karna hanya manukar sate ampat bilah haja. Berarti 4xRp 500=Rp2000, lalu mana labihan Rp2.000 lainnya?” ujar bini Palui managih karna labihan itu adalah hak umanya.

“Kalu kaya itu sama haja umanya ai, aku kada jadi mahimat,” ujar Palui tapaksa manjulung duit labihannya.