Bunus 10 Tahun

Kisah Palui dan Bunus 10 Tahun

ZAMAN baubah banar damini. Kalau dahulu umur manusia ada nang sampai saribu tahun, wayah ini bila mangaku umat Nabi Muhammad SAW paling tinggi kapala tujuh sudah Innalillahi.

”Cuba lihati Bus, banyak damini nang mati mandadak, iyakah Bus?” takun Palui.

“Dasar bujur Lui ai, kada kawa dipanglah ujar ikam nitu?” sahut Garbus.

‘Sabulan lalu mamarinaku, buhannya ai, maninggal dunia kada garing-garing. Dikira guring, sakalinya subuh maninggal dunia sidin,” sahut jua Tulamak.

“Umur manusia nitu dibagi talu Bus ai, Mak ai,” Palui handak mayakinakan.“Apa artinya nitu Lui?” takun Garbus.

“Saat ini kita barada di akhir zaman buhannya ai. Cuntuh nyata adanya kamatian mandadak nitu, kemaksiatan marajalela, parjudian, mabuk-mabukkan, parzinahan, korupsi, wan lain-lain kemaksiatan. Urang kada supan lagi Mak ai. Jadi kiamat sudah parak,” Palui kaya urang betausiah haja.

“Umur nang dibagi talu tadi apa artinya Lui?” Garbus kada puas jawaban Palui lagi.

“Uh bujur, tahap partama umur manusia 18 tahun. Bila sudah lewat umur nitu artinya umur manusia panjang sudah. Cuba lihati banyak kalu nang mati masih bayi, atau balum sapuluh tahun, iya kada Bus?” Palui manjawab partanyaan Garbus.

“Iya Lui ai, nang kadua apa?” sahut Garbus.

“Kamudian umur manusia nang kadua baumur 40 tahun. Jadi manusia bila sudah baumur 40 tahun labih, jangan disambat anum lagi inya,” Palui malanjutakan.

“Tapi nang ngaran manusia umur 40, asa anum haja, iya kalu Lui?” sahut Tulamak.

“Bujur Mak ai, lihati haja ikam di tempat diskotik, nang bahampas buyang, nang besaung ayam, nang kemaksiatan lainnya, banyak nang manggawinya baumur 40 tahun ka atas,” sambat Palui tagas banar.

“Imbah umur 40 tahun, apalagi Lui?” Garbus lanjut betakun.

“Nang katalu umur manusia 70 tahun. Kalau sudah baumur 70 tahun ka atas nitu manusia disabut tuha atau jar urang wayah ini manula, manusia usia lanjut. Nang ngaran lanjut ikam tahu saurang, kada nyaman lagi dijapai. Umur 70 tahun berarti 10 tahun dapat bunus umur dari Allah Taala,” Palui tarus kaya urang tausiah inya.

“Banyak haja kalu Lui, umur manusia saat ini 70 atau 80 tahun?” Tulamak betakun jua.

“Ada haja pang. Mungkin kada banyak kaya bahari lagi, saku? Jadi kita bararasa haja, bila sudah umur 40 tahun nitu, sudah jam talu siang, siapa tahu kada sampai ka Asar maninggal dunia, kaya nitu jua umur, siapa tahu isuk baisukan kita wafat, makanya jangan marasa anum tarus diri. Makin sahari, makin satahun, parak sudah masuk kubur, akibat kecelakaankah, akibat serangan jantungkah, atau akibat apakah, nitu urusan Tuhan wan diri kita masing-masing,” Palui kali ini nang mancaramahi kawalnya.

“Tarimakasih Lui lah, kami dibari ilmu,jadi ada jua rem-remnya kalu talalu laju ibarat basapida mutur,” Garbus asa suka, Tulamak lihum. Jadi buhannya saling manasihati dalam bekawan.