Galas Ka Muha

Galas Ka Muha

Di wayah ini Palui nang kaya urang jua. Inya kada mau katinggalan lawan kakawalannya, ka mana bubuhannya baramian bajalan umpat tarus. Kada tahu ka diskutik atau ka karuke, Palui pasti umpat. Saban hari Palui lawan kakawalannya dugem. Saban hari jua bulik limpat tangah malam. Ada nang sampai ka subuh, hanyar Palui sampai ka rumah. Bini Palui biasa haja, apalagi mandangar alasan Palui bulik tangah malam.

Tapi lawas-kalawasan munyak jua bininya. Apalagi duit gasan di rumah samakin ngalih. Palui makin baengken mambari gasan di rumah, sabab duitnya banyak kaluar gasan baramian. Satiap kali bulik ka rumah tangah malam, bininya langsung bamamai. Tapi, Palui tatap haja ka luar rumah lawan kakawalannya. Macam-macam sudah Palui baalasan, bininya tatap kada parcaya sampai ahirnya bininya minta sarak.

Mandangar bininya minta sarak, tapaksa Palui kada wani bulik limpat tangah malam lagi, Samingguan ini paling jam sabalas inya sudah bulik. Satiap dibawai kakawalannya ka diskutik inya salalu manulak, macam-macam alasannya supaya kada tasupani lawan kakawalannya.

“Kanapa Lui, ikam rancak manulak amun dibawai dugem,” ujar Garbus mambuka pander.

“Kada papa Bus ai, aku samingguan ini haur banar. Samingguan ini aku harus bangun baisukan, marga ada nang digawi,” Palui manyahuti.

“Kada mungkin Lui ai. Aku lihat ikam baisukan ada haja di rumah, kada kamana-mana,” ujar Garbus pulang.

Sambil bagamat tapaksa Palui bakisah nang bininya satiap hari bamamai satiap inya bulik landung ka rumah.

“Itukah masalahnya, kalu nang itu gampang haja,” ujar Garbus. “Dahulu aku rancak jua disariki bini. Lalu ku cari akal supaya biniku kada jadi sarik, maka sabalum biniku bamamai aku badahulu mamamai biniku wayah inya mambukakan lawang. Coba ikam pang kaya itu,” ujar Garbus mambarikan jalan kaluar parsualan nang dihadapi Palui.

“Uuuu… kaya itu lah Bus? Aku cuba, mudahan kawa maatasinya,” ujar Palui.

Malamnya langsung inya mamparaktikakan papadahan Garbus tadi. Sampai di rumah, Palui langsung mangatuk lawang. Bininya, nang balum guring basyukur Palui mau sudah bulik sungsung lalu bahancap mambukakan lawang.

Palui langsung bamamai lawan bininya. Mandangar Palui bamamai, bininya tatawa haja. Dalam hati bininya, biar bamamai asal bulik sungsung. Palui mangira, karna bamamai itu bininya kada manyarik lagi.

Isuk harinya Palui kaluar rumah pulang. Marasa bininya kawa diatasi, kalakuannya tabulik pulang. Sampai kakawalannya batakun, kanapa Palui wani bulik tangah malam pulang.

“Lui, kada disariki bini lagikah,” ujar Tuhalus.

“Gampang urusan itu,” Palui manyahuti.

Kada kaingatan lagi wan kada tarasa sambil manikmati hiburan di diskutik, Palui lawan kakawalannya sampai ka subuh. Marasa kada cagar dimamai bininya, Palui mambawai kakawalannya guring di rumah.

Nang kaya biasa, Palui mangatuk lawang gancang banar lalu siap-siap mamamai bininya. Sambil manahan sarik bininya mambukai lawang. Kada sawat Palui bamamai, bininya badahulu manawakakan galas ka muha Palui.