Baliur Basi

Kisah Palui Baliur Basi

Kabiasaan si Palui wayah tangah hari inya musti bulik ka rumah. Kada basasalin baju lagi inya langsung duduk di mija makan.

“Ui umanya lawaskah lagi? Aku sudah kalaparan banar nah,” ujar Palui.

“Nih nah parak ai masak, tunggui ha satumat lagi,” ujar bininya kukuciak matan dapur Palui.

“Si Pulai mana jua pina kada talihat?” ujar Palui batakun.

“Tuh lagi guring pina pulas banar pang.”

Panasaran lalu dijinguknya ka kamar. Bah dasar nyanya banarlah guring anakku ngini, ujar Palui lihum.

“Tapi kanapa pina basah bantalnya,” ujar Palui takajut. Baparak diitihinya lalu inya kaluar kamar.

“Bah bapulau bantal umanya ai,” ujar Palui bakuciak mangiyau bininya.

“Nangapa maksud pian bapulau bantal ngitu, kada mangarti nah,” ujar bininya.

“Itu nah si Pulai guring baliuran,” “Bah baya liur tuh haja, liur anak saurang pulang,” ujar bini Palui.

“Tapi, baunya nitu nah nang aku kada tahan, inya guring sakamar lawan kita kalu,” ujar Palui.

“Kalu bau kada usah dicium,” ujar bininya.

Rupanya mandangar uma abahnya bakakarasan, si Pulai tabangun.

“Nah ini nah urangnya, urang kalu guring tu di tukup muntung supaya kada balilihan liur di bantal nak ai,” ujar Palui basasarik.

“Ulun kanyanyamanan guring, kada marasa pada baliuran,” ujar si Pulai sambil malap liur basi.

“Bakukumur kah dahulu sabalum guring tu,” ujar Palui bamamai.

“Sudah gin abahnya ai, kaina diganti haja ulas tilamnya,” ujar bininya malawanakan si Pulai.

“Diganti kaina diliurinya pulang,” ujar Palui.

“Tapi kada usah bamamai kaya itu pang, mauk aku mandangarnya.” ujar bininya bamamai jua.

“Aku bingung, kanapa ikam maka bamamai ka aku?” ujar Palui batakun.

“Sualnya, ulun rancak baliuran jua malah rancak tatitik ka baju pian,” ujar bini Palui mancilingi lakinya.

“Ooh… Jadi ikam juakah? Pantas ai tiap bangun guring bajuku basah wan babau liur basi, ujar Palui kada wani malawani lagi. Lamun kaya itu aku guring ka lain ai,” ujar Palui bajauh sambil bagaru kapala.