來傾下,澳門--東區-2詳規,即新城A區--範圍

睇返原本個新城A區,係一個島式填海,合乎中央批覆的要求,但而家東區-2,已經同澳門半島填埋左,中間的水道做左公園.

首先要面對的問題係,明顯呢個唔係中央批比澳門的填海範圍,要填埋佢就需要再同中央申請,原本的島式填海,對於海洋生態都做過研究,而家唔再島式,又有冇做過反證的研究?而申請又需要幾耐?唔知,反正規劃年期係跟總規的,即係到2040年,係2040年前做,都算係合符規劃預期的.

填左,又有咩問題?

首先最重要的係生態,但大家都知果到現況係有名的臭水溝,雖然同現時澳門雨污未有效分渠排放有關,整好條渠,做好監控,跟手整到好似南、西灣湖咁,係可以一獲過搞掂的.但係地下渠網覆雜,要搞又要大塞車,果邊又要賽車,又A1橋落橋位,又P地段,又輕軌東線,一大堆工程,搞埋地下管網,市民都好難接受呢個所謂的光明前的黑暗期.但題外話,黑沙灣地區又唔係澳門最原始的土地,都係一個填海區,點解啲渠都係搞到咁?當時雖然未係好流行"共同管道",但雨污分流都未做好,而且果度仲有個污水處理廠喎......

再來,就係少左海岸線,一般情況下,對於藍(水)綠(山)呢啲天然資源,係現代規劃思維下,係應該好好保留,或創造的,填海就係少左條唔適合親水(水質唔充許)的近水岸線,而A區規劃係有留一條環A區的綠帶,好彩冇左呢段都仲有一大段.

填左,又有咩好?

最重要的係,會多左個超級大公園,呢個大公園會係連接A區同澳門半島的重要媒介,而且會係一個重要的全澳性公園,如果可以結合目前已係度棲息的露鳥,作為生態同埋運動公園踩下單車打下波玩下飛盤放下風箏(唸下都開心),以及適量的商業文娛活動.提高個綠化數據,同時係會提供到澳門人目前冇的生態體驗、運動、休閒同舒壓的選擇.

再來,佢係會對交通有一定的改善,因為中間有賽車路徑同友誼大橋,雖然最後都可能以橋的形式連接,但落橋位置就可以有所選擇.(最後中央唔比填或者搞好多年都唔知得唔得,咁呢啲大型建設係咪要改????)

講到呢度先~~有咩想討論下可以留言