明史爆谷（2） 不抵抗廢老與他的十六號愛人

我以前是冠軍 怎會慣 做後備愛人 曾經 也上到最高 逐漸滑落 谷底的暗，呢兩句歌詞，大家都好熟悉，但係感受最深嘅可能係幫萬曆生咗一仔一女嘅孝靖王太后⋯⋯

萬曆四十八年七月廿一日，五十六歲嘅朱翊钧終於駕崩啦，死後，佢同孝靖太后及好多唔同嘅陪葬品葬喺定陵，但，一生中最愛嘅鄭貴妃，始終都無辦法都佢合葬，呢個或者就係為人君最大嘅無奈⋯⋯

驚濤駭浪之下，唔得神宗歡心嘅朱常洛終於做到皇帝，同上集提過嘅朱常洵，雖然都係萬曆嘅精蟲，但待遇完全唔一樣，原因就係因為朱常洛嘅老母，一生中只有幾日時間得到萬曆嘅甘露，導致呢個大哥待遇遠遠唔及細佬，今集我地試下通過孝靖太后嘅出身，了解佢悲慘嘅一生⋯⋯

首先，王恭妃後來嘅孝靖太后雖然係明光宗嘅媽媽，但係佢屋企其實都幾窮，爸爸王朝寀係一個正六品百户，絕對稱唔上咩達官貴人，但到底點解佢可以成為幾人之下萬人之上嘅貴紀呢，根據明史列傳第二 ．后妃二，記載「孝靖王太后，光宗生母也。初為慈寧宮宮人。年長矣，帝過慈寧，私幸之，有身。」

佢初時入宮，只係太后宮中其中一個宮女，神宗去慈寧宮同太后請安，無意中比呢個宮女吸引咗，就係呢一眼，佢就幫朱翊钧生咗後來嘅光宗，嚴格黎講，朱常洛係一個意外，發現呢件事嘅係神宗老母李太后，神宗原本諗住爽完就算，結果當然東窗事發，太后問佢嘅時候，朱翊钧仲一心諗住逃避責任，期間試過隱瞞、扮唔記得，後來因為李太后拎本日記出黎同佢對質，實在無辦法先立王氏做紀子，可以見到萬曆其實真係當佢係路人甲，係一個一夜情嘅對象， 雖然佢後來仲幫神宗生咗四公主，但萬曆對佢始終都係差少少感覺，而從來都無認真投放過感情落呢段關係入面，初期都只係無feel ，到後來更加變成討厭，將王恭妃軟禁喺景陽宮，連明光宗都唔可以隨便見佢，王恭妃空虛寂寞涷，每日起身就只能夠以淚洗面，最後仲喊到盲咗，死之前果排，佢終於見到光宗，但兩母子仍然都無機會盡訴心中情，根據文秉《先撥志始》記載：

「 光廟進候，鄭貴妃令人尾其後，孝靖張目欲有所言，見之，曰：「鄭家有人在此。」遂無語，至是崩。」即使王恭妃人之將死，佢嘅對手仍然無打算放過佢，由呢個例子可以見到，身在皇宮從來都唔係身在福中，甚至隨時會有生命危險。

鬥生鬥死，王恭妃死後九年，朱翊钧嘅大限都到啦，1620年，明神宗駕崩之前，為自己往生嘅幸福，做咗少少掙扎，喺遺詔度要求同鄭貴妃一齊長眠於地下，結果都係因為禮教問題而不能夠成事，但係以朱翊钧嘅性格，就算真係泉下有知，都只會訓喺另一邊就算，而唔會反抗，因為佢無抵抗嘅基因，佢用咗一世時間去逃避責任去證明自己對手下嘅官無辦法，對制度更加無辦法，其實優柔寡斷嘅萬曆好適合做一個宗室，可惜，上帝要佢做皇帝，但佢又比唔到有用嘅掙扎，或者佢身邊需要嘅唔係王恭妃或者鄭貴妃而係胡師傅。