My little detour - 《嘩， 又多樣經驗了🤣， 不過用錢換的》

琴晚偶有感到傷口抯住痛， 所以瞓得麻麻地。 點知今朝有感銀包將會受到酷刑， 所以仲痛。 講緊係我琴晚無啦啦發現眼鏡有的唔妥， 好似個形變變哋， 仔細一睇， 原來眼鏡嘅耳臂不知何解似在欲斷難斷， 僅有一絲連結咁痴住。

無法啦， 唯一諗到係試下問下homestay host有無AA膠啦。 點知今朝一攞上手， 都未用力掂落去已經斷埋， 仲要唔係鏡架原有接駁位。 我個腦不斷喺到諗...我仲有幾對con呢， 如果真係有AA膠痴住又可以捱多幾耐呢？

落到去見到兩個host整緊早餐， 佢地雖忙我都攝左句問有無AA膠， 好彩佢地有， 不過我話唔急， 食埋早餐先攞。 今日早餐係手造麵加琴晚已經開始煲嘅湯底， 仲有清蒸西蘭花加汁同埋腌菜三味， 最開心係食完個麵仲可以加白飯入的湯到食。 但奇怪喇， 點解食漢堡會仲飽呢？ 食完早餐後， host好好幫我痴AA膠， 但痴完佢話應該都唔捱得幾耐， 同埋痴完之後枝臂摺唔埋， 真係好頭痕。

跟住返房hea左陣， 等到差不多兩點先出去攞衫， 但我行緊中途醒起佢係2-4pm休息， 咁我會唔會去到無得攞呢？ 我唔知， 去到先算。 好彩， 佢未收檔食晏， 我順利攞完衫就去斜對面買兩隻蕉先返去 （3 peso), 再行過買左三隻蛋 （6 peso)諗住做晚餐。 好喇， 換返件短袖衫我又出去周圍騰， 其實今日target係去optical shop 問下行程， 睇下如果配眼鏡大概幾耐先有得攞。 因為諗諗下， 如果真係target去一年， 副膠框眼鏡應該頂唔順， 所以問定都好。但由於都不太趕， 所以都係以亂行為方針。行行下突然好想食dona isabel的曲奇， 咁啱又比我行到museo textile de mundo maya, 所以就去左細間的dona isabel麵包鋪， 點知無左我最取想食的yoyo曲奇， 唯有求其買塊曲奇加個包就算 （8.5 peso), 一路行一路食仲比我行到去market, 我一路睇人地擺檔賣咩， 一路搵下有無我需要啦嘅野， 又咁好彩比我買到枝本地AA膠傍身 （5 peso)。

到咁上下， 我諗要開始去搵optical shop。 我記得住第一間hostel時有見過optical shop, 於是循返嗰個方向搵， 之後經過一間libre cafe, 其實之前都有望下邊到有朱奶飲， 今次睇中呢間。 入左去發現朱古力同mocha差唔多價錢， 所以揀返mocha (33 peso), 點知外賣要加3 peso， 佢問我話佢鋪頭好free, 不如坐低飲啦。 又好， 其實都幾好味， 最後以40 peso作結。繼續行我又走左入精品及民族服飾鋪， 又手痕買左個側孭， 叫住自己唔好買， 但30 peso呢個價錢確實好難忍， 咁買嚟代替恐龍仔出街都好， 因為我驚恐龍仔就爛。 

正當我搵極搵唔到， 而又諗唔起optical shop係邊個位， 我唯有又進入亂行狀態。 皇天不負有心人， 終於比我搵到。 原先只係諗住問定下價錢同埋完成時間， 以便去到下一個城巿的眼鏡鋪時心裹有個底。 間野好正， 佢地道門係鎖住， 要佢地入面剔起個勾先入到去。 我好快就spot到一副， 問左1500 peso一副。 我再睇埋另一副都唔錯， 有的心郁。 咁我當然嘗試問左幾時有得攞先， 因為我明晚就走， 如果明天趕唔起， 咁我亦唔需要呢到配。 佢本來話星期一， 見我話搭明晚夜車， 佢地好好話明天比我。 咁當然循例我都會問有無得平， 佢本身話唔得架， 我講多幾講見佢心軟， 我篤計數機propose 1300 peso, 佢還返1400 peso, 最後我再話1350 peso ok la, 佢諗左陣肯呢個價錢比。 當我再問碌卡收唔收charge, 佢話收， 加埋admin charge 係1500 peso。 點解要咁對我， 我咁辛苦先撳低個價， 而家又變返1500 peso。 於是我用楚楚可憐嘅眼神望佢， 佢心軟後開價1400連charge。 ok, 扑槌， 就係咁， 我地展開左一場雞同鴨講的驗眼過程。 佢呢到無嗰的睇熱氣球度數機， 一嚟已坐低睇下的字清唔清楚。 搞左一輪， 佢本身想配兩邊475比我， 但似乎同我原本度數有少少距離， 我就問佢係咪應該配多少少， 因為我之前度數都唔足（但眼鏡度數高過而家）， 佢再tune一輪問我暈唔暈， 我話ok之後就乖乖繳費等明天捚眼鏡 （1400 peso)。

再去買多兩隻蕉 （3 peso)就返hostel hea左陣就去整晚餐， 即係咩都無， 只有未熟的本地牛油果、3隻蛋加一隻蕉。 由於個牛油果未熟好硬， 我食左少少就扔了。 跟住到hosts佢地再加多個老友煮晚餐， 為左唔阻人， 我決定飲埋杯啡返房。 返到房後host叫我， 原來佢地炒的鴨腎有預埋好， 點解咁好人架？ 佢地以鴨腎同nacho加牛油果醬招待我地，我仲試左韓國soju溝啤酒添， 原來又唔難飲架喎。 大家仲傾偈（我係聽）到凌晨12點幾， 最後我頂唔順諗住執同洗完少少野就返房， 但佢地太好客， 叫我唔好執， 直接返房就ok, 人太好了吧！

已用：1495.5 peso （1400 peso debit card = hk 589.93)

3 peso 兩隻蕉

6 peso 3隻蛋

8.5 peso 曲奇+包

5 peso本地萬能膠

40 peso Mocha 

30 peso側孭袋 

1400 peso 眼鏡 （debit card)

3 peso 蕉