無色炎
無色炎

一個正在重新學做人的聰明的笨蛋

由藝術愛好者/創作者角度出發的當代藝術批評

我覺得美係一種好嘅價值,而追尋美係一種對於好嘅價值嘅追求。因為藝術(創作同欣賞)體現到一啲美好價值(嘅追求),而藝術先有佢本身嘅價值同意義,並值得人花心思時間精力甚至窮盡一生心血喺藝術上面。

以下思考圍繞視覺藝術、純藝術,而唔係關於建築、詩詞歌賦、戲劇嗰啲

對當代藝術抱有的種種疑問使我諗到問題的根源,或其實只是探討問題的方向其實係咪在於藝術以外的領域,例如哲學和心理學。但戴返頭盔先,一嚟我唔係呢啲方面嘅專家,我只係一個鍾意思考同有時會睇下書嘅人,哲學書好難睇所以我只係睇過少少,主要認知來源都係中大通識堂同上網睇人點講(例如荼毒室),或者喺其他類別嘅書入面提起過,例如《時間的秩序》有講啲時間哲學,Ecco Homo睇咗少少但本書而家喺人哋屋企,同埋佢係「自傳」,最近先開始借啲藝術哲學嘅書嚟睇。

咁樣引申正去下一個問題,點解要從外部介入?主觀咁諗,從個人意見、經驗咁講,只可以話我覺得係因為現代藝術已經令「藝術」in general變成一樣同我哋原先理解嘅好唔同嘅嘢,唔知可唔可以話完全唔同,傳統保留落嚟嘅技術、實物、紀錄令我哋仲有個ground去質疑呢一兩個世紀藝術嘅轉變。但藝術已經空泛到乜都係藝術之後,我最關心嘅問題似乎係藝術有咩價值?多過藝術係乜少少,但藝術定義都好重要,可能係教育意義上嘅重要,因為學校基本上冇乜分傳統藝術同當代藝術,只係分藝術嘅型式然後入面再細分,或者呢個可能係我而家讀緊呢科、呢間學校嘅問題,或者係當下藝術學院嘅一個普遍現象。因為真係有人做conceptual art喎,寫咗啲instruction咁嘅嘢同埋用啲冇乜花心思嘅方式印啲顯示唔到佢quality嘅surreal相/poster出嚟,我完全唔識去評價佢做緊嘅嘢喎,因為我係好傳統㗎喎,我幾乎唔覺得conceptual art係art,覺得係只係受到社會影響,出自於我藝術嘅本能我唔識本能地欣賞conceptual art,可能我欣賞個行動或動機,但唔認為佢係藝術。所以我都嘗試睇一啲藝術哲學嘅書,睇下啲人(例如Kant)點諗藝術嘅起源,人點理解藝術同美感,點樣係美,藝術價值係乜之類。

「藝術只不過係過程、激發思考嘅途徑」嘅問題、失去/沒有本質的東西?

Suppose一個學問係有啲友提出問題然後用邏輯、實驗等唔同方式去揾答案,呢件事可以花好長時間,關係到好多人去問關於同一個問題嘅唔同面向之類,並且得到嘅結果係用嚟話畀自己同將來抱有相同疑問嘅人做答案/參考。如果當代藝術,已經變成著藝術係一個過程(我有啲同學認同,我唔否定我覺得藝術可能係過程,但我諗所謂過程係有唔同定義,例如係乜嘢嘢嘅過程,目的地係乜嘢),咁當代藝術係點justify自己,作為藝術而唔係另一樣嘢,或者學校點解唔首先分開當代同傳統(雖然佢哋唔一定係對立,但而家係有啲亂)。雖然對於「如果唔係藝術又係乜」呢個問題未有答案、但唔代表人類唔可以建立新嘅concept將啲古靈精怪嘢塞落去。

所以有個位嘅邏輯我都仲梳理緊就係一樣嘢可唔可以用嚟反對自己,即係A可唔可以係A嘅反例?反對者?挑戰者?好似John Berger定邊個講過(未揾得返)挑戰傳統嘅嘢入咗美術博物館之後就變成佢所反對嘅嘢。所以挑戰傳統藝術嘅藝術已經入晒博物館,變成另一種傳統,但佢哋本身存在嘅意義只係為咗挑戰藝術呢個概念,或某藝術形式嘅話,即係佢本質係挑戰嘅話,而家已經挑戰完咗,咁佢存在嘅意義已成歷史,再做啲同佢本質+方式一樣嘅嘢,好似都冇意義,咁新嘅方向係咩呢?明顯係科技。但唔係個個都想走科技路線㗎嘛?好難可以否定傳統嘅傳統藝術㗎嘛?點解做conceptual art嘅人仲有一絲立足之地,都係令我好奇嘅地方。因為if and only if? 藝術變成只係為咗推敲/思考,但呢個只係推敲/思考嘅方式嘅唔係藝術本身,而且用莫名其妙嘅視覺藝術嘅方式,比起用戲劇、文學等有時間、敍述性嘅方式,顯得好冇效同唔清晰,並唔可以成立為一種學問,所以我越嚟越唔知當代藝術嘅價值係乜,或者唔明藝術學校老師諗乜。所以藝術係唔可以冇功能以外嘅嘢,即係一啲本質。好似有啲遍離,用返之前另一種講法如果藝術係決定於藝術世界嘅話,我就更加唔明點解差嘅藝術仍然受到接納同肯定。

藝術有一種出於內在價值嘅追尋?

當然點定義靚係一個問題,但物理主義啲咁睇件事,靚係應該有啲科學根據,例如構圖、顏色等傳統視覺藝術着重嘅嘢。而我反對學校跟隨現代、後現代嗰一套嘅原因可能係在於我覺得美係一種好嘅價值,而追尋美係一種對於好嘅價值嘅追求。因為藝術(創作同欣賞)體現到一啲美好價值(嘅追求),而藝術先有佢本身嘅價值同意義,並值得人花心思時間精力甚至窮盡一生心血喺藝術上面。

而你上世紀開始違反人體、大腦/心靈經驗去挑戰點定義美,恭喜,而家視覺上嘅醜都係一樣視覺上嘅美,但視覺上嘅美就唔會永遠唔會係視覺上嘅醜,係冇全盤推翻到。所以fake/ready made/performance art/ relational art之類仍然有機會係真藝術,但要視乎點execute,而唔係點用語言justify。

而打破咗舊嘅價值之後,唔覺有建立到新嘅價值,至少「大敍事終結」後,藝術變咗一樣融入社會嘅嘢去問啲當下嘅問題嘅時候,佢本身都冇咗自己追尋嘅價值,因為佢追尋嘅佢以外嘅價值,例如平等、自由呢啲,冇藝術品仍然成立嘅嘢。藝術成為咗空殼。

所以對於我嚟講個問可能係,點解我哋當代所「信奉」嘅藝術,仲容許顯示唔出有藝術上價值/意義追尋嘅嘢成為藝術品?

由於冇受過極嚴格嘅哲學訓練,以上邏輯都未必清晰甚至有矛盾,歡迎提出意思/指正。

P.S. 仲未對當代藝術厭倦嘅人應該會鍾意藝術學校mindset,厭倦嘅可能會好似我咁不停批評同揾料批評。😂 老實講學校應該要ban咗啲可能係所謂avant-garde嘅產品🤣🤪因為老實講,今時今日有咩老土得過「前衞」?

CC BY-NC-ND 2.0

學而不思則罔,思而不學則殆。 請鼓勵我畀心機睇書LOL

Loading...

Want to read more ?

Login with one click and join the most diverse creator community.