InterPlanetary File System (IPFS)

承接上一個post嘅預告，今次想分享一下Blockchain 3.0呢一項技術，叫做Interplanetary File System (IPFS)， 中文名叫做星際檔案系統。由Protocol Labs 團隊的 Juan Benet 2014年設計

IPFS呢個名，聽落好似好陌生，但係我相信香港人其實對呢個技術理論唔會唔熟悉，特別係80後同90後。

點解咁講？

想當年正版電影由大牛龜LD碟變為VCD/DVD碟，本來賺版權費應該發大達，但係老翻碟鋪天蓋地嘅出現推冧左成個電影業市場。

當時，撈開偏嘅油尖旺浩南哥即刻唔使賣白粉，全部華麗轉身轉行做文化推廣大使，賣老翻碟。

將西方電影海量引入香港街頭，再將香港電影帶到深圳羅湖商業城再推廣去到全中國十幾億人口， 所以中國無人不曉周星馳同劉德華

呢個文化推廣浪潮，造就咗無數嘅千萬富翁，人人有錢搵，人人發大達，當時嘅所有持份者都深信呢條水理應可以食到子孫萬代。

可惜好景不常，打遍天下無敵手嘅油尖旺浩南哥躋身福布斯富豪榜嘅夢想比一位90後叫做Bram Cohen美國青年喺2001年打碎。

一個你我熟悉嘅技術叫做BitTorrent出現咗，簡稱BT.

一瞬間，所有後生仔女唔再去好景商場嘅三樓同四樓，又唔去信和先達，全部留喺屋企做毒L 上去資源分享嘅討論區搵種子下載西方大片同東洋文藝電影

而BT技術就係IPFS技術嘅雛型

BT 同 IPFS技術類同， 都係將上傳檔案加密，打散，再上傳到分散式網絡上面。變相越多人有呢個檔案，就越快下載完，幾GB嘅檔案都可以一兩個鐘內免費下載完成。

當你屋企添置一個IPFS嘅家用式Server，server入面嘅儲存空間可以自由斬開，唔用嘅空間就可以共享上雲端比大家, IPFS機制可以將Server入面嘅檔案分散上傳去到一個分散式雲端空間。

就算你老媽子倒咗杯水落你個server都唔使驚，因為你入面嘅檔案已經上晒雲端，除時可以下載返.

而且佢最勁嘅功能係用嚟取代行咗三十年嘅HTTP網站嘅入口。

以後嘅Facebook網可能會叫做 IPFS://www.facebook.com，因為各公司係可以轉用呢個分散式儲存空間去永久上傳及管理網站，唔需要再怕DDoS攻擊，因為再無中央Server。亦唔會再怕死Server唔見晒客戶資料。變相大大減輕網絡公司嘅成本,亦解決咗保安問題。

另外網站傳輸速度將會大大加快，因為你嘅web browser 會選擇最近距離嘅礦池存取網站資料。

IPFS的實用性係將會顛覆成個網絡世界。

而管理雲端礦池嘅礦主或者share 家用式IPFS Server嘅你都有電費同網絡費用要交，所以獎勵機制就應運而生，呢個就係FileCoin。

Filecoin於2017年曾進行首次代幣發行（ICO），共集資約2.57億元美元（約20.17億港元），資金來源包括曾投資蘋果、Google的紅杉資本（Sequoia Capital）及Andreessen Horowitz等天使投資公司，為有史以來金額最大的ICO。

當你share 得越多空間同Bandwidth，就等於你挖緊礦，你就會獲得FileCoin作為回報。

Protocal 團隊已經宣佈左今年5月11日至5月17日就會做埋Final Net Test， 如無意外就會喺今年9月或之前就official launch.

所以成個幣圈界都對呢一個項目引頸以待。

今日嘅龍頭大佬亞馬遜會唔會玩埋一份，定係步浩南哥後塵，比新科技淘汰？

本文轉載自 智慧社區 Facebook 2020年4月19日貼文