WiseCommunity

香港傳奇財經評論員曹仁超先生講過: "有智慧不如趁勢" 呢個社區就覺得"趁勢發達都要有基本智慧" 虛擬貨幣,去中心化金融,區塊鏈技術都涉及相當的知識及理解。 如果無一定程度嘅理解,你就算選擇正確的投資平台或工具,都難免成為"韭菜"一族,任由鯨魚們收割。 我希望一點一滴咁為大家收集和分享每日全球科技金融的知識和新聞,每日為大家充值信念,陪伴大家做『踏浪者』去享受科技金融嘅樂趣和資產增值的機遇。

投資,移民與情感

近日我和身邊的同輩或長輩討論香港前景,大家都愁雲慘霧,話題離唔開移民及資產轉移分散風險等等

當然用個風險配置的角度,資產搬離開香港似乎是無可避免的考慮

至於移民的選擇,則屬於個人對未來前景,生活環境及人生安全的考慮

由於小弟在外國居住了八年,見盡全世界華人在海外生活的喜與樂和哀與悲

今日希望用呢一個版面和大家分享一啲唔同的角度去睇未來的選擇

先從資產轉移的角度去討論

我知道一位前輩當年在80,90年代有在越南和金邊等地投資房地產項目,時至今日當年的投資已經賺到盤滿缽滿

今日呢位前輩和我講,眼見香港前景堪輿,想將所有香港本地資金及資產全部賣掉移離香港。

我同佢講:「我覺得你需要抽離一啲去睇成件事。」

前輩問:「我唔明你講緊咩意思?可以點樣抽離?」

我:「其實你有冇諗過全世界冇一個地方係基建咁完善,本地居民學歷同工作能力都咁高嘅城市?對於呢個地方嘅不穩定變化,我同你在個人情感上一定會首當其衝非常負面。」

我:「你先回想一下,當年80年代金邊同越南飽受戰火摧殘,本地人生靈塗碳,終日以淚洗面。喺你拎住美金去到當地投資大手購買別墅房地產項目嘅時候,有冇花過1秒鐘為本地人嘅不幸流淚?你可能曾經有半秒鐘諗過當地嘅人好可憐,但你花更多嘅時間擔心你投資落去嘅美金有冇高速嘅回報增長。」

我:「你要抽離一啲咁睇,正當我哋香港人對前景非常之徬徨,海外揸住資金投資嘅實力玩家正在向香港虎視眈眈。有咩投資好得過國際一級大城市出現經濟動盪從而趁低吸納本地資產?因為任何政治動盪都總有一日平息,有實力嘅玩家就會趁你跌低嘅時候吸納你哋嘅資本等待升值。」

「就以當年你去投資金邊同越南嘅行為去分析,我相信你都唔會形容自己為一個”冷血”嘅人。因為呢一個行為係與”感情”冇任何關係,只是一個投資的動機。」

至於移民問題,我和朋友有以下的分享:

如果移民,你必須要有以下嘅問題問一問自己:

1. 今次移民的目的?是為了小朋友?還是為了逃避見到香港的改變?還是決心改變生活方式,尋求安穩的生活?

2. 自己是否正值人生的黃金時期?

3. 自己是否對工作晉升和尋求工作滿足感有所期待?

4. 自己是否接受得到十年如一的生活節奏?

5. 自己是否可以接受得到外國社會的種族歧視和”看不見的天花板”?

因為我喺外國生活嘅時候自己親身感受到好多前輩喺九七回歸前移民到海外,喺外國生活穩穩定定,但毫無成就感,因為文化差異問題,工作上永遠入唔到核心。反而他們的兒女作為第二代華人就有可能融入得到。

外國整個社會的生活節奏非常緩慢,朝九晚五,十年如一。每個星期例行工作就係最期待星期日返教會和朋友崇拜,之後和朋友一同回家聚餐睇電影傾偈。最多耐唔時會一同去露營。

與外國人唔同,華人一般都要身邊有個錢先至覺得安心。但由於當地工作收入大部份要交稅,實質儲蓄並唔多。每日都要節衣縮食擔心一旦失業的話,可維持整體家庭生活能力就會出問題,所以都比較慳儉。

至於移民為咗逃避見到香港嘅改變?我同你講,你去到外國因為時間太多,一定有思鄉病,,現代科技資訊咁強大,你會花更多嘅時間去了解香港變化。想當年我哋會買隔日嘅香港報紙睇,會租香港三色台嘅錄影帶翻睇再翻睇。

移咗民嘅前輩們每每收到香港的同學親戚或朋友的消息,知道他們在工作上的成就和日常生活的多姿多彩,心裏面總是不是味兒。每晚睡在床上望着天花板都不禁自問:「我當初的移民決定是否正確?」

之後就好快說服自己係為了孩子的快樂成長空間所以移民。

所以我嘅睇法係將資產短暫移去海外作為風險管理係一個合適嘅考慮,但必須要留意整體經濟同政局嘅變化,唔好放棄考慮香港的資產投資。

至於移民嘅考慮,如果你無小朋友的話,大可以接受留喺本地繼續生活唔好走。因為有能力移民嘅你,在工作上理應有唔錯嘅表現,去到外國等於要放棄一切。

大宅就算換咗主人,佢依然係大宅,只不過入面住嘅人的生活方式一定會變。

好多個國家喺歷史上都有無數嘅人經歷緊我哋香港人依家嘅心情。就睇你會唔會識得調整心情和記憶去面對改變。

#移民

#資產轉移

#走一條不後悔的人生路

本文轉載自 ‘智慧社區 Wise Community’ Facebook 2020年6月3日貼文


Like my work??
Don't forget to support or like, so I know you are with me..

CC BY-NC-ND 2.0
1

Want to read more ?

Login with one click and join the most diverse creator community.