WiseCommunity
WiseCommunity

香港傳奇財經評論員曹仁超先生講過: "有智慧不如趁勢" 呢個社區就覺得"趁勢發達都要有基本智慧" 虛擬貨幣,去中心化金融,區塊鏈技術都涉及相當的知識及理解。 如果無一定程度嘅理解,你就算選擇正確的投資平台或工具,都難免成為"韭菜"一族,任由鯨魚們收割。 我希望一點一滴咁為大家收集和分享每日全球科技金融的知識和新聞,每日為大家充值信念,陪伴大家做『踏浪者』去享受科技金融嘅樂趣和資產增值的機遇。

陳師奶與偷拍狂-虛擬貨幣的生態圈

疫情期間,個個喺屋企坐到傻晒,難得見天氣又開始熱返,年輕闊太陳師奶打算換返條短裙仔去商場。

心情靚靚嘅陳師奶搭緊商場扶手電梯嘅時候,感覺到身後有個身影同埋有d反光射到塊面。

說時遲那時快,已經望到有個獠瘦嘅中年男人拎住部電話喺佢裙底偷拍緊,頓時花容失色大叫。

偷拍男即刻起勢逃跑,跳過對面反放向扶手電梯逃亡。

不過,不幸嘅係,偷拍男唔記得咗近半年個個香港人都體能大增又身手敏捷,一個中佬同一個年輕人一齊撲出將偷拍男捉住。

陳師奶氣急敗壞咁走落嚟感謝兩位無名英雄。

之後望住偷拍男講 "你都真係壞啦!學人用手提電話偷拍?以後我喺街度見到任何男人揸住部手提電話都要打醒十二分精神,個個拎住手提電話嘅男人都唔方係好人!"

兩位無名英雄一面無奈咁望住陳師奶

中年男英雄正喺度拎緊部電話打999報警

年輕嘅男英雄正喺度用緊電話相機影低偷拍男嘅樣同拍片做證據記錄

陳師奶完全唔察覺兩位男士無奈嘅眼神,繼續激動地自怨自艾咁講"一日最衰都係發明手提電話嗰條友,好搞唔搞裝咩野相機落個電話度?比晒機會呢d變態佬去影我!?"

呢一刻嘅陳師奶已經唔記得晒每日佢例行嘅開心活動,包括用電話相機自拍靚樣再用美圖秀秀執相擺上FB同朋友圈嘅開心時刻,又或者以前日日去文華東方酒店high tea影相打卡嘅美好時光都拋諸腦後

大家睇到呢度,可能會問 "喂,我嚟呢度係想睇虛擬貨幣同區塊鏈!你講咩野陳師奶同偷拍狂啊!?"

其實我係想借呢個故事分享,提醒喺幣圈路上,大家唔好做陳師奶。

一件科技嘅好與壞,係視乎用家點樣運用,而唔係科技本身。

虛擬貨幣嘅利益之大,會令到行業良莠不齊,呢個係一個必須要承認嘅事實。

有人會存心去呃。

有人係認真去做但係經營不善而倒閉。

又有d人係認真去做,不過連佢都比人呃埋。

當中亦都不乏有心人開始將個行業一步一步行好,將呢個Wild West行得越來越規範化。

所以正如呢個page理念,要有智慧去學習,去看透事物嘅本質。

最重要一點,虛擬貨幣嘅波幅之大,會令好多人交學費,因為坐唔穩,信仰唔夠,成為"韭菜"嘅一份子(被宰割嘅虛擬幣玩家)

如果大家學習到虛擬貨幣嘅真正威力同功用,做一個好好嘅信仰者就唔會好似陳師奶咁,有少少唔如意就將之前所有美好嘅功能都拋諸腦後,從而破口大罵,甚至將自己部電話都差d掉埋

下次,我會開始分享下虛擬貨幣嘅參與方式及渠道。

本文轉載自 智慧社區 Facebook 2020年4月20日貼文


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论