WiseCommunity
WiseCommunity

香港傳奇財經評論員曹仁超先生講過: "有智慧不如趁勢" 呢個社區就覺得"趁勢發達都要有基本智慧" 虛擬貨幣,去中心化金融,區塊鏈技術都涉及相當的知識及理解。 如果無一定程度嘅理解,你就算選擇正確的投資平台或工具,都難免成為"韭菜"一族,任由鯨魚們收割。 我希望一點一滴咁為大家收集和分享每日全球科技金融的知識和新聞,每日為大家充值信念,陪伴大家做『踏浪者』去享受科技金融嘅樂趣和資產增值的機遇。

朱師奶初嘗催淚滋味 - Y2.2K後遺症之淚灑雪廠街

尋日分享過千年蟲鐘意飲原油嘅故事,而陳師奶既閨密---朱師奶亦都係一個被蟲咬嘅人

朱師奶作為小富婆一名,平時其實都真係有玩開投資

但係所為嘅玩,都只係將d錢交晒比銀行RM(Relationship Manager)Patrick打理,之後就約晒成班靚太去置地high tea

話説尋日中午時份,屋企司機老王車住朱師奶喺半山區落中環,經過雪廠街嘅時候收到Patrick電話:

"喂Patrick, 今日有咩嘢好介紹好消息啊?"

"朱太,我首先要同你講聲對唔住"

"點解講對唔住啊?"

"我輸晒你d本金"

"你意思係早幾日同我講話趁低買油搏炒高嗰d錢?"

"係"

"咁都唔係好多啫,我都係叫你放十萬八萬去玩,之前你幫我贏咗咁多,輸少少我唔會在意嘅"

"朱太,多謝你咁體諒同支持咗我咁多年,不過我希望你嘅體諒可以體諒埋接我手嘅黃經理"

"你唔做啦??好地地做乜會走得咁急嘅?"

"朱太,總之我對你唔住,你要有心理準備,黃經理會慢慢解釋比你聽你點樣輸咗七百幾萬,同埋你欠緊銀行錢。 我要講嘅就係咁多啦,多謝你一直信任,Bye Bye"

"喂喂喂。。。。!?咩野輸七百幾萬!?"

"do...do...do...do"

朱太嚇到花容失色,即刻方寸大亂咁喊咗出嚟,同當年number哥一樣,淚灑雪廠街

朱太嘅經歷,我相信全球都發生緊

黃子華講過一段經典金句

老闆發脾氣鬧人成日都會講 "我唔理,你死都同我死掂佢!"

打工嗰個就心諗 "老細,你氹我開心咋? d 錢係你嘅,你都唔理,咁你估下我理唔理?"

其實今次Patrick同朱太都係無辜嘅受害人,都係嗰句,最錯嘅係佢哋太少去了解世界大事同傳統金融行業嘅急速變化。

至於朱師奶嘅閨密---陳師奶喺另一邊廂並無受到今次油價嘅任可影響

點解?因為上次年輕嘅無名英雄---Charles教識咗陳師奶學習新科技知識

原來Charles係一名熱血青年,因應近年嘅複雜政治環境,佢一早學習點樣分散投資,亦接觸落去一個完全獨立於現有金融體系嘅遊戲 ---Bitcoin虛擬貨幣

喺朱師奶熱衷炒油嘅時候,陳師奶已經學習點樣涉足咗虛擬貨幣嘅世界,上咗app store download咗第一個bitcoin wallet, 準備小試牛刀咁準備進行第一次Bitcoin 嘅買賣交易。

呢一刻嘅陳師奶,正拎住一萬蚊嘅五百蚊紙行緊上去深水埗嘅"深之都"去進行第一次買賣。

下一篇就會講一講陳師奶嘅深之都 - Bitcoin入門之旅

(續)

本文轉載自 智慧社區 Facebook 2020年4月23日貼文


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…

发布评论