電影 - 怪胎

有冇試過遇到一個同你臭味相投嘅人？譬如一樣食咩都要加辣椒，或者好鍾意食生芫荽，又或者用紙巾時要反摺再反摺，又或者行路時唔鍾意踩到線。

遇到惺惺相惜嘅人食餐飯都會開心啲，就係呢種感覺，電影描述兩個都有強迫症嘅男女相遇，發覺明你嘅就係我、明我嘅就係你，從此發展一段情路。

但係有一日你發覺你唔再鍾意食嗰樣嘢，唔再鍾意做嗰件事，甚至乎唔再鍾意你，咁結局會係點呢？

雖然導演一再強調唔好因為佢用iPhone拍晒成齣電影而入場，但係確實器材只係工具，如何講故仔先至係重點。

嚴格來講呢齣戲係恐怖片，一齣冇出路嘅電影，要解答結局提出嘅問題，就要睇吓你嘅修為啦。

有趣嘅電影，推薦。