《開玩笑的夏天》：直面異論的勇氣

身為誌傳媒忠粉，早就買咗佢哋出版嘅《開玩笑的夏天》，但就直到最近先開嚟睇。本書作者係00後嘅獨立記錄者，從中國內地移居香港剛好兩年，就遇到反送中運動。運動衝擊到佢對中港關係、身份認同、民主自由等等嘅思考，所以佢選擇去訪問一班擁有中港經驗人士，認為只要雙方建立理解同互信，就可以緩解兩地嘅衝突。

行文入面提到，中港矛盾源於彼此嘅不信任，而不信任來自歷史偏見同各種迷思。所謂歷史偏見，意思係不合理地判斷共產黨以後都會做出文革、大躍進、八九六四等罪行。正因雙方充滿誤解，所以需要願意打開心扉、了解中國嘅人築成溝通之橋。

可能作者同某啲被訪者覺得係偏見同迷思，但眼見卅、四十年來無數香港人北上發展而慘遭過橋抽板，反而覺得以為信任就可以解決問題，先係一種天真嘅偏見。歷史不斷重演，遺憾總係有人唔願汲取生活經驗嘅教訓，堅信可以與虎謀皮。情況就如被人家暴、情緒勒索數十年，但每一次都相信施暴者會改過一樣執迷不悟得可憐。所以我讀呢本書嘅時候都好受衝擊，竟然會買咗本咁嘅書，又竟然可以咁犀利，控制自己去睇曬成本書。

不過本書有令人印象深刻、啟發到我嘅地方。其中一個故事係關於一位老師，點樣慢慢比學生感染，從而關心同參與更多反送中活動。當中一段文字好值得大家深思：

「對於很多人來說，街上是前線。但對於教育工作者而言，學校才應該是前線，這是一個教育學生如何獨立思考、理性分析，如何為公義發聲而不選擇沉默的前線。」

冇咗街頭戰線之後，唔少人都會感到迷惘，覺得冇乜可以做，但其實唔同人都有唔同嘅前線。我哋要做嘅就係揾返屬於自己嘅前線，係崗位上發揮同努力。仍然關心香港嘅人，都要有心理準備，呢個問題久唔久就會返嚟揾自己。但只要肯繼續試，總會揾到答案。

另一個訪問就提及了解中國嘅重要性。被訪者係一位中國出生，現居於大嶼山研究東大嶼人工島問題嘅學者。比起偽中立或藍尸嘅所謂香港人，佢更加關心同理解反送中抗爭，亦鼓勵我哋要更加了解中國發生嘅事。尤其喺抗爭中擔任重要角色嘅人，更需要仔細理解對家，唔好忽視或者錯判形勢，要學習從香港本位以外的角度理解事情。

過往就係因為唔了解中國，先令香港人覺得可以談判，中共會願意聆聽我哋嘅意見。但係不忘初心、堅持寸土不讓嘅習時代底下，呢種誤解明顯係離曬大譜。又有唔少香港人只係識得恥笑鄰近強國嘅荒謬，輕視上位者嘅謀略同部署。唔了解對家情況，我哋又點可以好好咁準備未來呢？

呢本書雖然係好「大愛」，睇到夭心夭肺，好想中途放棄。但如果永遠只係從香港角度去睇事物，就冇辦法同其他世界接軌，亦都冇辦法搵到可行嘅出路。我諗《開玩笑的夏天》比我嘅最大得著，就係要勇敢面對難聽嘅異議，並且從中吸取支撐我地行落去嘅養分。

如這篇文章有幸接觸到你，願你可以行動抵抗遺忘，捍衛真相與公義，一同見證我城的未來。

https://button.like.co/sarenechan14

如你願意支持我繼續努力，可以請我一杯咖啡☕

https://ko-fi.com/sarenechan

歡迎每月定額支持我的寫作，讓我們在暗夜中互相守望，彼此送光：

https://liker.land/sarenechan14/civic