記維多利亞

唔記得幾耐冇尼過呢度呢？今次要處理啲事而返尼，就約左冇見好耐嘅朋友聚舊。

咁多年冇尼，呢個城市好似冇乜點變，但又變左好多。

以前出機場好快就搞掂，即使去過唔少國家，都冇呢度嘅效率同準繩。但宜家唔單止飛機不斷延後，入境手續混亂又繁複，有啲人可以直行直過，其他人就要搞好耐，甚至有人連入境都唔比，而海關竟然咩理由都冇講。因為等嘅時間太長，有人開始鼓譟，海關一見到，就帶在個人去第二度。後來，一啲冇出過聲，靜靜排隊嘅人都比人帶走左。大家都好驚，一粒聲都唔敢出。

終於到我過關。關員搵返我好耐以前係呢度生活嘅紀錄，問我點解走又點解返尼。我只好話係因為工作關係，唔係我自己可以決定嘅，又對佢講盡好說話，放低幾份之前買定嘅手信，先能夠過到關。

過完關，有種彷如隔世嘅感覺，天都黑曬。我成個人好似冇曬力咁，好艱難先拎得起部手機去聯絡朋友。打好訊息，見佢整極都送唔到出去，至發現平時用開嘅通訊工具原來係用唔到嘅。好彩張卡仲打到電話，終於搵到朋友。佢聽見我嘅情況，都有啲擔心，但又輕笑幾聲咁講話：「宜家係咁嫁啦，大家都慣左。你快啲搭的士出尼啦。」「下，」我諗起以前，就問：「搭鐵唔係快啲同平啲咩？我驚塞車喎。」點知朋友話：「塞車都冇辦法嫁啦。地鐵最近先出事，發現結構有問題，好危險啊。我幫你叫車啦。」

好奇怪地，一落車，熟悉嘅感覺又出返尼。黑夜中嘅街燈同兩旁林立嘅商店光燦燦咁，叫人分唔到日同夜嘅界線。而着得色彩繽紛嘅人群，就好似爭艷鬥麗嘅太陽花一樣，向住發光嘅店鋪，努力吸取令自己變得更靚、更型嘅養分。但我有一個明確嘅目的地，光明並唔係我嘅終點。猶如離群逆流嘅魚，我奮力撥開一簇又一簇嘅人潮，向命定之地進發。

行到去我地約嘅地方，一眼就見到佢一個人企係冷風之中。望到佢單薄嘅身影，我好後悔冇快啲尼。

「對唔住啊，要你等咁耐。」

佢輕輕咁搖頭，只係話：「你尼就好啦。」

「你有冇想去嘅地方？」

佢又搖左下頭。

「咁我地慢慢行下啦。」

我拖起佢嘅手，沿住海旁咁行，一直行到海浪聲越尼越大，人聲越尼越細嘅地方。

潮漲、潮退，海浪每一次拍向岸邊，都好似要衝破海陸嘅界限咁樣，又好似焦急咁要返去岸邊嘅歸宿。

係我地以前去過嘅地方。

呢個往昔引以為傲嘅海岸線，如今經已併入鄰國嘅土地。跨境大橋取代左渡輪，我地已經冇辦法再感受撲面而來嘅清爽海風。本來起係海旁嘅公園都被夷為平地，改建成高級嘅酒店式公寓。曾經棲息係公園嘅動物，走嘅走，走唔到嘅就比人捕捉屠宰，要尼供應人口爆發帶尼嘅龐大胃口。呢啲倚靠海岸而起嘅高樓，唔知係為個海港遮風擋雨，定係要困住佢嘅出路呢？

我好想問佢，點解你又唔出聲嘅？明明你咁辛苦。

但其實，佢一直都有講佢嘅痛苦，係我冇放係心上。

佢有話太多人啦逼得我好辛苦，我都應接唔到咁多人。

佢有話宜家我比人搞到冇曬特色啦，點同周圍啲人爭姐，日日死做爛做，都只係搵到餐飯食。

佢有話就算放假想去附近行下放鬆下，都冇曬地方啦，啲郊野公園起曬豪宅，我又冇錢住，住緊冇獨立廁所同廚房，淨係擺到張床嘅劏房炸。

佢有話搞埋啲曬錢又豆腐渣嘅大工程令我好難受，有啲咩天災人禍我根本冇能力去面對，冇人諗過死人冧樓嘅話要負責，到時承擔後果嘅咪又係我。

佢講左好多好多，但我總係覺得自己都有好多問題要處理，就對佢講嘅野視而不見。

我諗，佢一定有過心淡以至絕望嘅時候，亦都試過好嬲呢度嘅人，或者好討厭呢個世界，佢可能都會覺得好想嘔，對啲虛偽又只為自己嘅人感到好反胃。我諗，佢對我一定有過無數次嘅失望、憤怒、痛心、無力，但佢最後都冇放棄到我。佢一直等緊我，就算我冇諗住返尼，就算我從來都不聞不問，佢都相信我，相信自己。

我帶佢去返以前去過嘅地方，唔係因為佢唔記得，而係我唔記得左。

而佢，一直努力咁呼喚我，希望我可以記返起。

其實我早就知道會有咁多變化，只係唔想相信呢個就係現實。

係咪我尼得太遲？

佢搖頭，只係話：「你尼就好啦。」