《叔．叔》：生活之美與悲

《叔．叔》講述兩位男性的士司機柏（太保）同退左休嘅海（袁富華），隱藏自己嘅同志身份大半個世紀，甚至成家立室、生兒育女，到人生走入晚年，佢地先可以稍稍放低照顧家庭嘅責任，去尋找真正嘅愛情同幸福。雖說社會嘅風氣隨時代進步，對同志嘅歧視都慢慢減少左，但兩位老年同志又可唔可以係光明正大咁起埋一齊？面對不能坦誠相對嘅屋企人，又如何處理個人幸福同屋企人感受嘅兩難？

望穿秋水總算等到受武肺影響而要延期上映嘅《叔．叔》開畫，到觀影嘅時候呢份期待冇被背叛不特止，仲大大超出我嘅期待。一路睇一路驚嘆畫面拍得咁細膩、有美感，演員入型入格冇違和感，仲有拍攝選址係油麻地係幾咁有親切感。

不得不讚歎嘅仲有劇本，觀眾唔會睇到濫情嘅情節、賣弄嘅情慾，而係睇到一個個好真實生活係香港呢個社會嘅人物。不論係兩位主角同志，定係佢地身邊非同志嘅人，我地都睇到人物生活中嘅甜與酸，默默嘅感情流露反而更令人動容。

其中一個印象尤其深刻嘅畫面，係海同佢兒子永（盧鎮業）嘅相處。表面上，兒子永都幾關心父親，見到爸爸夜晚想食甜品，就勸佢唔好食，以免影響健康。永對爸爸嘅關心，甚至引起佢老婆呷醋，話永寧願送佢入老人院，都唔會送爸爸入老人院。但實際上，永同佢嘅一家三口，係一步步壓迫緊爸爸嘅生活空間。當海只係想揾返啲舊相尼睇下懷念下，永就話啲相都入曬電腦啦，可以掉曬啲舊相。下一刻，永嘅太太甚至話小朋友要做功課，叫海收返曬啲相。或者只係日常生活中好平凡嘅小事，卻令我地睇到兩代人嘅矛盾、香港典型比較狹小嘅生活空間、同被迫收藏以至清理嘅憶記。

可想而知，係一個咁壓迫、狹小嘅空間，加上永一啲好僵化嘅信念，海冇乜可能會同阿仔「出櫃」，甚至連同志都唔可以提起。諗起以前睇過關於同志父母嘅訪問，父母同仔女「出櫃」嘅壓力同心理關口，相比起仔女向父母「出櫃」，可以話係難上加難、不能言喻。家庭明明應該係嘅避風港，卻成為最陌生、虛偽嘅枷鎖。同志不得不為生活而隱藏身份大半生，到人生最後階段都不能夠光明正大咁做自己，令人十分痛心。希望呢部電影可以助同志發聲，令大家都可以真誠地活出自己嘅人生。

一出戲院，我迫不及待咁同身邊嘅朋友推薦呢部電影，大讚畫面平實得尼富有美感，特別係將兩位年過半百、相貌不算標青嘅人物嘅情慾場面拍得咁有美感，實在厲害而罕見。近年雖然因為多左「腐女/腐男」（亦即喜歡觀看同志戀愛的人士），都多左同志相關嘅影視作品，只係往往會揾後生靚仔，拍到好似偶像劇咁。但比較有深度咁探討同志處境嘅作品始終罕見，更遑論係以暮年同志做主題，更見呢部作品嘅可貴同優秀。

不過，大讚完《叔．叔》之後，我亦忍唔住話，「佢一開波個黑底白字新細明體製作名單嚇到我打個突啊😂 XXXXX（另一香港電影）又係，內容明明勁好，又係差在啲字」從事相關業界嘅朋友就回覆話：「慘…好窮… 呢啲野最唔重要，可以用免費軟件整嘛」套戲明明咁好，但因為極有限嘅製作費，不得不犧牲美感同統一性，真係戥佢唔抵。本土作品唔係質素差、唔係冇人才，而係缺乏資源同市場支持啊。香港人真係要多啲用真金白銀去支持本土作品，透過消費投票比我地想要嘅世界。

延伸閱讀：

專訪《叔．叔》導演楊曜愷：電影像戀愛，你會想像下一個情人的模樣

https://theinitium.com/article/20200503-culture-film-interview-suksuk-rayyoung/

【娛樂人物】孤身走我路 區嘉雯

https://hk.entertainment.appledaily.com/entertainment/20200531/WBUNLV3JWTO22CSTAY7GS5F64M/