山寨匠人

在金融圈裡營營役役十多年,還差一點點便成功上岸、名成利就之際,因為社會的現況,因為孩子的出現,因為心靈的呼喚,決意放下自在,回頭逆流游向大海中心,追求心靈上所嚮往的烏托邦。 讓我們深深呼吸,重新掌握自己的脈搏。慢慢來,細細來,透過雙手,開放心靈,感受事情的過程,感恩事情的發生,感激事情的教誨。 Facebook 專頁: www.fb.com/livenlovenaturally

最後無事,之後又有事

發布於

今日,發生咗一件無論回想幾多次都會嚇死人嘅事。同以前一樣,每次發生天跌落嚟嘅事,我當下都係可以毫無情緒咁將件事處理好。

喺別人眼中,呢件事好神奇。明明聽少少都嚇到流馬尿嘅事,當時人竟然可以如斯冷靜,好似路過咁處理。呢個人,厲害,理智得很。

其實,我唔想咁。不過,既然次次都比我拆到,事情又已經完滿解決,其實我又好似真係無乜嘢好諗翻轉頭。至少,我係咁同自己講,朋友係咁同我講。

雖然理智上,我都真係咁同自己講,不過問心,身為血肉之軀,身邊嘅人爆大鑊,又點會無感覺吖?不過感覺嘅嘢,好神奇。一開波劇情發展,造咗個催淚位出嚟,你喊唔出。到之後,就算你腦海中不斷重複,出現嘅通常都係後悔,同拗底。至於你想用爆喊嚟解翻個心結,反而越嚟越難。

不過,無辦法,身邊嘅人讚緊你,覺得你好硬淨,你又無理由自己彈出嚟話畀人聽自己唔掂。咁樣係好傻架!不過我成日咁諗,我硬淨,至少可以支持住身邊嘅人。

如是者到今日,我又要續牌喇!個牌依然續到,不過我發現,件事變咗。我想話,我處理手法無變過。變嘅,係周圍嘅人。呢班人之後無再讚我好冷靜,反而,無事之後第一句就問我,你掂唔掂呀?係唔係仲好拗呀?有咩同我講喎!

咁樣就好似,劇情峰迴路轉,又整翻個高潮迭起位,將平靜咗嘅波浪一嘢衝翻上去。擔心,傷心,緊張,坳底,仲有一大堆唔知乜嘢一次過爆翻出嚟。我,係呀,會驚架,會坳架,會傷心架,仲好緊張添!不過正因為咁,我係一個人,我係一個有血有肉嘅人。

其實,我而家唔係好似自己講緊乜。不過求其啦!總之我想多謝你,妳同路過嘅你妳,你哋畀機會我坳吓。我,雖然而家都仲係好坳,不過至少,我唔使谷住谷住扮唔坳。

總之,托賴,佢最後無事。又托賴,我之後有事,等我再之後無事。

喜歡我的文章嗎?
別忘了給點支持與讚賞,讓我知道創作的路上有你陪伴。

CC BY-NC-ND 2.0 版權聲明

看不過癮?

一鍵登入,即可加入全球最優質中文創作社區