抗疫點滴，亂譯尼采（三）

疫情持續，在家中百無聊賴，突然覺得可以從日常生活點滴中的體會，和尼采的名言警句作個配對，並用上廣東話，給自己的人生作個記錄，也嘗試為無盡的抗疫日子帶來一絲絲希望。

〈恐懼由心生〉（2020/08/19）

暴風雨過後，走出屋外打理一下，在外牆射燈後的小洞穴中，發現一班人類不太喜歡的朋友仔。

停一停，想了想，其實，他們從來都沒有來打擾我。只不過，昨天的風雨真的太大了，把他們的家都淹沒。他們迫不得已，才會跑過來避一避。既然情況好了，他們自然會離開，那麼我也犯不著要趕盡殺絕，大家留一線便好了。

佢哋好恐怖？可能只係「自己嚇自己」啫！

世上唔好嘅嘢，有四分三都係因為自己驚。

因為心入面驚，先會喺度不斷諗發生咗嘅事。甚至連未發生嘅，都會諗多咗，自己搵嚟驚一餐。

其實，所有嘅驚都只係你自己諗出嚟。亦正正因為自己諗出嚟，所以其實可以輕易改變。

〈發自內心，才能成就好事〉（2020/08/20）

從小到大，我鍾意的事情和東西，很多時都帶點迷迷糊糊。要是朋友問我「為甚麼喜歡」或「喜歡甚麼」這類問題，我真正鍾意的，通常思前想後也不會有答案。

反而能夠解釋的，通常很快便會感到納悶，草草了結。那種感覺，充滿著無論如何也不能重拾的失落和可惜，很雞肋。

原來只有〈發自內心，至能夠成就好事〉，你有無試過咁啊？

無論係幾好嘅事，如果係「為咗乜嘢」而做，就變咗賤到爆嘅自私精。

為咗邊個而做，為咗乜事而做，一旦衰咗，你就會好鬼憎佢，怨天怨地；相反，如果順順利利，你就會認屎認屁，自以為是。

因為乜都係為咗自己。只有當你真心真意，自己為愛去做嘅時候，先唔會突然覺得係「為咗乜」而做。

〈向樹木學習〉（2020/08/21）

想不通的時候，離開屋企，回歸大自然。看看這，看看那，好些本來不明白的東西，突然間，都明白了。

或者，和以前的高人一樣，我們要〈向樹木學習〉。

松樹成日都係直筆甩咁棟喺度，好似喺度聽緊啲乜咁。

冷杉又係成一碌杉咁郁都唔郁，又好似唔知等緊乜嘢。

呢啲樹木定過抬油，又唔嘈，日日都只係喺一片寧靜中靜靜地咁等，一味忍。

我哋都要學吓松樹同冷杉嘅態度。