葉曉燕 Rachel IP
葉曉燕 Rachel IP

藝術家|策展人|大學創意藝術系講師 IG: rachel.iphiuyin

藝術嘅嘢我食條鐵之香港究竟有咩睇?

香港究竟有咩藝術空間?想睇展覽可以去邊度搵?香港究竟有咩睇?
當年The Upper Station (Photo) Gallery,展覽開幕盛況


好多香港人成日都話藝術嘅嘢我食條鐵咩?其實藝術又係咪咁遠呢?我哋細個嘅時候都有上過美術堂,又可能會參加吓過畫班。但唔知點解藝術同我哋成日都好似好陌生咁,有啲人可能會覺得藝術好悶,又有啲人會覺得藝術唔關佢地事。其實如果你搵到鍾意嘅作品或者藝術家/插畫家師/攝影師,又會唔會令你想試去睇展覽呢?

就好似近年深水埗大南街Parallel Space嘅展覽,都好親民。每次去到嘅時候都會見到好多後生仔女,鋪頭嘅人話俾我知,甚至有唔少真街坊會隨便咁就買咗張作品返屋企。啱啱麥東記嘅《香港定格》原畫展,開幕嗰日簡直多人到爆炸!其實香港都仲有好多好好嘅展覽空間,畫廊又唔係真係咁恐怖。喺呢度我想趁機會介紹幾個地方,等大家今個暑假無得出外旅行嘅時候,可以留喺香港探索一啲我哋平時可能好少去嘅地方。

第一間想介紹嘅係刺點畫廊(Blindspot Gallery)。Blindspot Gallery喺2010年頭成立,起初喺中環鴨巴甸街。2010年有兩間主打攝影嘅畫廊成立,分別係喺上環太平山街嘅The Upper Station (Photo) Gallery,同埋Blindspot Gallery。兩者嘅路線都幾唔同,The Upper Station (Photo) Gallery主要係偏向紀實攝影嘅作品,而Blindspot Gallery就更多關於當代藝術攝影。

以前好多畫廊都係集中喺中環,但大家都知道香港嘅租金貴得驚人而且不斷上升。於是大約八年前唔少畫廊就慢慢開始移到黃竹坑嘅工廠大廈,而Blindspot Gallery就係其中之一。喺呢度想補充少少,香港其實從來唔缺乏有趣嘅空間,或者係有心做藝術文化嘅人。只不過主要都係因為租金關係令經營太困難,往往開幕一兩年就會執笠。喺太平山街嘅The Upper Station (Photo) Gallery,就係因為當年太平山街士紳化(Gentrification)嘅關係,短短兩年間鋪租就升咗三倍,於是喺2012年關閉。所以最近喺深水埗大南街嘅情況都令人開始擔心,雖然佢哋而家變成一個好好玩好熱鬧充滿活力嘅地方,但其實已暗暗開始士紳化。由2015年進駐深水埗既百呎公園Things that can happen|咩事藝術空間,到之後既合舍common ground,全部都係藝術家主理既藝術空間,然後發展到今日嘅大南街,聽聞已有投資者已經蠢蠢慾動或已經行動。

翻返嚟,Blindspot Gallery 2012年移師到黃竹坑一個更大嘅地方,依家已經唔係主打攝影作品,而係會嘗試展示更多唔同媒介嘅創作。繼2020年《循環播放II》,最近《循環播放III》再有不同藝術家嘅錄像作品喺畫廊度循環播放,免費參觀。


Blindspot Gallery
Gallery Exit


同Blindspot Gallery 一樣,喺田灣嘅Gallery Exit都係比較多展出香港藝術家作品嘅畫廊,尤其是年輕嘅藝術家。雖然佢哋係商業畫廊,但係其實呢啲地方對藝術家嘅發展相當重要。一來藝術家可以有展覽嘅機會,亦都可以透過畫廊賣出作品去支持佢哋嘅創作。畫廊相對博物館更容易提供機會比新進嘅藝術家,有唔少畫廊甚至會到各大院校嘅畢業展揀作品或挑選有潛質嘅藝術家。當然呢樣野有利有弊,過早接觸畫廊可能會影響到藝術家嘅創作,特別係當銷售「太理想」時。間中喺畢業展有時都會見到有啲過分有「賣相」嘅作品,咁呢樣嘢嘅影響令到有部份藝術系學生喺讀緊書嘅時候已經想住去做一啲迎合畫廊口味嘅作品。要做藝術家定係做藝術?要做明星定係做歌手或演員?兩者當然可以同時存在,但又可以互相違背,人各有志。但係如果藝術家唔可以用佢哋嘅作品支撐生活,要不斷做唔同嘅工作或者兼職去賺錢,長期生活喺貧窮線下,咁樣又係唔係健康呢?所以唔同嘅藝術空間、機構、大大小小,都扮演緊唔同嘅角色。畫廊都有好多種,有純粹買賣作品嘅畫廊,亦都有希望推廣藝術,支持藝術家創作,有理念嘅畫廊。喺PMQ對面嘅Karin Weber Gallery都係其中一間,佢哋歷史都好悠久,自從前幾年轉手後就比較多展出一啲香港藝術家嘅作品,特別支持年輕藝術家嘅創作。

除此之外喺灣仔富德樓嘅艺鵠藝術空間、葵興工業大廈內嘅Hidden Space、石硤尾JCCAC嘅Floating Project光影作坊Lumenvisum,都係藝術家主理嘅展覽場地,相比畫廊,佢哋就冇咁多商業考慮。

北角油街實現 Oil Street Art Space
ODD ONE OUT


喺官塘嘅Dot Dot Dot Gallery同埋喺灣仔聖佛蘭士街嘅ODD ONE OUT,就比較多展出插畫師/漫畫家嘅作品。然後仲有位於中環畢打行及H Queen’s中既各大畫廊,喺鰂魚涌嘅Parasite、灣仔香港藝術中心內嘅包氏畫廊歌德學院北角油街實現 Oil Street Art Space,中環嘅大館 Tai Kwun、西九嘅M+、舊年年底裝修完成喺尖沙咀嘅香港藝術館HKMOA、金鐘嘅香港視覺藝術中心 Hong Kong Visual Arts Centre亞洲協會 Asia Society;喺荃灣既六廠 CHAT,都可以搵到香港藝術家既足跡。


香港藝術館HKMOA
亞洲協會 Asia Society


其實如果要睇展覽嘅話,都真係有好多地方,仲未講晒,而且基本上都係免費。唔好成日都以為香港好悶無嘢玩,香港有好多happenings等待大家去發掘。

有機會再講下睇樣睇展覽。



文:葉曉燕 Rachel IP


原文刊登於 《迴響》第二期 (2020.8)
https://resonate.hk/
https://www.facebook.com/ResonateCantonese/
《迴響》係一本屬於香港人嘅粵語文學期刊


CC BY-NC-ND 2.0 版权声明

喜欢我的文章吗?
别忘了给点支持与赞赏,让我知道创作的路上有你陪伴。

加载中…
加载中…

发布评论