老餅如我愛舊歌

早排在Matters上，藉由【三碗細牛腩麵】大家講起自己鐘愛嘅廣東話流行曲，又聽到唔少人提起自己以前如何聽歌，我都心痕，想襯今日翻工前搵翻以前用嚟聽歌嘅工具回味下。結果發現，可能因為佢太老，或者我太耐無用佢，佢唔再識郁…

係，明明未到「三十而立」嘅我，以前曾經有一段時期係聽LP。LP 即係我哋經常聽到人講嘅黑膠唱片，既然有個「膠」字，碟如其名，其原材料就係以PVC膠，製成碟狀後再係上面刻上聲軌。詳細原理我就唔多講，作為文科出身嘅我，未必能夠好好解釋到黑膠唱片嘅物理原理。

對我嚟講，因為長輩由細播到大，所以我算係同年代入面少數從細就接觸黑膠唱片，再加上少量嘅卡式錄音帶，就成為我細個放學翻到屋企，電視無鐘意睇嘅節目之時嘅唯一娛樂，直到屋企開始有裝上網為止。

亦因為咁，我細個初接觸到嘅音樂，年期上都較我嘅同輩為早。當我一開始係聽緊「哥哥」、「校長」，同輩已經係由陳奕迅、陳慧琳、容祖兒開始接觸流行曲，我同同輩間嘅入門，足足相差廿年。雖則之後因為網路，我能夠追回音樂時代嘅發展，只係接觸過八、九十年代經典嘅我，每每聽到同輩讚到天上有地下無嘅作品之時，我心中只想同佢講：「其實以前有好多作品一樣咁正㗎！」