Kawin Tuha

Kisah Palui Kawin Tuha

RAMI banar di bulan Rabiul Awal naya, salain urang manyalanggarakan maulid, tatapi jua malaksanakan sunnah Rasul nang kada kalah hebatnya wan maulid,yakni parnikahan atau bekawinan. Garbus takajut malihat ada betajak sarubung pulang di halaman masjid Nurul Iman, padahal satahunya sudah acara maulid maundang pajabat wan tukuh agama.

”Acara maulid pulangkah Lui betajak sarubung?” takun Garbus ka Palui salaku kaum masjid.

“Tenang haja ikam Bus ai, ikam? Kami handak bekawinan nah,” sahut Palui lihum.

“Siapa nang kawin Lui?” takun Garbus pula.

“Kawin tuha Bus ai? Pak H Juni sidin pangsiunan PNS, wan Ibu Jismatul Marfuah akrab disapa ibu Jisma umur 56 tahun nang bujang tuha,” jawab Palui.

“Umai raminya Lui?” sambat Garbus.

“Asa kacar Lui lah, nang sudah kawin gin handak jua kawin lagi, iya kada?” Garbus bisa banar sakalinya.

“Nitu targantung keadaan masing-masing Bus ai, bagi nang sugih bisa ai saku babini anum, manambah dapur istilah urang wayah ini, tapi nang kaya aku hanya imam masjid wan bahanu manarik bentor asa kadada rumusnya lagi babini dua?” Palui asa marista.

“Jadi umpat siapa kena ibu Jismanya bila sudah resmi jadi bini sidin?” takun Garbus anyak.

“Nah aku balum tahu lagi am, mungkin di rumah ibu dahulu babarapa malam naya?” Palui kada tahu jua urusan pangantin nitu.

Karana sabagai kaum, jadi Palui hafal inya siapa-siapa nang turun ka masjid umpat salat bajamaah, tamasuk jamaah salat Subuh. Napa dalam hati Palui babarapa malam ini kada muncul-muncul ibu Jisma sabagai jamaah salat Subuh buhan binian. Betakun Palui ka katua masjid Pak Haji Gafur. ”Napa Pak Haji, ibu Jisma kada muncul-muncul salat Subuh ka masjid, harinya dingin banar kalu?” takun Palui sambil lihum.

“Biasa Lui ai, urang hanyar kawin, ikam jangan bingung ya?” jawab sidin lihum jua.

Rasa panasaran Palui, mandatangi ka rumah ibu Jisma nang disubarang masjid nitu. ”Ibu…ibu… kamana pian?” ujar Palui sambil mangatuk lawang.

“Siapa Lui ikam carii?” takun Tulamak tetangga sidin.

“Aku mancarii ibu Jisma , napa barapa malam ini kada turun ka masjid salat Subuh,” jawab Palui.

“Ibu Jisma bulan madu ka luar kuta dudul Lui ai wan laki sidin jua ai, ikam takatuk urangnya nang kadadaan nitu,” ujar Tulamak tatawa.

Mandam Palui kada saling bunyian, dilahakan Tulamak. ”Pantas ai, ibu Jismanya, kadada ka masjid salat Subuh?” bapander Palui dalam hati.